LEHONA 2
Ko Ai te Atua?
1. Aiheā e tatau ai ke tāpuaki ki tatou ki te Atua?
Ko te Atua moni ko Tē na faia nā mea uma. E hēai hona kamataga ma ka hēai foki hona ikuga. (Halamo 90:2) Ko ia ko te Puna o te tala lelei na maua i te Tuhi Paia. (1 Timoteo 1:11) Talu ai na foki mai e te Atua te ola ki a te ki tatou, e tatau lā ki tatou ke tāpuaki na ko ia.—Faitau te Fakaaliga 4:11.
2. He tino vēhea te Atua?
E heai he tagata na kitea te Atua auā ko ia he Agaga, ko tona uiga e hili atu i lo tagata e i ei o latou tino fakatetagata e nonofo i luga o te lalolagi. (Ioane 1:18; 4:24) E ui lava, e mafai ke malamalama ki tatou ki nā uiga o te Atua mai nā mea na ia faia. Mo he fakatakitakiga, nā itukaiga fualakau kai ma nā tiale e taku mai ki a te ki tatou tona alofa ma atamai. Te fuaefa o te vateatea e taku mai ai ki a te ki tatou tona malohi.—Faitau te Loma 1:20.
E mafai ke akoako atili ki tatou fakatatau ki uiga o te Atua mai te faitau Tuhi Paia. Mo he fakatakitakiga, e taku mai ki a te ki tatou nā mea e fiafia ma nā mea e hē fiafia ki ei te Atua, te auala e feagai ai ma tagata, ma te auala e tali atu ai ki nā tulaga kehekehe.—Faitau te Halamo 103:7-10.
3. E i ei he igoa o te Atua?
Na taku e Iehu: “To mātou Tamana i te lagi: Ke tapu tō igoa.” (Mataio 6:9) E ui e lahi nā taku o te Atua, kae e fokotahi oioti tona igoa. I nā gagana takitahi, e kehekehe nā fakaleo. E fakaleo i te gagana Tokelau ko “Ieova.”—Faitau te Halamo 83:18.
Kua kavekehe te igoa o te Atua mai te lahi o nā Tuhi Paia kae toe hui i te taku Aliki pe Atua. Kae i te tuhiga o te Tuhi Paia, na i ei te igoa o te Atua e hili atu ma te 7,000 taimi. Na fakailoa e Iehu te igoa o te Atua i te akoako o nā tino e uiga ki te Atua.—Faitau te Ioane 17:26.
Matamata ki te vitiō E Iei he Igoa o te Atua?
4. Pe manatu mai Ieova ki a te ki tatou?
E vē ko te tamana alofa tēnei, e gaoioi te Atua mo tō tatou lelei e hē uma
Pe ko te halalau atu o nā mafatiaga kua uiga ai e hē manatu mai Ieova te Atua ki a te ki tatou? Ko iē tahi tino e lea mai e ia fakapuapuagatia ki tatou ke tofotofo ai ki tatou, kae e hē moni.—Faitau te Iakopo 1:13.
Na fakamamalu e te Atua nā tino i te foki atu o te filifiliga haoloto. E hē loto fakafetai ki tatou mo te haolotoga e filifili ke kaukauna ai ki te Atua? (Iohua 24:15) Kae e tokalahi kua filifili ke fai nā mea kino ki iē tahi tino, kua lahi lele nā mafatiaga. E fakanoanoa ia Ieova ki te kikila atu ki nā fakamahinoga hē tonu.—Faitau te Kenehe 6:5, 6.
Ko Ieova ko he Atua e manatu mai ki a te ki tatou. E fofou ia ke ola fiafia ki tatou. Toeitiiti kavekehe e ia nā mafatiaga ma ki latou na mafua mai ai. Kae i te taimi tēnā, e i ei tana mafuaaga lelei ke fakataga ai nā mafatiaga mo he taimi pukupuku. I te Lehona 8, ka akoako ki tatou pe ko he ā te mafuaga tēnā.—Faitau te 2 Petelu 2:9; 3:7, 13.
5. E fakatafapili vēhea ki tatou ki te Atua?
E valakaulia ki tatou e Ieova ke fakatafapili ki a te ia e ala i te talanoa atu i te tatalo. E fiafia ia ki a te ki tatou tautokatahi. (Halamo 65:2; 145:18) E finagalo ia ke fakamāgalo. E matea e ia a tatou taumafaiga ke fakafiafia ia, tuha lava pe hē manuia i te lahi o nā taimi. E ui lava i tō tatou hē lelei katoatoa, e mafai moni ke maua e ki tatou he hokotaga tafapili ma te Atua.—Faitau te Halamo 103:12-14; Iakopo 4:8.
Talu ai na fōki mai e Ieova te ola ki a te ki tatou, e tatau lā ke hili atu tō tatou alofa ki a te ia i lo he tahi tino. (Maleko 12:30) Ona kua kē fakailoa atu tō alofa mo te Atua e ala i te akoako atili e fakatatau ki a te ia ma te faia o tona finagalo, ka hili atu ai tō fakatafapili ki a te ia.—Faitau te 1 Timoteo 2:4; 1 Ioane 5:3.
