Talafatu: Ko te mafuaaga e hē fakamanatu ai e Molimau a Ieova te Kilihimahi auā e hē talitonu ki a Iesu.

Mea moni: Ko ki matou ko ni Kelihiano. Ki matou e talitonu kua na ko Iesu e auala mai ai te fakaolataga​—Galuega 4:12.

Talafatu: Kua koutou fakatupua te fevaevaeaki o kaiga e ala i te akoako o koutou hui ke nahe fakamanatu te Kilihimahi.

Mea moni: Ki matou e manatu mamafa ki kāiga, ma e ki matou fakaaogā te Tuhi Paia ke fehoahoani ke atiake ma fakamalohia ai ia kāiga

Talafatu: Kua koutou hē maua te agaga o te Kilihimahi ko te limafoaki, fakatupu te filemu i te lalolagi, ma te faia o na mea lelei ki na tino.

Mea moni: Ki matou e taumafai malohi ke fakaali te limafoaki ma te filemu i aho uma. (Faataoto 11:25; Roma 12:18) Mo he fakaakoakoga, ko te auala e fakatino ai a matou hauniga ma te talakiga, e fetaui lelei ma te fakatonuga a Iesu: “Ia outou avatu fua, auā ua outou maua fua.” (Mataio 10:8) E ki matou fakahino atu foki ki tagata te Mālō o te Atua, ko te fakamoemoe moni ia mo he filemu i te lalolagi ​—Mataio 10:7.

• Na poloaki mai e Iesu ke fakamanatu tona oti kae hē ko tona aho fanau.—Luka 22:19, 20.

• E heki fakamanatu e na apohitolo ma na hoko muamua o Iesu te Kilihimahi. Leamai te tuhi New Catholic Encyclopedia, “Ko te fakamanatu o te fanau mai o Iesu, na fakavae i he vaitaimi o te 243 [T.A.] ma mua mai,” i te hilia ma te senituri talu te oti o te apohitolo mulimuli.

• E matuā heai lava he fakamaoniga o te fanau mai o Iesu ia Tesema 25; e hē fakamau foki i te Tuhi Paia tona aho fanau.

• Ki matou e talitonu e hē talia e te Atua te Kilihimahi, auā e tupuga mai i ni tū ma ni aga fakapaupau​—2 Korinito 6:17.

Ko te tokalahi e fakamanatu te Kilihimahi e ui lava kua ki latou iloa e fakapaupau tona kamataga, ma e hē lagolago e te Tuhi Paia. E tatau la ke ki latou fehili ifo: Aiheā e tatau ai i he Kelihiano ke lotomalie ke inohia ia ona ko te hē fakamanatu o te Kilihimahi?

Kua fakalakeikau mai te Tuhi Paia ke mafaufau mo to tatou lelei, ma fakaaogā te “mafaufau lelei.” (Roma 12:1, 2) Kua akoako ki tatou ke fakatāua te kupu moni. (Ioane 4:23, 24) E ui lava e ki matou fakaaloalogia na manatu o ietahi e fakatatau mai kia te ki matou, kae e pipiki mau lava ki matou ki na takiala o te Tuhi Paia, e tuha pe inohia ai ki matou e te tokalahi o tagata.

E ui lava kua ki matou filifili ke hē fakamanatu te Kilihimahi, kae e fakaaloalo ki matou ki te aiā tatau a te tagata lava ia ke filifili ai e tuha ma tenei matakupu. E hē ki matou taofia ietahi tino mai te fakamanatu o te Kilihimahi.