ʻUluaki Kalonikali 16:1-43
16 Ko ia naʻa nau fakahū mai ʻa e ʻAʻake ʻa e ʻOtua moʻoní pea tuku ia ki he loto tēniti naʻe ʻosi fokotuʻu ʻe Tēvita ke tuku aí;+ pea naʻa nau ʻoatu ha ngaahi feilaulau tutu mo ha ngaahi feilaulau feʻinasiʻaki ʻi he ʻao ʻo e ʻOtua moʻoní.+
2 ʻI he hili hono ʻoatu ʻe Tēvita ʻa e ngaahi feilaulau tutú+ mo e ngaahi feilaulau feʻinasiʻakí,+ naʻá ne tāpuakiʻi ʻa e kakaí ʻi he huafa ʻo Sihová.
3 ʻIkai ngata aí, naʻá ne tufa atu ki he kakai ʻIsilelí kotoa, ki he tangata mo e fefine taki taha, ha foʻi mā fuopotopoto, ko ha takaonga teiti,* pea mo ha takaonga fuamelie.*
4 Naʻá ne fakanofo leva ha niʻihi ʻo e kau Līvaí ke nau faifatongia ʻi he ʻao ʻo e ʻAʻake ʻa Sihová,+ ke fakalāngilangiʻi,* fakamālōʻia, pea mo fakahīkihikiʻi ʻa Sihova ko e ʻOtua ʻo ʻIsilelí.
5 Ko ʻĒsafe+ ʻa e ʻulú, pea fika ua atu kiate ia ʻa Sākalaia; pea ko Sieli, Semilamoti, Siheli, Matitaia, ʻEliapi, Penaia, ʻŌpeti-ʻītomi, pea mo Sieli+ naʻa nau tā ʻa e ngaahi meʻalea filó mo e ngaahi haʻapé;+ pea ko ʻĒsafe naʻá ne tā ʻa e ngaahi simipalé,+
6 pea ko Penaia mo Sehesili ʻa e ongo taulaʻeiki naʻá na ifi maʻu pē ʻa e talupité ʻi he ʻao ʻo e ʻaʻake ʻo e fuakava ʻa e ʻOtua moʻoní.
7 Ko e ʻaho ko iá naʻe ʻuluaki faʻu ai ʻe Tēvita ha hiva ʻo e fakamālō kia Sihova pea fakahinohino kia ʻĒsafe+ mo hono fanga tokouá ke nau hivaʻi ia, ʻo pehē:
8 “Fakamālō kia Sihova,+ ui ki hono huafá,ʻAi ke ʻiloa ʻa ʻene ngaahi ngāué ʻi he lotolotonga ʻo e ngaahi kakaí!+
