Go Rera Dikgang Tse di Molemo ka Dipuo Tsa Kwa Ireland le Boritane
Basupi ba ga Jehofa ba tsaya matsapa a magolo a go ikgolaganya le batho ba ba buang dipuo tse dingwe tsa kwa Ireland le Boritane. * Re sa balele Seesemane dipuo tseno di akaretsa Se-Ireland, Se-Gaelic sa kwa Scotland le Se-Wales.
Ka September 2012, re ne ra golola website e ntšha ya jw.org ka dipuo di le dintsi, go akaretsa Se-Ireland le Se-Wales mme ka August 2014, Se-Gaelic sa kwa Scotland se ne sa nna gone. Gape re gatisa dikgatiso ka dipuo tseno. A matsapa ano e nnile a bophiri?
Moruti mongwe o ne a tsaya pampitshana e e nang le molaetsa wa Baebele ka Se-Gaelic. Ga a ka a senya nako go e bala mme ke fa a setse a thubega ka selelo. Goreng a ne a amegile jaana? O ne a kgatlhilwe ke thanolo ya maemo a a kwa godimo a bo a re: “Ke mang a neng a ranola fa? Ruri e a utlwala!”
Mo kgweding ya ntlha ya go gololwa ga jw.org ka Se-Gaelic, batho ba ka nna 750 ba ne ba etela website eno.
Motlhatlheledi mongwe wa kwa yunibesithing e e mo toropong ya Galway kwa Ireland, o ne a bolelela Mosupi mongwe gore ene ga se motho le kereke. Le fa go ntse jalo, e rile a sena go utlwa gore a ka nna le boroutšhara jwa Baebele—E na Le Molaetsa Ofe? ka Se-Ireland, o ne a kopa khopi. O ne a re o dumela gore mongwe le mongwe o tshwanetse go bala dikgatiso tsa Baebele ka puo e a e antseng, a bo a akgolela Basupi ba ga Jehofa tiro e ba e dirileng ya go ranolela dikgatiso mo puong ya Se-Ireland.
Mmè mongwe wa segolwane o ne a itumeletse go amogela boroutšhara ka Se-Wales, a bo a re: “Go bua nnete fela, fa lo ka bo lo nneile ya Seesemane ke ka bo ke sa e tsaya mme go gontle go nna le yone ka puo ya me.”
Ka August 2014, re ne ra oketsa dikgatiso tsa Se-Wales tse di mo jw.org. Seo se ne sa dira gore palo ya batho ba ba balang dikgatiso tsa Se-Wales e menagane gabedi mo kgweding eo.
“Re Bua Puo e le Nngwe”
Fa Jesu a sena go tlhalosetsa barutwa ba gagwe ba babedi Dikwalo, ba ne ba re: “A dipelo tsa rona di ne tsa se ka tsa tuka fa a ne a ntse a bua le rona mo tseleng, fa a ne a ntse a re bulela Dikwalo ka botlalo?” (Luke 24:32) Gantsi boammaaruri jo bo mo Baebeleng bo fetola botshelo jwa motho fa a bo utlwa ka puo e a e antseng.
Monna yo o bidiwang Emyr, go tswa kwa Wales, o nyetse Mosupi wa ga Jehofa mme ga a ke a ya go obamela le mosadi wa gagwe. O ne a tsalana le Mosupi mongwe yo o bidiwang Russell. Emyr o tlhalosa jaana ka se se mo fetotseng mogopolo: “Ke ne ka simolola go tsaya tsia kgang ya go ithuta Baebele fa Russell a ne a ntletse ka buka ya Totatota Baebele e Ruta Eng? * O ne a e nnaya a bo a nthaya a re, ‘Buka eno ke ya Se-Wales. Re tla simolola gone jaanong go e ithuta mmogo.’” Goreng Emyr a ne a se ka a okaoka go ithuta le Russell? A re ke ka gonne ba bua puo e le nngwe, ba tswa mo setsong se le sengwe gape ba a tlhaloganyana. Pelo ya ga Emyr e ne e “tuka” fa a ntse a ithuta ka Se-Wales ka gonne o ne a tlhaloganya se a neng a se ithuta.
Basupi ba ga Jehofa ba tla nna ba thusa batho go ithuta ka Modimo ka puo e ba e antseng, ka puo e e ba amang pelo.