Ko e Tohi Hono Ua ʻa Pita 1:1-21
1 Ko au Saimone Pita, ko ha tamaioʻeiki mo ha ʻapositolo ʻa Sīsū Kalaisi, ko e tohi atu ki he faʻahinga kuo nau maʻu ha tui ʻa ia ʻoku mahuʻinga tatau mo haʻamautolú,* fakafou ʻi he māʻoniʻoni ʻa hotau ʻOtuá pea mo e Fakamoʻui ko Sīsū Kalaisí:
2 Fakatauange ke fakalahi atu kiate kimoutolu ʻa e ʻofa maʻataʻataá mo e melinó ko e meʻa ʻi ha ʻilo totonu+ ki he ʻOtuá pea kia Sīsū ko hotau ʻEikí,
3 he ko hono mālohi fakaʻotuá kuo foaki* mai ai kiate kitautolu ʻa e ngaahi meʻa kotoa pē ʻoku tokoni ki he moʻuí mo e anga-līʻoa fakaʻotuá, fakafou ʻi he ʻilo totonu ki he Tokotaha naʻá ne ui kitautolu+ fakafou ʻi hono lāngilangí mo e ʻulungaanga leleí.
4 Fakafou ʻi he ongo meʻa ko ʻení, kuó ne foaki* mai ai kiate kitautolu ʻa e ngaahi talaʻofa mahuʻinga mo mātuʻaki fungani,+ koeʻuhí ke mou hoko ai fakafou ʻi he ngaahi talaʻofá ni ʻo kaungāʻinasi ʻi he natula fakaʻotuá,+ ʻi hoʻomou hao mei he tuʻunga fakameleʻi ʻo e māmaní ʻa ia ʻoku fakatupunga ʻe he holi fehālaakí.*
5 ʻI he ʻuhinga tofu pē ko ʻení, mou fai ʻa e feinga fakamātoato kotoa pē+ ke tānaki atu ki hoʻomou tuí ʻa e ʻulungaanga lelei,+ ki hoʻomou ʻulungaanga leleí ʻa e ʻilo,+
6 ki hoʻomou ʻiló ʻa e mapuleʻi-kita, ki hoʻomou mapuleʻi-kitá+ ʻa e kātaki, ki hoʻomou kātakí ʻa e anga-līʻoa fakaʻotua,+
7 ki hoʻomou anga-līʻoa fakaʻotuá ʻa e manavaʻofa fakatokoua, ki hoʻomou manavaʻofa fakatokouá ʻa e ʻofa.+
8 He kapau ʻoku ʻiate kimoutolu ʻa e ngaahi meʻa ko ʻení ʻo fonu mahuohua, te nau taʻofi ai kimoutolu mei he hoko ʻo ʻikai longomoʻui pe taʻefua+ ʻi he fekauʻaki mo e ʻilo totonu ki hotau ʻEiki ko Sīsū Kalaisí.
9 He kapau ʻoku ʻikai maʻu ʻe ha taha ʻa e ngaahi meʻá ni, ko e tokotaha ko iá ʻoku kui, ʻo ne tāpuni hono matá mei he māmá,*+ pea kuo hoko ʻo ngalo ʻiate ia ʻa hono fakamaʻa ia mei heʻene ngaahi angahala+ ʻi he kuohilí.
10 Ko ia ai, fanga tokoua, ʻai ke toe ʻāsili ange hoʻomou tōtōivi ʻi hono ʻai ke papau homou uí+ mo homou filí, he kapau ʻoku mou hanganaki fai ʻa e ngaahi meʻá ni ʻe ʻikai ʻaupito faifai ange pea mou hinga.+
11 Ko hono moʻoní, ʻi he foungá ni ʻe tāpuakiʻi lahi ai kimoutolu pea te mou hū ki he Puleʻanga+ taʻengata ʻa hotau ʻEiki mo e Fakamoʻui ko Sīsū Kalaisí.+
12 ʻI he ʻuhinga ko ʻení ʻoku ou mateuteu maʻu pē ke fakamanatu atu kiate kimoutolu ʻa e ngaahi meʻá ni, neongo ʻoku mou ʻilo ki ai pea ʻoku mou ʻosi tuʻu mālohi ʻi he moʻoni ʻa ia ʻoku ʻiate kimoutolú.