9 Hiva kiate ia, hiva fakahīkihiki* kiate ia,+Fakalaulauloto ki he* kotoa ʻo ʻene ngaahi ngāue fakaofó.+
10 Pōlepole ʻi hono huafa māʻoniʻoní.+
Tuku ke fiefia ʻa e loto ʻo e faʻahinga ʻoku kumi kia Sihová.+
11 Kumi kia Sihova+ mo hono mālohí.
Kumi ki hono fofongá* maʻu ai pē.+
12 Manatua ʻa e ngaahi ngāue fakaofo kuó ne fakahokó,+ʻA ʻene ngaahi maná mo e ngaahi fakamaau kuó ne fakahaá,
13 ʻA kimoutolu ko e hako ʻo ʻIsileli ko ʻene sevānití,+ʻA kimoutolu ngaahi foha ʻo Sēkope, ko ʻene faʻahinga kuo filí.+
14 Ko Sihova ia ko hotau ʻOtuá.+
Ko ʻene ngaahi fakamāú ʻoku ʻi he māmaní kotoa.+
15 Manatua ʻene fuakavá ʻo taʻengata,ʻA e talaʻofa naʻá ne fai* ki ha afeʻi toʻutangata,+
16 ʻA e fuakava naʻá ne fai mo ʻĒpalahamé,+Pea mo e fuakava naʻá ne fai ʻaki ha fakapapau kia ʻAisaké,+
17 ʻA ia naʻá ne fokotuʻu ko ha tuʻutuʻuni kia Sēkopé+Pea ko ha fuakava taʻengata ki ʻIsileli,
18 ʻO pehē, ‘Te u ʻoatu moʻou ʻa e fonua ko Kēnaní,+Ke hoko ko homou tofiʻa kuo vaheʻi.’+
19 Naʻe fai eni ʻi he taimi naʻa mou tokosiʻi aí,ʻIo, ʻo tokosiʻi ʻaupito, pea naʻa mou hoko ko e kau muli ʻi he fonuá.+
20 Naʻa nau ʻalu fano mei he fonua ki he fonua,Mei he puleʻanga ʻe taha ki he puleʻanga ʻe taha.+
21 Naʻe ʻikai te ne fakaʻatā ha tangata ke ne ngaohikoviʻi kinautolu,+Ka naʻá ne valokiʻi ʻa e ngaahi tuʻí+ koeʻuhí ko kinautolu,
22 ʻO pehē, ‘ʻOua naʻa mou ala ki heʻeku kau paní,Pea ki heʻeku kau palōfitá, ʻoua naʻa fai ki ai ha kovi.’+
23 Hiva kia Sihova, ʻa māmani kotoa!
Fanongonongo ʻene fakamoʻuí ʻi he ʻaho ki he ʻaho!+
24 Talaki hono lāngilangí ʻi he lotolotonga ʻo e ngaahi puleʻangá,ʻEne ngaahi ngāue fakaofó ʻi he lotolotonga ʻo e ngaahi kakaí kotoa.
25 He ko Sihová ʻoku lahi mo taau lahi taha ke fakahīkihikiʻí.
ʻOkú ne fakamanavahē lahi ange ʻi he ngaahi ʻotua kehe kotoa pē.+
26 Ko e ngaahi ʻotua kotoa ʻo e ngaahi kakaí ko e ngaahi ʻotua taʻeʻaonga,+Ka ko Sihova ia naʻá ne ngaohi ʻa e langí.+
27 ʻOku ʻi hono ʻaó ʻa e lāngilangi* mo e nāunauʻia;+ʻOku ʻi hono ʻafioʻangá ʻa e mālohi mo e fiefia.+
28 ʻOange kia Sihova ʻa e meʻa ʻoku tuha mo iá, ʻa kimoutolu ngaahi fāmili ʻo e ngaahi kakaí,ʻOange kia Sihova ʻa e meʻa ʻoku tuha mo iá koeʻuhi ko hono lāngilangí mo hono mālohí.+
29 ʻOange kia Sihova ʻa e lāngilangi ʻoku tuha mo hono huafá;+ʻOmi ha meʻaʻofa pea hū ki hono ʻaó.+
Punou hifo* kia Sihova ʻi he teunga toputapu.*+
30 Ke tetetete ʻi hono ʻaó, ʻa e kotoa ʻo māmaní!
Ko e māmaní* kuo fokotuʻu maʻu; heʻikai malava ke toe ueʻi.*+
31 Tuku ke fiefia ʻa e langí, pea tuku ke tomeʻe ʻa e māmaní;+Talaki ʻi he lotolotonga ʻo e ngaahi puleʻangá: ‘Kuo Tuʻi ʻa Sihova!’+
32 Tuku ke ʻuʻulu ʻa e tahí mo e meʻa kotoa ʻokú ne fakafonu iá;Tuku ke fiefia ʻa e ngaahi ngoué mo e meʻa kotoa ʻoku ʻi aí.
33 ʻI he taimi tatau tuku ke kalanga fiefia ʻa e ʻuluʻakau ʻo e vaotaá ʻi he ʻao ʻo Sihová,He ʻokú ne* hāʻele mai ke fakamaau ʻa e māmaní.
