“Fiefia ʻi he ʻamanakí. Kātaki ʻi he mamahí. Kītaki ʻi he lotu.”​—Loma 12:12, Liliu Tohi Tapu Māmani Foʻoú.

 “O fiefia i he amanaki lelei; bea faa kataki i he mamahi; bea fai mau o fakakukafi i he lotu.”​—Loma 12:12, Paaki Motuʻa.

 ʻI he veesi ko ení, naʻe fakalototoʻaʻi ʻe he ʻapositolo ko Paulá ʻa e kau Kalisitiane ʻi Lomá ke nau fai ʻa e meʻa ʻe tolu te ne tokoniʻi kinautolu ke nofoʻaki faitōnunga neongo ʻa e fakatangá mo e ngaahi faingataʻa kehé.

 “Fiefia ʻi he ʻamanakí.” Ko e kau Kalisitiané ʻoku nau maʻu ʻa e ʻamanaki fakaofo ʻo e moʻui taʻengatá​—ko e niʻihi ʻi hēvani pea ko e tokolahi tahá ʻi ha palataisi ʻi he māmaní. (Saame 37:29; Sione 3:16; Fakahā 14:1-4; 21:3, 4) Ko e ʻamanaki ko ení ʻoku kau ai ʻa e sio ki hono fakaleleiʻi ʻe he Puleʻanga ʻo e ʻOtuá a ʻa e ngaahi palopalema kotoa ʻokú ne lōmekina ʻa e faʻahinga ʻo e tangatá. (Taniela 2:44; Mātiu 6:10) Ko e kau lotu ʻa e ʻOtuá ʻe lava ke nau fiefia naʻa mo e lolotonga ʻenau kātekina ʻa e ngaahi faingataʻá, he ʻoku nau tuipau ko ʻenau ʻamanakí ʻoku papau pea ʻi heʻenau kātakí te nau maʻu ai ʻa e hōifua ʻa e ʻOtuá.​—Mātiu 5:11, 12; Loma 5:3-5.

 “Kātaki ʻi he mamahí.” ʻI he Tohi Tapú, ko e foʻi veape faka-Kalisi naʻe liliu ko e “kātaki” ʻoku faʻa ngāueʻaki ia ʻo ʻuhinga ko e “nofo maʻu ʻo ʻoua ʻe hola; kītaki; hanganaki tuʻu maʻu.” Ko e kau muimui ʻo Kalaisí ʻoku “ʻikai ko ha konga [kinautolu] ʻo e māmaní,” b ko ia ʻoku nau ʻamanekina ʻa e fakatangá pea ʻoku nau fiemaʻu ai ʻa e kātakí. (Sione 15:18-20; 2 Tīmote 3:12) ʻI he taimi ʻoku tauhi mateaki ai ha Kalisitiane ki he ʻOtuá neongo ʻoku ʻuhinga iá te ne kātekina ha ngaahi ʻahiʻahi, ʻe fakaivimālohiʻi ai ʻene tui ko e ʻOtuá ʻe faai atu pē ʻo ne fakapaleʻi ia. (Mātiu 24:13) Ko ia ai, ko e fakapapau ko ení ʻokú ne fakamafeia ia ke ne kātekina ʻa e faingataʻá ʻi he kātaki mo e fiefia.​—Kolose 1:11.

 “Kītaki ʻi he lotu.” Ke nofoʻaki faitōnunga ki he ʻOtuá, ʻoku toutou fakalototoʻaʻi ʻa e kau Kalisitiané ke hanganaki lotu. (Luke 11:9; 18:1) ʻOku nau kumi maʻu pē ki he tataki ʻa e ʻOtuá pea falala kiate ia ʻi he ngaahi tafaʻaki kotoa ʻo e moʻuí. (Kolose 4:2; 1 Tesalonaika 5:17) ʻOku nau tuipau ko e ʻOtuá te ne tali ʻenau ngaahi kolé koeʻuhí ʻoku nau talangofua ki heʻene ngaahi fekaú pea fai honau lelei tahá ke fakahōifuaʻi ia. (1 Sione 3:22; 5:14) ʻOku nau toe ʻiloʻi kapau ʻoku nau kīvoi ʻi he lotú, ʻe ʻoange ʻe he ʻOtuá ʻa e mālohi ʻoku nau fiemaʻú ke nofoʻaki faitōnunga lolotonga ha faʻahinga ʻahiʻahi pē.​—Filipai 4:13.

 Naʻe fai ʻe Paula ʻene tohi ki he kau Kalisitiane naʻe nofo ʻi Lomá fakafuofua ki he 56 T.S. ʻI he vahe 12 ʻo e tohi ko ení, ʻokú ne ʻomai ai ʻa e faleʻi ʻaonga ki he founga ke fakahāhā ʻa e ngaahi ʻulungaanga faka-Kalisitiané, founga ke fakafeangai ki he kaungātuí mo e niʻihi kehé mo e founga ke fakafeangai melino ʻi hono fakatangaʻí. (Loma 12:9-21) Naʻe taimi tonu ʻa e faleʻi ko ení ki he kau Kalisitiane ʻi Lomá koeʻuhí naʻe vave ke nau fehangahangai mo e fakafepaki anga-kakaha.

 ʻI ha ngaahi taʻu siʻi ki mui ai, ʻi he 64 T.S. naʻe fakaʻauha ʻe ha vela lahi ʻa e konga lahi ʻo Loma. Naʻe ʻalu holo ha talanoa sasala ko ʻEmipola Nelo naʻá ne fakatupunga ʻa e velá. Fakatatau ki he faihisitōlia Loma ko Tasitusi, naʻe feinga ʻa Nelo ke maluʻi ia ʻaki hono tukuakiʻi ʻa e kau Kalisitiané. ʻOku hā mahino, naʻe iku eni ki hano fakatangaʻi lahi ʻa e kau Kalisitiané. Ko e faleʻi ʻa Paula ki he founga ke kātekina ai ʻa e fakatangá naʻá ne tokoniʻi kinautolu ke fehangahangai mo e taimi faingataʻa ko iá ʻi he tui mo e ngeia. (1 Tesalonaika 5:15; 1 Pita 3:9) Ko ʻenau faʻifaʻitakiʻangá ʻoku tuha ke faʻifaʻitaki ki ai ʻa e kau lotu ʻa e ʻOtuá ʻi he ʻahó ni.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa Lomá.