ʻI Sanuali 27, 2023, ko e kakai tokolahi te nau kātoangaʻi ʻa e ʻAho Fakamanatu Fakavahaʻapuleʻanga ʻo e Tāmate Fakatokolahí. Ko e ngaahi tōʻonga fakalilifu naʻe hoko laka hake ʻi he taʻu ʻe 75 kuo maliu atú te ne ʻai nai koe ke ke fifili pe ko e hā naʻe fakaʻatā ai ʻe he ʻOtuá ke hoko ʻa e Tāmate Fakatokolahí.

•    Ke ʻiloʻi ʻa e meʻa ʻoku leaʻaki ʻe he Tohi Tapú, lau ʻa e kupu “Ko e Hā Naʻe Hoko Ai ʻa e Tāmate Fakatokolahí? Ko e Hā Naʻe ʻIkai Taʻofi Ai ʻe he ʻOtuá?”

 Ko e kakai Siú naʻa nau faingataʻaʻia lahi ʻaupito ʻi hono maʻukovia kinautolu ʻi he Tāmate Fakatokolahí. Ko e laui miliona naʻe ʻosi fokotuʻutuʻu maau ke tāmateʻi kinautolu. Naʻe ʻi ai mo e kau mēmipa ʻi he ngaahi kulupu kehe naʻe tāketiʻi pea tāmateʻi kinautolu lolotonga ʻa e taimi ʻo e Tāmate Fakatokolahí. Naʻe kau heni mo e Kau Fakamoʻoni ʻa Sihová, ʻa ia naʻe fakatangaʻi kinautolu koeʻuhi ko ʻenau ngaahi tui makatuʻunga ʻi he Tohi Tapú.

•    Ke ako lahi ange, lau ʻa e kupu “Ko e Hā Naʻe Hoko ki he Kau Fakamoʻoni ʻa Sihová Lolotonga ʻa e Taimi ʻo e Tāmate Fakatokolahí?”

 Ko e kakai tokolahi ʻoku nau manavahē naʻa toe iku hoko ha meʻa hangē ko e Tāmate Fakatokolahí. Kae mālō, ʻoku tuhu ʻa e Tohi Tapú ki ha kahaʻu ʻa ia ʻe ʻikai ke toe hoko ai ha ngaahi meʻa fakamamahi pehē.

•    “‘He ʻoku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová, ‘ko e ngaahi fakakaukau ʻo e melino, ʻo ʻikai ko ha kovi, ke ʻoatu kiate kimoutolu ha kahaʻu pea mo ha ʻamanaki.’”​—Selemaia 29:11. a

 Ko e ʻamanaki ko ení ʻe fakahoko ia ʻi he taimi ʻe ngāue mai ai ʻa Sihova ko e ʻOtuá ke fakangata ʻa e koví pea fakaleleiʻi ʻa e maumau naʻe tupu mei aí. ʻOku vavé ni ke ne:

•    Toʻo atu ʻa e faʻahinga ʻoku nau fakamamahiʻi anga-fulikivanu ʻa e niʻihi kehé.​—Palōveepi 2:22.

•    Fakamoʻui ʻa e faʻahinga kotoa kuo nau faingataʻaʻiá.​—Fakahā 21:4.

•    Fokotuʻu hake ʻa e faʻahinga kuo maté ke nau moʻui ʻi he māmaní.​—Sione 5:28, 29.

 ʻOku lava ke ke falala ki he ʻamanaki fakafiemālie ʻoku tokonaki mai ʻe he Tohi Tapú. Ke ʻiloʻi ʻa e ʻuhingá, ʻoku mau fakaafeʻi koe ke ke ʻahiʻahiʻi ʻemau polokalama ako Tohi Tapu taʻetotongi mo ha faiakó.