Kwambiya pa 19 January mpaka pa 1 February, 2024, ku South Korea kunguchitika masaza ngakupambanapambana nga mu 2024 mu matawuni nganayi. Masawuzandi nganandi nga ŵanthu wo achita masaza, atolankhani, ndipuso ŵanthu akuziwonere masaza akutuliya mu vyaru vakujumpha 70, ŵenga pa masaza yanga. Akaboni aku Yehova akujumpha 2,600 anguchitaku upharazgi wapade pa nyengu iyi. Timashelufu tinguŵikika mu malu 34, ndipu mabuku ngakukonkhoska Bayibolu ngenga mu vineneru vinayi.

Mnyamata munyaki wa chineneru cha Chitchayinizi Mandarini wanguza po penga abali ŵaŵi, ndipu wangukamba kuti wawona timashelufu tidu mu malu nganandi. Wati wawona chikwangwani cho chingulembeka vakukwaskana ndi banja lalikondwa pa kashelufu kanyaki, wanguŵanaŵana kuti wami kuti waziŵi vinandi. Abali angumukonkhoske mo wangapangiya dawunilodi pa jw.org kabuku kakuti Banja Linu Likhoza Kuja Lalikondwa mu Chitchayinizi Mandarini. Nyengu yeniyo wangujura webusayiti yidu pa foni yaki ndipu wanguŵawonga abali chifukwa cha kumuwovya.

Banja linyaki la ku Ukraine ndilu lingwamba kupharazgiya mnyamata uyu mwamwaŵi. Chifukwa chakuti banja ili latondekanga kulongoro chineneru chaki, lingugwiriskiya ntchitu translation app kuti likambiskani nayu. Po akambiskananga, mnyamata uyu wangulongo banja ili chithuzi cha vinthu vo vingunangika ndi mabomba mu tawuni yakwawu. Banja ili lingumulenge lisungu ndipu lingumuŵerenge lemba mu Bayibolu lo likamba kuti nkhondu yazamumala. Wanguchiskika ukongwa wati waŵerenga layizgu la mu Bayibolu mu chineneru chaki. Angupangana kuti azikumani so kuti azilutirizgi kukambiskana.

Mzichi munyaki zina laki In-Sook wangupharazgiya msungwana munyaki yo wachita masaza mu ayisi ndipuso anyina a ku Finland. Iyu wanguŵapharazgiya mu chingelezi. Po akambiskananga, mzichi uyu wanguzumbuwa nkhani zinandi za pa webusayiti yidu zo ze pa mutu wakuti “Kulera Ŵana Achinyamata.” Anyina a msungwana uyu angukondwa ukongwa ndi nkhani zenizi ndipu angukamba kuti amuserepu so pa webusayiti yidu.

Tiwonga ukongwa kuti abali ndi azichi ŵidu ku South Korea angupharazgiya ŵanthu anandi pa nyengu iyi ndipu ‘anguthamika zina laku Yehova.’—Salimo 148:13.