Mwana munthukazi wa vyaka pafupifupi 4 wanguwona josi lichikwera muchanya kutuwa ku fakitale. Iyu wanguwona kuti josi ili lingukuwa ukongwa, ndipu lawonekanga nge mtambu. Pavuli paki, wanguŵanaŵana kuti chilatu cha fakitale iyi nkhupanga mitambu. Kuleka kuvwisa nkhani yimana nge iyi kungaja waka kwakusekesa. Kweni asani taleka kuvwisa nkhani yikulu, vingakwasa umoyu widu. Mwakuyeruzgiyapu, asani tingaŵerenga uheni zina la munkhwala, vingachitisa kuti tikumani ndi masuzgu ngakulu.

Kuleka kuvwisa nkhani zakukwaskana ndi Chiuta kungazisa masuzgu ngakulu ukongwa. Mwakuyeruzgiyapu, ŵanthu anyaki anguvwisa cha vo Yesu wasambizanga. (Yohane 6:48-68) M’malu mwakuti asambiri vinandi, akananga vosi vo Yesu wasambizanga. Yiwu angutaya mwaŵi ukulu!

Kumbi muŵerenga Bayibolu kuti likulongozeningi? Asani ndi viyo, mbwenu muchita umampha. Kweni, kumbi vingachitika kuti nyengu zinyaki muleki kuvwisa vo mwaŵerenga? Ŵanthu anandi vitiŵachitikiya. Tiyeni tiwoni vinthu vitatu vo ŵanthu anandi aleka kuvwisa.

• Ŵanthu anyaki avwisa cha dangu la m’Bayibolu lakuti “uwopengi Chiuta wauneneska.” Yiwu aŵanaŵana kuti Chiuta wakhumbika kumuwopa mwakujumpha mwesu. (Wakutaula 12:13) Kweni Chiuta wakhumba cha kuti ŵanthu wo asopa iyu amuwopengi viyo. Iyu watiti: “Ungachitanga mantha cha, chifukwa nde nawi. Ungafipanga mtima cha pakuti ndini Chiuta waku. Ndikukhwimisengi, hinya, ndikuwovyengi.” (Yesaya 41:10) Kopa Chiuta kung’anamuwa kumutumbika ukongwa.

• Ŵanthu anyaki avwisa cha mazu nga m’Bayibolu yanga: “Chechosi che ndi nyengu yaki, . . . pe nyengu yakuwiya ndi nyengu yakufwiya.” Asani aŵerenga mazu yanga, aŵanaŵana kuti Chiuta wakulembe limu zuŵa lakuwiya ndi lakufwiya la munthu weyosi. (Wakutaula 3:1, 2) Kweni mavesi yanga ngakamba waka mo umoyu widu uliri kweniso kuti weyosi wafwengi. Mazu Ngaku Chiuta ngakamba so kuti vo tisankha vingachitisa kuti tije ndi umoyu utali pamwenga tifwi liŵi. Mwakuyeruzgiyapu, m’Bayibolu tiŵerenga kuti: “Kopa Yehova kusazgiyaku umoyu.” (Nthanthi 10:27; Sumu 90:10; Yesaya 55:3) Kumbi venivi vingachitika wuli? Mwakuyeruzgiyapu, asani titumbika Mazu Ngaku Chiuta, tingachita cha mijalidu yiheni nge kuroŵe ndi ureŵi vo vingachitisa kuti titamengitamengi.—1 Ŵakorinte 6:9, 10.

• Ŵanthu anyaki asani aŵerenga mazu ngakuti kuchanya ndi charu chapasi “avisungiya motu,” awona kuti Bayibolu likamba za motu chayiwu, ndipu aŵanaŵana kuti Chiuta wazamunanga charu chapasi cho tijamu. (2 Petro 3:7) Kweni Chiuta walayizga kuti wazamuzomereza cha kuti charu chapasi chinangiki. Chiuta “wakuŵika charu chapasi pa chiŵanja chakukho. Chituzgikengepu cha pamalu ngaki muyaya ndi muyaya.” (Sumu 104:5; Yesaya 45:18) Mugonezi uheni wunu tilimu ndiwu wazamutuzgikapu mwakuti vazamuja nge kuti wanangika ndi motu. Kweni charu chayichu chazamunangika cha. Ndipu mazu ngakuti kuchanya, ngangang’anamuwa mude, kuchanya ko kwe nyeyezi pamwenga malu ngo kuja Chiuta. Vinthu vosi venivi vazamubwangandulika cha.

Nge po mwawone mu vakuyeruzgiyapu vo takonkhosa pachanya yapa, kanandi ŵanthu avwisa cha vo aŵerenga m’Bayibolu. Kweni ntchifukwa wuli Chiuta wazomereza kuti venivi vichitikengi? Ŵanthu anyaki angaŵanaŵana kuti: ‘Asani Chiuta we ndi zeru ukongwa ndipuso waziŵa chechosi, watingi watipasengi buku lo likulembeka mwakuvwika umampha kuti weyosi walivwisengi asani waŵerenga. Ntchifukwa wuli wakuleka kuchita viyo?’ Tiyeni tiwoni vifukwa vitatu vo kanandi ŵanthu aleke kulivwisa Bayibolu.

