ILIAM I ORPASENKWAGH VEA ORWANNDOR
Kwagh Gba Aôndo sha Atsan a Se Lu Yan Ne Je Kpa?
Iliam i i nger shin heen ne, ka iliam i alaghga Orshiada u Yehova nana lam vea or u nan we ndor a nan yô. Se tôô ser Kwaseshiada ugen u i yer un ér Michelle yô, va hen ya u orwanndor a na, u i yer un ér Sophia yô.
ER NAN VE A DE ÉR IMBA KWAGH NE NAHAN I ERE?
Michelle: M ngu nan hanma or hen haregh ne cii trak ne sha iyange i nyian ne. Itinekwagh i trak ne ér U Soo u Fan Mimi Kpa? Ka kôpi wou je ne.
Sophia: A ôr kwagh u kwaghaôndoo?
Michelle: Een. Nenge ase mbampin ataratar mba i nger sha igende na ne. Ka hanma mpin ken mbampin mban—
Sophia: De m nyôr u sha zwa. De vihin shighe wou wer u lam a mo ga.
Michelle: Hii nan ve u er nahana?
Sophia: Me tsugh u ga, kam er m na Aôndo jighjigh ga nahan.
Michelle: Doom er u pasem er i lu u ken ishima la sha mimi nahan. Kpa de m pine u yôô, kape u vaden henen laa?
Sophia: Ei, yange m zaan adua. Kpa m de u zan ica i gba hegen.
Michelle: M kav hegen. De m ôr u iti yam. Mba yerem ér Michelle.
Sophia: Iti yam ér Sophia.
Michelle: Sophia, m zua a we nahan doom.
Sophia: Mo kpa doom er m zough a we nahan.
Michelle: Sophia, m va mer me va kighir we lumun a akaa a m ne jighjigh a mi la ga. Nahan kpa, pasem yôô; Ka nyi jim i ne ve u hen wer Aôndo ngu ga?
Sophia: Ngôm yange er aikyôr sha mato, anyom kar hegen 17.
Michelle: Kpash! Kwagh la vihimi! Yange vihi iyoloo?
Sophia: Een, aikyôr la yange na yô, a sombo a haa inya, kera zenden sha ga.
Michelle: Kwagh la vihi tsôô. Ka kwagh u ishima ia de vihin we ga.
Sophia: Kape i lu vough je la. Kape i lu ve ka m pine mer, Aôndo una lu yô, er nan a de ér imba kwagh ne nahan i ere?, je la. Er nan ve Aôndo a de ér se ya imba ican ne nahana?
KA SHAMI U PINEN ER I HII VE AÔNDO A DE ÉR SE YA ICAN GAA?
Michelle: Kwaghbo ngu sha mnenge u ú lu a mi la ga, mbampin ou kpa ka mba bov ga. Se cii ka sea yaan ican yô, se pine er i hii ve se lu yan ican yô. Jighilii yô, nomso man kasev mba nan jighjigh mba sha ayange a tsuaa la je kpa pine mpin nahan!
Sophia: Mimii?
Michelle: Een. Ú lumun wer m tese u ikyav ken Bibilo kpa?
Sophia: A doom yum.
Michelle: Nenge ase mpin u orjighjigh ugen, profeti Habaku yange pine Aôndo ne. Se zua a mpin ne ken Habaku ityough 1, ivur 2 man 3. Ijiir la kaa ér: “TERE, ka nan je m yila, man We U kera ongom ga? M genger imo her a We mer: Ipila; kpa U lumun u yiman ga. Ka sha ci u nyi U erem m nengen a iferkwagh man m kenger icana?” Mbampin mbara man mba ú lu pinen ne nôngo u lun kwagh môm ga he?
Sophia: Mba kwagh môm.
Michelle: Aôndo yange zôhô a Habaku sha ci u a pine mbampin mbara yum ga, shin kaa a Habaku ér, a̱ seer lun a jighjigh u nan kpaa ga.
Sophia: Kwagh la doo tsôô.
ICAN I YAN VIHI YEHOVA ISHIMA
Michelle: Bibilo tese ér Aôndo fa ican i se lu yan la, shi kwagh gba un sha mi kpaa.
Sophia: U ôr nahan u ver ishigh wer nyi?
Michelle: De m tese u ikyav ken Ekesodu 3:7. Ôr ase ivur la.
Sophia: Ka sha mi. Ivur la kaa ér: “TER shi kaa a na er: M nenge ican i ior Av mba ve lu ken Igipiti la, shi M ungwa mliam vem ma ve lu vaan mbatorough a ve la, gadia M fa atsan a ve la.”
Michelle: M sugh u. Kwagh u Bibilo i er heen ne tese ér, Aôndo fe shighe u ior nav ve lu yan ican la kpa?
Sophia: Een, tese nahan.
