Ndikuwiya mutawuni ya La Ceiba ku Honduras. Ini ndenga wakumaliya mu banja la ŵana ankhondi ndipu munthulumi ndengapu ndija. Ini pe ndini ndenga wambuwu pa banja lidu, ndipu tajanga muchigaŵa chakofya ukongwa kweniso tenga akavu. Tingwamba kusuzgika ukongwa ada ŵati atayika pa ngozi kuntchitu. Pa nyengu iyi ndipu nde ndi vyaka vinayi.

Ama ayesesanga kuti atiphwere tosi, kweni kanandi aŵangavi ndalama zakukwana kuti andiguliyeku malaya. Asani kutunya vuwa, ndapimanga chifukwa ndengavi vakuvwala va mphepu.

Ndichikuwa ndingusambira Chineneru Chamanja cha ku Honduras. Chifukwa cha chineneru chenichi, ndingwamba kukambiskana ndi ambuwu anyangu. Kweni ama ndi azichi ŵangu achiziŵanga cha chineneru ichi, yiwu agwiriskiyanga ŵaka ntchitu masayini ngamanavi ŵaka ngo tingwesa kupanga panyumba kuti akambiskanengi nani. Kweni ama andiyanjanga ukongwa ndipu andivikiliyanga ku vinthu viheni. Chinanga kuti yiwu aziŵanga masayini ngamanavi, kweni anditcheŵesanga kuti ndingamwanga moŵa cha pamwenga kukweŵa foja. Chifukwa cha phamphu lawu, ndiwonga ukongwa kuti ndikukuliyamu waka kwambula kutimbanyizgikapu ndi vinthu venivi.

Ndeche munamana, ama akanga nani ku Tchalitchi la Katolika, kweni palivi cho ndavwanga chifukwa pengavi yo wandifwatuliyanga vo akambanga. Chifukwa cha venivi ndinguleka kuluta kutchalitchi ndati ndakwanisa vyaka 10. Kweni ndakhumbanga mbwenu kuziŵa vinandi vakukwaskana ndi Chiuta.

Mu 1999, nde ndi vyaka 23, ndingukumana ndi munthukazi munyaki wa ku United States yo wenga wa tchalitchi cha Inter-community Church of God. Iyu wandisambizanga Bayibolu kweniso Chineneru Chamanja cha ku America. Ndingukondwa ukongwa ndi vo ndingusambira kutuliya mu Bayibolu mwakuti ndinguŵanaŵana kuti ndije mliska. Mwaviyo, ndigusamiya ku Puerto Rico kuti nkhasambiri va Chikhristu pa sukulu yinyaki ya ambuwu. Ndati ndawere ku La Ceiba mu 2002, ndingwambisa ntchalitchi la ambuwu mwakuwovyeka ndi anyangu anyaki. Yumoza mwa anyangu ŵenaŵa zina laki Patricia, wanguzija muwolu wangu.

Kutchalitchi kwidu ndapharazganga mu Chineneru Chamanja cha ku Honduras, ndalongonga vithuzi va nkhani za mu Bayibolu kweniso ndachitanga vakuyeruzgiyapu va nkhani za mu Bayibolu kuti ambuwu avwisi. Ndayendiyanga so ambuwu anyaki wo ajanga mumatawuni ngapafupi kuti nkhaŵachiskengi kweniso nkhaŵawovyengi asani akumana ndi masuzgu. Ndingupangapu so ulendu wa umishonale kuluta ku United States kweniso ku Zambia. Kweni kukamba uneneska, pa nkhani ya Bayibolu ndaziŵanga vinandi cha. Ini ndaŵasambizanga ŵaka vo ndingusambizika kweniso vo ndavwangapu pa vithuzi. Uneneska ngwakuti, nani ndenga ndi mafumbu nganandi

Zuŵa linyaki anthukazi atatu a mutchalitchi lidu angwamba kuwandisa maboza ngakukwaskana ndi ini. Yiwu akambanga kuti nde muloŵevu kweniso ndibula. Ndinguguŵa ukongwa kweniso ndingukwiya. Pechendajumphi nyengu, ini ndi Patricia tingutuwa tchalitchi ili.

Kanandi Akaboni aku Yehova azanga kunyumba kwidu, kweni ini ndi Patricia takhumbanga cha kukambiskana nawu. Kweni tati tatuwa tchalitchi lidu, Patricia wanguzomera kwamba kusambira Bayibolu ndi Thomas kweniso muwolu waki Liccy. Ndinguzizwa ukongwa kuwona kuti chinanga kuti yiwu ŵenga ambuwu cha, kweni achiziŵanga chineneru chamanja. Mwaviyo, nani ndingwamba kusambira.

