Dahil sa Kaharian ng Diyos—ang gobyernong itinatag ng Diyos—ang mga tao sa buong mundo ay malapit nang mamuhay nang payapa at nagkakaisa. “Mamamayani ang kapayapaan,” gaya ng ipinangako sa Awit 72:7. Pero kailan mamamahala sa lupa ang Kaharian ng Diyos? Paano ito mamamahala? At paano ka makikinabang sa pamamahala nito?

Inihula ng Bibliya ang ilang kapansin-pansing pangyayari na senyales na malapit nang dumating ang Kaharian ng Diyos. Ang mga pangyayaring iyon ay bahagi ng isang “tanda” na binubuo ng mga digmaan, taggutom, sakit, lindol, at paglaganap ng kasamaan.​—Mateo 24:3, 7, 12; Lucas 21:11; Apocalipsis 6:2-8.

Sinasabi pa ng isang hula: “Sa mga huling araw, magiging mapanganib at mahirap ang kalagayan. Dahil ang mga tao ay magiging makasarili, maibigin sa pera, . . . masuwayin sa magulang, walang utang na loob, di-tapat, walang likas na pagmamahal, ayaw makipagkasundo, maninirang-puri, walang pagpipigil sa sarili, mabangis, napopoot sa kabutihan, . . . mapagmalaki, maibigin sa kaluguran sa halip na maibigin sa Diyos.” (2 Timoteo 3:1-4) Dati nang ganito ang ugali ng ilan. Pero sa ngayon, ganito na ang ugali ng karamihan.

Nagsimulang magkatotoo ang mga hulang ito noong 1914. Sinasabi ng mga istoryador, politiko, at mga manunulat na talagang nagbago ang mundo mula noon. Halimbawa, ganito ang isinulat ni Peter Munch, isang Danish na istoryador: “Ang pagsiklab ng digmaan noong 1914 ay nagdulot ng napakalaking pagbabago sa kasaysayan ng sangkatauhan. Mula sa masayang panahon ng pagsulong, . . . pumasok tayo sa panahon ng kapahamakan, lagim, at pagkakapootan, at walang kapanatagan saanman.”

Pero di-magtatagal, ang lahat ng ito ay mapapalitan ng mapayapang kalagayan. Ipinapakita ng mga ito na malapit nang mamahala sa lupa ang Kaharian. Sa katunayan, bilang bahagi ng tanda ng kawakasan, sinabi rin ni Jesus: “Ang mabuting balitang ito tungkol sa Kaharian ay ipangangaral sa buong lupa para marinig ng lahat ng bansa, at pagkatapos ay darating ang wakas.”​—Mateo 24:14.

Ang mabuting balitang iyan ang pinakatema ng mensahe ng mga Saksi ni Jehova. Sa katunayan, ang kanilang pangunahing babasahin ay tinatawag na Ang Bantayan Naghahayag ng Kaharian ni Jehova. Tinatalakay nito ang magagandang bagay na gagawin ng Kaharian ng Diyos para sa mga tao at sa lupa.

Tingnan ang apat na puntong ito:

1. Ang Kaharian ay hindi mamamahala sa pamamagitan ng mga politiko sa mundo.

2. Sa kagustuhang manatili sa kapangyarihan, lalabanan ng mga politiko ang pamamahala ng Kaharian ng Diyos.​—Awit 2:2-9.

3. Pupuksain ng Kaharian ng Diyos ang mga kahariang gusto pa ring mamahala sa mga tao. (Daniel 2:44; Apocalipsis 19:17-21) Ang digmaang ito ay tinatawag na Armagedon.​—Apocalipsis 16:14, 16.

4. Lahat ng magpapasakop sa Kaharian ng Diyos ay makaliligtas sa Armagedon at mabubuhay sa mapayapang bagong mundo. Sila ang bubuo sa tinatawag ng Bibliya na “malaking pulutong” na malamang ay aabot nang ilang milyon.​—Apocalipsis 7:9, 10, 13, 14.

Para maging sakop ng Kaharian ng Diyos, kailangan muna tayong maturuan. Sa panalangin, sinabi ni Jesus sa Diyos: “Para magkaroon sila ng buhay na walang hanggan, kailangan nilang makilala ka, ang tanging tunay na Diyos, at ang isinugo mo, si Jesu-Kristo.”​—Juan 17:3.

Nakikinabang ang mga tao habang nakikilala nila ang Diyos na Jehova. Pansinin ang dalawang paraan: Una, nagkakaroon sila ng matibay na pananampalataya sa kaniya. Dahil sa pananampalatayang iyon, na may matibay na saligan, kumbinsido sila na totoo ang Kaharian ng Diyos at na malapit na itong mamahala. (Hebreo 11:1) Ikalawa, lumalalim ang pag-ibig nila para sa Diyos at sa kapuwa. Dahil mahal nila ang Diyos, kusang-loob silang sumusunod sa kaniya. At dahil mahal nila ang kanilang kapuwa, sinusunod nila ang sinabi ni Jesus, na madalas tawaging Gintong Aral. Sinasabi nito: “Kung ano ang gusto ninyong gawin ng mga tao sa inyo, iyon din ang gawin ninyo sa kanila.”​—Lucas 6:31.

Ang ating Maylikha ay gaya ng isang maibiging ama, at gusto niya ang pinakamabuti para sa atin. Gusto niyang maranasan natin ang tinatawag ng Bibliya na “tunay na buhay.” (1 Timoteo 6:19) Hindi “tunay na buhay” ang buhay natin ngayon. Milyon-milyon ang naghihirap at nagsisikap lang na makaraos. Bilang sulyap sa ipinangakong “tunay na buhay,” tingnan ang ilang magagandang bagay na gagawin ng Kaharian ng Diyos para sa mga sakop nito.