Michelle: Kpa u ngu wer fe a fa di ican i ior nav tseegh tsô ga. Shi nenge sha vegher u kuren ivur la. Aôndo kaa ér: ‘M fa atsan a ve la.’ Kwagh ne tese ér ka Aôndo u a we se ikyo ga shi a lumun ior u van ikyua a na kpaa ga, a er kwagh nahan yee?
Sophia: Ei, tese nahan ga.
Michelle: Aôndo fe a fa ican i se ye la tseegh ga, ka sea yaan ican nahan i vihi un kpishi.
Sophia: Ka mimi.
Michelle: Er ka sea yaan ican ve i vihi Aôndo yô, de shi se ôr ijiir igen shi se nenge er kwa ne kpa ior mba Aôndo lu yan ican ve lu Aôndo ken ishima yô. I nger kwagh ne ken Yesaia 63:9. Vegher u hiihii u ivur la kaa ér: ‘Sha ican ve i yan la cii, Un kpaa lu yan ican.’ Nahan u fatyô u kaan wer ican i ior mba Aôndo lu yan la yange i kôr un iyol gaa?
Sophia: Een, mkaanem mara tese nahan.
Michelle: Sophia, fa wer mimi je, kwagh wase gba Aôndo ishima tsung je, man ka sea yaan ican nahan i vihi un kpishi. Ka sea yaan ican yô, un kpa a ya i a vese imôngo.
A WA ISHIMA GBEM NAHAN ÉR NYI?
Michelle: M soo u ôron we kwagh ugen cii man me yem ye.
Sophia: Ka sha mi.
Michelle: Nenge ase kwagh u Bibilo i tese se sha kwagh u tahav mbu Aôndo a lu a mi ne. De se ôr Yeremia 10:12. Ôr ase ivur la.
Sophia: Ka sha mi. I̱ kaa ér: “U a gbe tar sha tahav Nav, man A ver tar sha won sha kwaghfan Na, man A samber Usha sha mkav Na.”
Michelle: M sugh u. De se tôô shighe kpuaa se hen sha kwagh u ivur ne i er ne. Yange gba u Aôndo una lu a tahav kpishi ve una gba usha man tar kua hanma kwagh u a lu sha man shin tar cii yee?
Sophia: Kape i lu vough je la.
Michelle: Aluer Aôndo ngu a tahav mbu gban hanma kwagh yô, se kera ver ishima ser una lu a tahav mbu karen a ican i se lu yan la kera gaa?
Sophia: Se ver ishima nahan.
Michelle: Hen ase sha kwagh u ngô u. Er nan a lu yan ican ve i vihi u yumu?
Sophia: Ka sha ci u a doom ishima. Ka un a marem ye.
Michelle: Nahan wea lu a tahav mbu been un angev nyian kpa ma u bee, shin ka nahan ga?
Sophia: Kape i lu.
Michelle: Hen ase sha inja i kwagh u se er ne. Bibilo tese ér Aôndo nengen ican i se ye la shi ye ican a vese imôngo, man ngu a tahav kpishi. U nenge er i gbe u Aôndo una kôr iyol na tsaha tsung sha er una er kwagh u been a ican i yan ave ave ve ga?
Sophia: M ngu a vande henen kwagh ne sha gbenda la ga cii.
Michelle: U hen wer una lu a ityôkyaa i injaa i i ne ve a lu a bee a atsan a se lu yan ne gaa? *
Sophia: Hmm, M hen mer una lu a ityôkyaa.
Michelle: M ungwa or nan ngu yilan we sha hanseeti, nahan me va seer lamen a we sha itinekwagh ne sha ian igen.
Sophia: M sugh u. A doom kpishi. *
Ma kwagh ngu u a tsume u sha kwagh u Bibilo i tese yôô? Sar ú u fan akaa a Mbashiada mba Yehova ve ne jighjigh a mi laa? Aluer sar ú u fan yô, de cie u pinen Orshiada u Yehova wer nana ôr u ga. A doo Orshiada shin Kwaseshiada la kpishi u lamen a we sha akaa ne.
^ Ikyum. 61 Wea soo u seer fan kwagh ne yô, ôr takerada u Bibilo Tese Ér Nyi Jimi? la, ityough 11. Ka Mbashiada mba Yehova ve gber u ye.
^ Ikyum. 64 Kwaghngeren ugen u sha itinekwagh ne una va pase ken hemen er i hii ve Aôndo a de ér ican i er ior yô.
Kwagh Ugen u Alaghga Shi Una Doo U Yô
IYOUKURA
Er Nan Ve Aôndo A De Ior Ve Lu Yan Icanaa?
Takerada u Bibilo u hiihii la pase er i hii ve Aôndo a lu a tahav mbu yangen akaabo kpa, a lu yangen a ga yô.
