Bayibolu likukambiya limu kuti mu mazuŵa ngakumaliya kwazamuchitika milili pamwenga kuti matenda ngo ngawanda ukongwa. (Luka 21:11) Milili yeniyi ntchilangu chakutuliya kwaku Chiuta cha. Ve viyo, chifukwa pambula kuswera Chiuta wagwiriskiyengi ntchitu Ufumu waki kutuzgapu matenda ngosi, kusazgapu milili.

•  Kumbi Bayibolu likukambiya limu vakukwaskana ndi milili?

•  Kumbi Chiuta walanga ŵanthu ndi matenda?

•  Kumbi milili yo yichitika mazuŵa nganu ntchilangu chakutuliya kwaku Chiuta?

•  Kumbi milili yazamumala?

•  Mavesi nga mu Bayibolu ngo ngakamba vakukwaskana ndi matenda

 Bayibolu lizumbuwa mitundu chayiyu cha ya milili pamwenga matenda nge COVID-19, Ezi, TB, maleriya, pamwenga chifuŵa cha ku Spain. Kweni likukambiya limu va “milili” ndipuso “mulili wakubaya.” (Luka 21:11; Chivumbuzi 6:8) Vinthu venivi navu vilongo kuti te mu “mazuŵa ngakumaliya,” ngo ngakambika so kuti “kumala kwa nyengu yinu.”—2 Timote 3:1; Mateyu 24:3.

 Bayibolu likamba kuti pa nyengu yinyaki kuvuli Chiuta wangulanga ŵanthu ndi matenda. Mwakuyeruzgiyapu, iyu wanguchitiska kuti ŵanthu anyaki achiti makhati. (Numeri 12:1-16; 2 Mafumu 5:20-27; 2 Mbiri 26:16-21) Chinanga kuti venga viyo, matenda ngenanga ngayanana cha ndi milili yo yiyambukiya ku ŵanthu ambula kunanga. Mumalu mwaki, chenichi chenga chilangu cho Chiuta wangupereka ku ŵanthu wo alekanga kumuvwiya.

 Awa. Ŵanthu anyaki akamba kuti Chiuta wagwiriskiya ntchitu milili kweniso matenda nganyaki kuti walangi ŵanthu mazuŵa nganu. Chinanga kuti ve viyo, vo Bayibolu likamba vikoliyana cha ndi vo ŵanthu akamba. Chifukwa wuli?

 Chifukwa chimoza ntchakuti ŵanthu anyaki wo asopanga Chiuta mu nyengu yakali asuzgikanga ndi matenda nge mo so asuzgikiya ŵanthu anyaki wo asopa Chiuta mazuŵa nganu. Mwakuyeruzgiyapu, munthu wakugomezgeka Timote, nayu ‘watamangatamanga.’ (1 Timote 5:23) Kweni Bayibolu likambapu cha kuti chenichi chenga chisimikizu chakuti Chiuta wamuyanjanga cha. Mwakuyanana ŵaka, mazuŵa nganu ateŵeti akugomezgeka anyaki aku Chiuta atama pamwenga ŵanthu anyaki atiŵayambuziya matenda. Kanandi ŵanthu ŵenaŵa akumana ndi venivi chifukwa chakuŵa pa malu ngaheni kweniso pa nyengu yiheni.—Wakutawula 9:11.

 Kusazgiyapu yapa, Bayibolu lisambiza kuti nyengu yakuti Chiuta walangiyi ŵanthu aheni yechendakwani. Mumalu mwaki, tija “mu zuŵa la utaski,” kung’anamuwa nyengu yo Chiuta wadaniya ŵanthu wosi kuti aje nayu pa ubwezi kuti azitaskiki. (2 Akorinto 6:2) Nthowa yimoza yo wachitiya venivi, nkhuziya mu ntchitu yakupharazga ‘uthenga wamampha wa Ufumu’ yo yichitika pacharu chosi.—Mateyu 24:14.

 Hinya. Bayibolu likukambiya limu kuti pambula kuswera palivi munthu yo wazamutama. Asani Ufumu waki waziyamba kulamuliya, Chiuta wazamutuzgapu matenda ngosi. (Yesaya 33:24; 35:5, 6) Iyu wazamutuzgapu masuzgu ngosi, urwirwi kweniso nyifwa. (Chivumbuzi 21:4) Ndipuso wazamuyuska ŵanthu wo akufwa kuti azikondwi ndi umoyu wambula kutama pacharu chinu chapasi, pa nyengu yo ŵanthu wosi azamuja akufikapu.—Masalimo 37:29; Machitidu 24:15.

 Chivumbuzi 6:8: “Awonani! ndinguwona hachi yakuti mbuu ndipu yo wangukwerapu zina laki lenga Nyifwa. Ndipu Dindi wamulondonga pafupi. Yiwu angupaskika mazaza . . . kuti abayi. . . mulili wakubaya.”

 Vo ling’anamuwa: Uchimi wakukwaskana ndi ŵanthu anayi wo akwera pa mahachi, ulongo kuti milili yatingi yizichitikengi mu nyengu yidu.