Er Bibilo i lu takeda u tweregh ga nahan kpa, i gema i ôr akaa a wasen se man a lun se a inja kpishi. Kwaghwan u ken Bibilo la una fatyô u wasen or u nan lu nôngon a mbamzeyol mba ken ishima yô. Nenge ase akaa a wasen se a Bibilo i ôr ne.

“Ka mba ve lu gbang gbang la kwagh a gbe ve a ortwer ga, kpa ka mba ve lu uange la kwagh a gbe ve a ortwer ye.”—MATEU 9:12.

Bibilo kaa ér alaghga a gba u se za iyouci se za nenge a ortwer. Ior kpishi mba ve lu a mbamzeyol mba ken ishima zua a iwasen sha u fan kwagh u a zayol ve la tsembelee man sha u za nengen a ortwer.

“U̱ tsaase iyol sha anumbe a eren la ka a inja.”—1 TIMOTEU 4:8.

Aluer u ngu eren akaa sha gbenda u iyol you ia taver yô, kwagh la una wase u u nôngon a mbamzeyol ou mba ken ishima. Akaa shon agen yô, ka u eren anumbe hanma shighe man u yan akaa a dedoo kua u yaven tsembelee kpaa.

“Ishima i saan saan ka icigh ki dedoo, kpa ishima i yinan yô, i om akuhe.”—ANZAAKAA 17:22.

Aluer u ngu ôron avur a Bibilo a taver we ishima, shi u tsua akaa a injaa a u fatyô u eren yô,  a saan we iyol. Shi aluer u ver ishima sha akaa a maan we a maa, shi u na jighjigh wer a va doo ken hemen yô, kwagh la una wase u u wan ishima a mbamzeyol mba ken ishima.

“Kwaghfan ngu hen mbahiden a iyol ijime.”—ANZAAKAA 11:2.

Alaghga u va kav er u lu fantyô u eren hanma kwagh u u soo la iyol you ga yô, nahan de vendan iwasen i mbagen ve lu nan we la ga. Adooga azende ou man ior mba hen tsombor wou vea soo u wasen we, kpa vea fa er vea wase u jighilii ga. Nahan ôr ve akaa a vea er u ve, a hemba lun we a iwasen la. De veren ishima wer, ve eren we hanma kwagh ga. Shi sugh ve hanma shighe u ve er kwagh sha ci wou yô.

“Yange m fa je mer, kwagh ngu zan mo iyol, nahan m za nenge a ortwer. Ortwer nengen mo yô, maa pasem kwagh u lu zayol wam yô. Nahan m mase fan zayol wam jighilii; shi i pasem igbenda kposo kposo i a fatyô sôron mo angev av mbun yô.”—Mkaanem ma Nicole, a ngu yan ican a zayol u ken ityou, u i yer ér bipolar disorder la.

“M nenge mer, ka mea ôr Bibilo hanma pepe vea kwase wam yô, kwagh la a wasem u henen sha akaa a dedoo ken iyange la. Ayange agen kpishi ka mea nder man ishima ia doom ker ga yô, ma ivur Bibilo i m vande ôron yô i taver mo ishima.”—Mkaanem ma Peter, ngu nôngon a ishimanyian.

“Yange i taver mo kpishi u ôron mbagenev kwagh u angev mbun, sha ci u i lum kwagh u kunya kpishi. Kpa yange ijende yam igen i ishima ishima kegh ato a mo zulee shi nôngo u kaven er ishima lum ker yô. Yange wasem kpishi sha er a lum guda shi me fa mer m ngu tswen ga yô.”—Mkaanem ma Ji-yoo, ngu a angev mbu ken ityou mbu ka mbu yange or u yan kwagh sha inja la.

“Bibilo wasem u eren kwagh sha kwaghfan, nahan ka m er tom akuma akuma sha er me zua a shighe u memen tsembelee yô. Kwaghfan u a lu ken Bibilo la wasem u nôngon a akaa a ka m shi henen sha mi ken ishima la.”—Mkaanem ma Timothy, ngu nôngon a angev mbu or ka nana lu a mi ve nan hen kwagh ken ishima i kar ikyar inya la.