“Asani ŵanthu aheni abuka nge dondu kweniso asani ŵanthu wosi wo achita viheni abiriŵira, achita viyo kuti aparanyiki kwamuyaya.”—SALIMO 92:7.

Nge mo tingusambiriya mu nkhani yaluta, vinthu viheni viluta panthazi. Venivi vitenere cha kutiziziswa. Ve viyo, chifukwa Bayibolu lingukambiya limu pa 2 Timote 3:1-5 kuti “mu mazuŵa ngakumaliya” ŵanthu azamuja aheni ukongwa. Kumbi ting’anamuwanji asani tikamba kuti mazuŵa ngakumaliya? Ting’anamuwa mazuŵa ngakumaliya nga charu ichi cho ŵanthu ŵaki akhumba cha kuvwiya Chiuta. Pambula kuswera yapa, Chiuta watuzgengepu ŵanthu wo akana kusintha nkharu zawu ziheni. Pavuli paki, ŵanthu amampha pe wo avwiya Chiuta ndiwu azamuja ndi umoyu. “Ŵanthu arunji azamulonde charu chapasi, ndipu azamuja mwenimo kwamuyaya.”—Salimo 37:29.

“Chiuta yo wapereka chimangu wazamuphwanya Satana.”—AROMA 16:20.

Asani Satana, angelu aheni kweniso ŵanthu aheni azituzgikapu, charu chosi chapasi chazamuzaza ndi  chimangu pe. Mlengi widu walayizga kuti: ‘Palivi munthu yo wazakukuwofyani.’—Mika 4:4.

“Hema laku Chiuta le pakati pa ŵanthu . . . Iyu wazamuleska masozi ngosi mumasu mwawu, ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi.”—CHIVUMBUZI 21:3, 4.

Masuzgu kweniso matenda vazamumala pakuti Chiuta wazamutuzgapu vinthu vosi vo vikunangika chifukwa chaku Satana, Adamu, Heva kweniso ubudi wo tenawu. Mwaviyo, “nyifwa yazamuŵaku so cha.” Ŵanthu wo atanja Mlengi kweniso kumuvwiya azamuja ndi umoyu kwamuyaya. Kweni kumbi azamuja pani?

“Chipululu ndipuso charu chakumira, vazamukondwa, ndipu chipalamba chazamukondwa kweniso kuchita maluŵa.”—YESAYA 35:1.

Asani Chiuta wazituzgapu ŵanthu aheni, charu chazamukuŵa paradayisu! Charu chazamuja ndi malu nganandi ngakutowa kweniso minda ndipu chazamuja ndi vakurya vinandi. (Salimo 72:16) Nyanja ndipuso misinji yazamuja yakutowa kweniso mwazamukuŵa vamoyu vinandi. Ŵanthu azamukumbuka so cha kuti charu chenga “chakunangika!” Ŵanthu azamuzenga nyumba zawu ndi kujamu ŵeneku. Ndipu palivi yo wazamusoŵa pakuja, wazamuja ndi nja pamwenga kuŵa mukavu.—Yesaya 65:21, 22.

“Kwazamuja chiyuka.”—MACHITIDU 24:15.

Kumbi mukhumba kuziwona so abali ŵinu wo akutayika? Chiuta wanthazizosi wazakuŵayuska mu Paradayisu pacharu chapasi. Mwazakuŵaziŵa ndipu nawu azakukuziŵani. Aŵanaŵaniyani waka mo yimwi ndipuso yiwu mwazamukondwe! Ntchifukwa wuli tisimikiza kuti venivi vazamuchitika? Chifukwa mu Bayibolu mwe vakuwoniyapu va arara kweniso ŵana wo anguyuskika ndipu anguja so limoza ndi mabanja ngawu. Kanandi Yesu wayuskanga ŵanthu akufwa ŵanthu anandi achiwona.—Luka 8:49-56; Yohane 11:11-14, 38-44.