KWAGH U UNA WASE IHYOM IA BEE YÔ
4 | Aôndo Una Wase U U De u Kôron Ior Ihyom
Bibilo Kaa Ér:
“Ityamegh ki jijingi yô, ka dooshima man iember man bem man ishimawan man erdoo man ieren i dedoo man jighjigh u nan, man ishima i legh legh man iyolkôrontsaha.”—MBAGALATIA 5:22, 23.
Inja i Kwagh u Bibilo i Ôr La:
Sha iwasen i Aôndo yô, ihyom ia fatyô u been, sha ci u icighan jijingi u Aôndo una wase se se lu a aeren a dedoo, a sha tahav asev tseegh se fatyô u lun a mi ga yô. Sha nahan yô, gba u se nôngon sha tahav asev tseegh ser ihyom i bee ga, kpa se suur sha iwasen i Aôndo. Aluer se mba eren nahan yô, se lu a mnenge u apostoli Paulu kpa lu a mi la, a nger ér: “Ka sha ikyev i un u a nan mo tahav la m zough a agee a eren akaa cii ye.” (Mbafilipi 4:13) Sha kpôô yô, se fatyô u kaan ser: “Iwasen yam yô, ia va sha TER, Un u A gbe Sha man tar la.”—Pasalmi 121:2.
Er Kwagh u Bibilo i Ôr la Una Wase U Yô:
“Yange m eren tswam a ior, kpa Yehova gemam m hingir u eren kwagh a ior ken bem.”—MKAANEM MA WALDO
Er msen hen Yehova, zamber a na sha mimi wer a na u icighan jijingi na. (Luka 11:13) Sôn un a wase u u lu a aeren a dedoo a un kpa a lu a mi la. Time sha aeren a Bibilo i kaa ér aa fatyô u been a ihyom i kôron la, er dooshima man bem man ishimawan kua iyolkôrontsaha nahan. Ker igbenda i u fatyô u lun a aeren ne yô. Shi ya ijende a ior mba ve lu nôngon sha afatyô ve cii ér vea lu a aeren shon yô. Azende a ngara nahan aa wase u sha er “ishima ia taver [we] u tesen dooshima shi eren akaa a dedoo yô.”—Mbaheberu 10:24.