Tingusambira kwa myezi yinandi mwakugwiriskiya ntchitu mavidiyo nga Chineneru Chamanja cha ku America. Kweni anyidu anyaki ŵaŵi ati atipusika kuti Akaboni aku Yehova asopa ŵanthu anyaki, tinguleka kusambira Bayibolu. Chinanga kuti Thomas wangupereka ukaboni wakuti mlongozgi wa Akaboni aku Yehova ndi munthu cha, ndingumugomezga cha.

Pati pajumpha nyengu yimanavi, Patricia wangwamba kutama nthenda yakusuzgika maŵanaŵanu. Iyu wangupemphera kwaku Chiuta kuti waŵatumi so Akaboni aku Yehova kuti azi so. Pati pajumpha nyengu yimanavi, munthukazi munyaki yo tajanga nayu pafupi yo wenga Kaboni waku Yehova wanguza kuziwona Patricia ndipu wangukamba kuti wamukambiyengi Liccy kuti wazi wazimuwoni. Liccy wangulongo nadi kuti wenga bwezi chayilu. Iyu wazanga kuziwona Patricia sabata yeyosi ndipu wamuchiskanga kweniso wasambiranga nayu Bayibolu. Kweni ini ndaŵakayikiyanga mbwenu Akaboni aku Yehova.

Mu 2012, Akaboni aku Yehova angugwira ntchitu yapade yakugaŵiya vidiyo ya kapepala kamutu wakuti Kumbi Mungayanja Kuziŵa Uneneska? ya Chineneru Chamanja cha ku Honduras. Liccy wangulondaku vidiyo yeniyi. Ndati ndayiwonere ndinguzizwa kuti visambizu vinandi vo ndasambizanga nge chakuti kwe motu wa helu ndipuso chakuti mzimu wa munthu utufwa cha,venga vakutuliya mu Bayibolu cha.

Sabata yakulondopu, ndinguluta ku Nyumba ya Ufumu ya Akaboni aku Yehova kuti nkhakumani ndi Thomas. Ndingumukambiya kuti ndikhumba kwamba kusambiza ambuwu uneneska wa mu Bayibolu, kweni ndikhumba kuja Kaboni cha. Ini ndapenjanga kwambisa tchalitchi langu la ambuwu. Thomas wangundiwonga kweni wangundilongo lemba la Aefeso 4:5, lo likamba kuti mpingu wachikhristu ukhumbika kuja wakukoliyana.

Thomas wangundipaska so vidiyo ya mutu wakuti Akaboni aku Yehova Alongo Chivwanu, Chigaŵa 1 Kutuwa M’mdina, ya Chineneru Chamanja cha ku America. Vidiyo yeniyi yilongo mo anthulumi anyaki angufufuziya mu Bayibolu kuti aziŵi uneneska wa visambizu vakukhumbika ukongwa. Ndichiwonere vidiyo yeniyi, ndinguvwisa mo anthulumi ŵenaŵa avwiyanga. Mwakuyanana ndi yiwu, nani ndapenjanga uneneska. Chifukwa cha vidiyo yeniyi, ndingusimikiza kuti Akaboni aku Yehova asambiza nadi uneneska chifukwa vo yiwu agomezga vituliya mu Bayibolu. Mwaviyo, ndingwamba so kusambira Bayibolu, ndipu mu 2014, ini ndi Patricia tingubatizika ndi kuja Akaboni aku Yehova.

Nditanja mpigu wa Akaboni aku Yehova chifukwa ŵanthu ŵaki mbatuŵa nge mo Chiuta waliri mtuŵa. Yiwu mbatuŵa mu vakulongoro vawu kweniso achita vinthu umampha ndi anyawu. Yiwu mbachimangu ndipu achiskana. Yiwu mbakukoliyana kweniso asambiza fundu zauneneska zakuyanana pacharu chosi kutuliya mu Bayibolu.

Ndikondwa ukongwa chifukwa ndaziŵa vo Bayibolu lisambiza. Mwakuyeruzgiyapu, ndikusambira kuti Yehova ndi Chiuta Wanthazizosi ndipuso ndiyu wakwenere kulamuliya charu chosi. Iyu watanja wosi ambuwu ndi wo atuvwa. Ndikondwa kuti Chiuta watindiyanja. Ndikusambira so kuti charu chazamuja paradayisu kweniso taŵanthu tazamukondwa ndi umoyu wambula masuzgu. Ndilindizga venivi mwalinweka!

Ini ndi Patricia tisambiza ambuwu anyidu Bayibolu. Sonu tisambira Bayibolu ndi ŵanthu anyaki wo ŵe mutchalitchi lo tengamu kali. Kweni mwakupambana ndi mo ve nge pa nyengu yo ndenga mliska, sonu ndilivi so mafumbu pa vo ndisambiza. Ndikumukika mafumbu ngangu chifukwa chakusambira Bayibolu ndi Akaboni aku Yehova.