1.   Bayibolu likulembeka kuti ŵanthu akujiyuyuwa ndipuso wo akhumba kusambira ndiwu alivwisengi umampha. Yesu wanguti kwa Awisi: “Ada, Ambuya akuchanya ndi charu chapasi, nditikuthamikani pa masu pa ŵanthu, chifukwa mwabisiya vinthu ivi ŵanthu azeru ndi akusambira ndipu mwavumbuliya ŵana anamana.” (Luka 10:21) Bayibolu likulembeka mu nthowa yakuti ŵanthu wo ŵe ndi maŵanaŵanu ngakwenere alivwisengi umampha. Kanandi ŵanthu akujikuzga atilivwisa cha Bayibolu. “Ŵanthu azeru ndi akusambira” ndiwu atanja kuja ndi jalidu lenili. Kweni ŵanthu wo mbakujiyuyuwa ndipuso wo akhumbisisa kusambira nge mo “ŵana anamana” achitiya, ndiwu avwisa asani aŵerenga Mazu Ngaku Chiuta. Ivi vilongo kuti Chiuta wakulemba Bayibolu mwalusu ukongwa!

2. Bayibolu likulembeke ŵanthu wo akhumbisisa kuti Chiuta waŵawovyi kulivwisa. Yesu wangukamba kuti ŵanthu akhumbika chovyu kuti avwisi umampha vo iyu wasambizanga. Kumbi chovyu chaki ndi nichi? Yesu wangukonkhosa kuti: “Wakukuwovyani mweniyo ndi mzimu wakupaturika, wo Ada azamutumiza mu zina langu, mweniyo ndiyu wazakukusambizani vinthu vosi.” (Yohane 14:26) Mwaviyo, Chiuta wagwirisiya ntchitu nthazi yaki ya mzimu wakupaturika kuti wawovyi ŵanthu kuvwisa vo aŵerenga m’Bayibolu. Kweni Chiuta wapereka cha mzimu waki ku ŵanthu wo aleka kumuthemba kuti waŵawovyi. Ndichu chifukwa chaki yiwu awona kuti Bayibolu ndakusuzga. Mzimu wakupaturika utovya so Akhristu wo atiliziŵa umampha Bayibolu kuti awovyi ŵanthu wo akhumba nadi kuziŵa Bayibolu.—Machitidu 8:26-35.

3. Ŵanthu angavwisa nkhani zinyaki za m’Bayibolu pa nyengu yakwenere. Mwakuyeruziyapu, mchimi Danyele wangukambirika kuti walembi uthenga wakukwaskana ndi vo vazamuchitika kunthazi. Mungelu wangumukambiya kuti: “Danyele, sunga mazu yanga mwachisisi, ndipu umati buku ili mpaka nyengu ya umaliru.” Kwa vyaka vinandi, ŵanthu aŵerenganga buku laku Danyele kweni alivwisisanga cha. Chinanga ndi Danyele nayu, wanguvwisisa cha vinthu vinyaki vo wangulemba. Iyu wanguti: “Ndinguvwa kweni ndinguvwisa cha.” Pavuli paki, ŵanthu angwamba kuvwisa uchimi waku Chiuta wo ungulembeka ndi Danyele. Kweni angwamba kuchita ivi pa nyengu yakwenere yo Chiuta wangusankha. Mungelu wangukamba kuti: “Luta Danyele, chifukwa mazu yanga ngatenere kusungika mwachisisi ndi kungamata mpaka nyengu ya umaliru.” Ndiyani yo wangavwisa uthenga waku Chiuta? “Palivi munthu weyosi muheni yo wazakungavwisa mazu yanga, kweni wo mbazeru ndiwu azakungavwisa.” (Danyele 12:4, 8-10) Mwaviyo, Chiuta wavumbuwa vo nkhani zinyaki za m’Bayibolu zing’anamuwa pa nyengu yakwenere.

Kumbi nyengu yinyaki Akaboni aku Yehova angulivwisa umampha cha Bayibolu chifukwa chakuti nyengu yaki yenga yechendakwani? Hinya. Kweni nyengu yati yakwana kuti Chiuta wavumbuwi vinthu, Akaboni angusintha mwaliŵi mo avwiyanga uneneska. Yiwu awona kuti asani achita viyo, ndikuti ayezga akusambira aku Yesu wo asinthanga mwaliŵi asani Yesu waŵapasa ulongozi.—Machitidu 1:6, 7.

Vo mwana yo tamuzumbuwa pakwamba waŵanaŵananga vakukwaskana ndi mo mitambu yipangikiya, yingaja nkhani yimana. Kweni vo Bayibolu lisambiza vakukhumbika ukongwa kwaku yimwi. Weyosi watenere kuvwisa uthenga wa m’Bayibolu asani waŵerenga Bayibolu pakuyija. Mwaviyo, mupemphengi ŵanthu kuti akuwovyeni kuvwisa vo muŵerenga. Kumbi mungapempha ŵanthu naŵa? Mupemphengi ŵanthu akujiyuyuwa, ŵanthu wo athemba mzimu wakupaturika waku Chiuta kuti uŵawovyi kulivwisa Bayibolu kweniso wo asimikiza kuti tija mu nyengu yo Chiuta wakhumba kuti tilivwisengi Bayibolu kuluska mo tachitiyanga kali. Mungasweranga cha kukambisana ndi Akaboni aku Yehova pamwenga kuŵerenga nkhani zawu pa webusayiti ya jw.org/tog. Bayibolu lilayizga kuti: “Asani udana kuvwisa vinthu . . . , wazakumuziŵa nadi Chiuta.”—Nthanthi 2:3-5.