34 Fakamālō kia Sihova, he ʻokú ne lelei;+Ko ʻene ʻofa mateakí ʻoku tolonga ʻo taʻengata.+
35 Pea lea ʻo pehē, ‘Fakahaofi kimautolu, ʻe ʻOtua ko homau fakamoʻuí,+Fakatahatahaʻi kimautolu pea fakahaofi kimautolu mei he ngaahi puleʻangá,Koeʻuhi ke mau fakamālō ki ho huafa māʻoniʻoní,+Pea hākahaka ʻi hono fakahīkihikiʻi koé.*+
36 Fakatauange ke fakahīkihikiʻi ʻa Sihova, ko e ʻOtua ʻo ʻIsilelíʻI he kotoa ʻo ʻitānití.’”*
Pea ko e kakaí kotoa naʻa nau pehē, “ʻĒmeni!”* pea nau fakahīkihikiʻi ʻa Sihova.
37 Pea naʻe tuku ai ʻe Tēvita ʻa ʻĒsafe+ mo hono fanga tokouá ʻi he ʻao ʻo e ʻaʻake ʻo e fuakava ʻa Sihová ke hokohoko atu ʻenau faifatongia ʻi he ʻao ʻo e ʻAʻaké,+ ʻo fakatatau ki he founga tuʻumaʻu fakaʻahó.+
38 Ko ʻŌpeti-ʻītomi mo hono fanga tokouá, ko e toko 68, pea mo ʻŌpeti-ʻītomi ko e foha ʻo Situtuní, pea mo Hosa, ko kinautolu ʻa e kau leʻo matapaá;
39 pea ko Sātoki+ ko e taulaʻeikí mo hono ngaahi kaungā-taulaʻeikí naʻa nau ʻi he ʻao ʻo e tāpanekale ʻo Sihová ʻi he potu māʻolunga ʻi Kipioné+
40 ke nau fai maʻu pē ʻa e ngaahi feilaulau tutu kia Sihova ʻi he ʻōlita ʻo e feilaulau tutú, ʻi he pongipongi mo e efiafi, pea ke fai ʻa e meʻa kotoa pē ʻoku hiki ʻi he Lao ʻa Sihová ʻa ia naʻá ne fekauʻi ki ʻIsilelí.+
41 Naʻe kau fakataha mo kinautolu ʻa Hēmani mo Situtuni+ pea mo e toenga ʻo e kau tangata naʻe fili ʻa ia naʻe vaheʻi ʻi honau ngaahi hingoá ke nau fai ʻa e fakamālō kia Sihova,+ koeʻuhi “ko ʻene ʻofa mateakí ʻoku tolonga ʻo taʻengata”;+
42 pea naʻe kau fakataha mo kinautolu ʻa Hēmani+ mo Situtuni ke fakaongo atu ʻa e ngaahi talupité, ngaahi simipalé, pea mo e ngaahi meʻalea naʻe ngāueʻaki ke fakahīkihikiʻi* ʻa e ʻOtua moʻoní; pea ko e ngaahi foha ʻo Situtuní+ naʻa nau tokangaʻi ʻa e matapaá.
43 Pea naʻe ʻalu ʻa e kakaí kotoa ki honau ngaahi ʻapí, pea ʻalu ʻa Tēvita ke tāpuakiʻi ʻa hono fale ʻoʻoná.
Fakamatala ‘i Lalo
^ ʻOku ʻuhinga eni ki he fuaʻi paame tauaki kuo fakafuo ʻo hangē ha keké.
^ ʻOku ʻuhinga eni ki he kālepi tauaki kuo fakafuo ʻo hangē ha keké.
^ Fakafoʻilea, “ke fakamanatua.”
^ Pe “tā fasi.”
^ Pe ngalingali, “Lea fekauʻaki mo e.”
^ Pe “ʻaó.”
^ Fakafoʻilea, “ʻA e lea naʻá ne tuʻutuʻuni.”
^ Pe “ngeia.”
^ Pe ngalingali, “koeʻuhi ko e nāunauʻia hono tuʻunga māʻoniʻoní.”
^ Pe “Lotu.”
^ Pe “Ko e fonua mahú.”
^ Pe “ke luluʻi; ke ʻai ke ngaue.”
^ Pe “kuó ne.”
^ Pe “hākahaka ʻi ho fakahīkihikiʻí.”
^ Pe “Mei ʻitāniti ki ʻitāniti.”
^ Pe “Ke hoko ʻo pehē!”
^ Pe “ngaahi meʻalea ki he hiva.”
