Mbashiada mba Yehova Mba Zuan Kwagh Vea Ukwaghaôndo Mbagenev Shin Mba Ze Mbaadua Vevee?
Er se lu Mbashiada mba Yehova yô, ka i doo se u pasen ior mba ken ukwaghaôndo mbagenev cii akaa a se ne jighjigh a mi la, kpa se mba ze mbaadua mbagenev ga, sha ci u se mba civir Aôndo vea ior mba atesen a kwaghaôndo ve a lu kposo a u wase la ga. Bibilo tese ér Mbakristu mba mimi cii i ‘magh ve, i zua ve,’ man kwagh u vesen u a lu ken mzough ne yô, ve cii jighjigh ve u nan ngu môm. (Mbaefese 4:16; 1 Mbakorinte 1:10; Mbafilipi 2:2) Mba ken mzough ne sha ci u ve lumun u tesen aeren a dedoo hen atô ve, er dooshima man mhôônom ma zungwen man u den mbagenev kwaghbo, shi zuan a mbamtsera mba ve lu ker la tseegh tsô ga. Atesen a kwaghaôndo wase cii har sha mfe u mimi u se zough a mi ken Bibilo la. A mfe ne shio yô, jighjigh wase u nan ma a lu gbilinkwagh.—Mbaromanu 10:2, 3.
Bibilo kaa ér ieren i kohol imôngo vea ior mba ken ukwaghaôndo mbagenev civir Aôndo la ka mzough u kpeegh, u una fatyô u vihin jighjigh u nan u Orkristu yô. (2 Mbakorinte 6:14-17) Sha nahan yô, Yesu yange na mbahenen nav ian ér ve nungwa mcivir ve vea ukwaghaôndo mbagenev ga. (Mateu 12:30; Yohane 14:6) Kape Tindi u Aôndo na Mbaiserael sha ikyev i Mose la kpa yange tswer ve u nungwan mcivir ve vea mbawanndor a ve mba ve civir Aôndo ga la je la. (Ekesodu 34:11-14) Ken masejime yô, Mbaiserael mba ve civir Yehova sha mimi la venda iwasen i ior mba ken ukwaghaôndo mbagenev kaa ér vea na ve, i yange vea lumun ve ma tese ér ve nungwa mcivir vea ve yô.—Esera 4:1-3.
Mbashiada mba Yehova mba lamen vea ior mba ken ukwaghaôndo mbagenevee?
Een. Jighilii yô, ken inyom i 2023 la, se vihi ahwa 1,791,490,713 sha u zenden lamen a ior mba ken ukwaghaôndo mbagenev. Ka i gba se ishima u fan mnenge kua jighjigh u nan u “ior cii” ken tom wase u pasen kwagh la vough er apostoli Paulu nahan. (1 Mbakorinte 9:19-22) Ka sea lamen a ior yô, se nôngo sha afatyô wase cii se dondo kwaghwan u Bibilo u a tese ér se naan ior icivir tsung la.—1 Peteru 3:15.