ASANI namwi munthu yo mwamuyanjanga wakutayika, mungavwisa mo munthu wasuzgikiya mumtima chifukwa cha chitima. Ndipu venivi vichitiska kuti wachitengi phukwa kweniso kujiwona kuti ngwakutondeka. Ndipuso nyengu zinyaki mwakwiyanga, kujimba mlandu kweniso kuchita mantha. Ndipu panyaki mungwamba kuŵanaŵana kuti umoyu ngwambula phindu.

Kweni ziŵani kuti kuchita chitima kung’anamuwa kutondeka cha. Vilongo waka mo mwamuyanjiyanga munthu yo. Kweni kumbi vingachitika kuti muyambi so kukondwa?

Chinanga kuti vingawoneka nge kuti chitima chinu chilekengi kumala, kweni mungachiskika ukongwa asani mungagwiriskiya ntchitu masachizgu yanga:

MUCHITENGI CHITIMA

Munthu weyosi wachita chitima mwakupambana ndi munyaki. Kuliya kungakuwovyani asani mwasuzgika maŵanaŵanu. Vanessa, yo wazumbulika kali wangukamba kuti: “Ndakhumbanga kuti ndiliyengi waka kuti chitima cho ndenga nachu chimali.” Sofía, yo mvurwa waki wakutayika mwamabuchibuchi wangukamba kuti: “Kujaliya waka kuŵanaŵaniya vo vikuchitika, nkhwakupweteka ukongwa. Kwenge kusuka pa chilonda. Chinanga kuti utuvwa kupweteka ukongwa pa nyengu iyi, kweni kutovya kuti chilonda chipo.

 MUKAMBENGI MAŴANAŴANU NGINU KWENISO MO MUVWIYA

Mphakuvwika kuti nyengu zinyaki mungakhumba kuja pakumwija. Kweni kuja ndi chitima kuyanana waka ndi kunyamuwa mwija katundu muzitu ukongwa. Jared, wa vyaka 17 yo awiski akutayika, wangukamba kuti: “Ndingukambiyaku anyangu mo ndavwiyanga mumtima. Ndakayikiyanga asani ndinguchita nadi mwazeru, kweni vinguja umampha kuti anyangu anguziŵa mo ndavwiyanga.” Janice, yo wazumbulika mu nkhani yakwamba, wangukamba kuti: “Ndinguchiskika ukongwa ndati ndakambiyaku anyangu. Yiwu angundivwisa, ndipu ndatingi ndifiskengi cha kukunthiyapu ndija.”

MUZOMEREZENGI ASANI ANYINU AKHUMBA KUKUWOVYANI

Dokotala munyaki wangukamba kuti: “Asani munthu yo we ndi chitima wazomereza kuti anyaki kweniso achibali ŵaki amuwovyi pa nyengu yo mubali waki watayikiya waka, vitimuwovya kukunthiyapu ndipuso kuti chitima chimali.” Mwaviyo, mukambiyengi anyinu vo angachita kuti akuwovyeni, chifukwa asani mungaleka kuchita viyo yiwu angaziŵa cha mo angakuwovyiyani.—Nthanthi 17:17.

MUNDERENGI KUFUPI NDI CHIUTA

Tina wangukamba kuti: “Mulumu wangu wati watayika mwamabuchibuchi ndi nthenda ya khansa, ndatingi ndimukambiyengi so cha masuzgu ngangu. Mwaviyo, ndingwamba kukambiya Chiuta chechosi! Zuŵa lelosi ndayambanga kumupempha kuti wandiwovyi kuti vinthu vindiyende umampha pa zuŵa lo. Ndipu Chiuta wangundiwovya munthowa zinandi zo ndingafiska cha kuzizumbuwa.” Tarsha yo wenga ndi vyaka 22 pa nyengu yo anyina atayikanga wangukamba kuti: “Kuŵerenga Bayibolu zuŵa lelosi ndiku kwandipembuzganga. Kwandiwovyanga kuti ndiŵanaŵaniyengi vinthu vamampha.”

MUŴANAŴANIYENGI VA CHIYUKA

Tina wangukamba so kuti: “Kukamba uneneska, chilindizga chakuti akufwa azamuyuka chandipembuzganga cha, chifukwa ndakhumbanga mulumu wangu. Ndipu ŵana ŵangu nawu apenjanga awusewu. Kweni pati pajumpha vyaka vinayi, ndipu ndingwamba kugomezga kuti akufwa azamuyuka. Chigomezgu chenichi chenga nge ndondowa yakutaska umoyu wangu. Mu maŵanaŵanu ngangu, ndija nge nditimuwona kuti wayuskika, ndipu venivi vitindiwovya kuja ndi chimangu kweniso likondwa.”

Chitima chingamala nyengu yeniyo cha. Kweni vo Vanessa wangukamba, namwi vingakuwovyani. Iyu wangukamba kuti: “Pakwamba mungaŵanaŵana kuti vinthu vikuyendiyeningi so cha, kweni kamana ndi kamana muwonengi kuti vayamba so kwenda umampha.”

Chinanga kuti mulekengi cha kumusoŵa munthu yo wakutayika, kweni ziŵani kuti umoyu we ndi phindu. Ndi chovyu chaku Chiuta, mungaja ndi umoyu wamampha kweniso ndi mabwezi ngamampha. Ndipu pambula kuswera, Chiuta wazamuyuska wosi wo akutayika. Iyu wakhumba kuti muzije so limoza ndi akwanjiwa ŵinu. Pa nyengu iyi mwazamuja so cha ndi chitima mpaka muyaya!