13 Ka ʻoku ou lau ʻoku totonu, lolotonga ʻeku kei ʻi he tāpanekale*+ ko ení, ke u toe ʻoatu kiate kimoutolu ha ngaahi fakamanatu,+
14 ʻi he ʻiloʻi ʻi he lolotonga ʻeku fai iá kuo vavé ni ke toʻo atu ʻa hoku tāpanekalé, ʻo hangē tofu pē foki ko ia ko hono fakamahino mai kiate au ʻe hotau ʻEiki ko Sīsū Kalaisí.+
15 Te u fai maʻu pē hoku tūkuingatá koeʻuhí ʻi he hili ʻeku mavahé, ke malava ke mou fakamanatu* kiate kimoutolu ʻa e ngaahi meʻá ni.
16 Naʻe ʻikai moʻoni ko e muimui ki he ngaahi talanoa loi kuo faʻufaʻu olopotó naʻa mau fakaʻilo atu ai kiate kimoutolu ʻa e mālohi mo e ʻi heni* ʻa hotau ʻEiki ko Sīsū Kalaisí, ka ʻi hono kehé, ko e kau fakamoʻoni sio tonu kimautolu ʻi hono nāunaú.+
17 He naʻá ne maʻu mei he ʻOtuá ko e Tamaí ʻa e ngeia mo e lāngilangi, ʻi he taimi naʻe fakahaaʻi ai kiate ia ʻe he lāngilangi nāunauʻiá ʻa e ngaahi lea* hangē ko ʻení: “Ko hoku ʻAló eni, ʻa hoku ʻAlo ʻofeiná, ʻa ia ko au tonu kuó u hōifua aí.”+
18 ʻIo, ko e ngaahi lea ko ení naʻa mau fanongo ai ʻi heʻene ongo mai mei hēvani lolotonga ʻemau ʻi he moʻunga tapú fakataha mo ia.
19 Ko ia kuo hoko ai ʻa e lea fakaekikité ʻo toe papau lahi ange kiate kitautolu, pea ko ha meʻa lelei ia ʻa hoʻomou tokanga ki ai ʻo hangē ko ha fai ki ha maama+ ʻoku ulo ʻi ha feituʻu fakapoʻuli (kae ʻoua ke mafoa ʻa e atá pea hopo hake ha foʻi fetuʻu ʻaho+) ʻi homou lotó.
20 He ʻoku mou tomuʻa ʻiloʻi eni, ʻoku ʻikai ha kikite ʻa e Folofolá ʻe tupu mei ha fakaʻuhinga fakafoʻituitui.
21 He naʻe teʻeki ʻi ai ha taimi ʻe ʻomi ai ha kikite ʻi he tuʻutuʻuni ʻa e tangatá,+ ka naʻe lea mei he ʻOtuá ha kau tangata ʻi hono ueʻi* kinautolu ʻe he laumālie māʻoniʻoní.+
Fakamatala ‘i Lalo
^ Pe “ʻa ia ko e monū tatau ia mo haʻamautolú.”
^ Pe “foaki taʻetotongi.”
^ Pe “foaki taʻetotongi.”
^ Pe “holi pangó.”
^ Pe ngalingali, “ʻoku kui mo sio-nounou.”
^ Pe “tēniti,” ʻa ia, ko hono sino fakaekakanó.
^ Pe “hueʻekina.”
^ Sio ki he Lea mo Hono ʻUhinga.
^ Fakafoʻilea, “ha leʻo.”
^ Fakafoʻilea, “fataki; taki.”
