Awa. Bayibolu likambapu cha kuti ndalama ziheni pamwenga kuti ndizu zichitiska vinthu viheni vosi. Mazu ngo ŵanthu atanja kukamba ngakuti “ndalama ndi msisi wa vinthu vosi viheni” ngalongo kuti avwisa umampha cha vo Bayibolu likamba. Tikamba viyo chifukwa Bayibolu likamba kuti “kwanja ndalama ndi msisi wa vinthu vosi viheni.” a—1 Timote 6:10, King James Version.

•  Kumbi Bayibolu likambanji pa nkhani ya ndalama?

•  Ntchifukwa wuli Bayibolu likamba kuti kwanja ndalama nkhuheni?

•  Kumbi ulongozgi wa mu Bayibolu pa nkhani ya ndalama ungatiwovya wuli?

•  Mavesi nga mu Bayibolu ngo ngakamba za ndalama

 Bayibolu likamba kuti ndalama zitovya kweniso “zivikiliya” asani munthu watizigwiriskikiya ntchitu mwazeru.” (Wakutawula 7:12) Kweniso Bayibolu liwonga ŵanthu wo ŵe ndi mtima wakovya anyawu kusazgapu kuŵapaska ndalama.—Nthanthi 11:25.

 Chinanga kuti ve viyo Bayibolu litititcheŵeska so kuti tingayanjanga ukongwa ndalama cha. Likamba kuti: “Umoyu winu uŵi wambula kwanja ndalama, kweni mukhorwengi ndi vo mwe navu pasonu panu.” (Aheberi 13:5) Fundu yo tisambirapu njakuti tigwiriskiyengi ntchitu ndalama mwazeru mumalu mwakukhumba kuja ndi chuma chinandi. Mwaviyo, tikhorwengi ndi vo tenavu nge chakurya, vakuvwala ndi pakugona.—1 Timote 6:8.

 Munthu wa mbunu wazamulonde cha umoyu wamuyaya. (Aefeso 5:5) Venivi ve viyo chifukwa jalidu la mbunu lenge kusopa angoza pamwenga kuti kusopa kwaboza. (Akolose 3:5) Kusazgiyapu yapa munthu wa mbunu asani wakhumba kusaniya chinthu chinyaki wagwiriskiya ntchitu fundu za mu Bayibolu cha. Lemba la Nthanthi 28:20 likamba kuti: “yo wakhumba kukhupuka mwaliŵi, walutirizgengi cha kuja wambula mulandu.” Ŵanthu wo akhumba kusaniya vinthu mwaliŵiliŵi achita vinthu mwachinyengu, aphanga vinthu va anyawu, atuba kweniso kubaya ŵanthu.

 Chinanga kuti ŵanthu anyaki aŵanaŵana kuti kwanja ndalama kungaŵachitiska cha kuti ayambi mijalidu yiheni, kweni kwe ndi masuzgu ngaki. Bayibolu likamba kuti “ŵanthu wo akhumbisiska kukhupuka, atuwa mu mayeseru ndi muchiŵana, kweniso mu makhumbiru nganandi ngabwekabweka ndipuso ngakupweteka.”—1 Timote 6:9.

 Asani titesesa kuchita cho ntchamampha kweniso kuchita vo vikondwesa Chiuta pa nkhani ya ndalama, iyu watiyanjengi ndipuso watiwovyengi. Chiuta walayizga ŵanthu wo atesesa kumukondwesa kuti: “Ndazakukulekani cha ndipuso ndazakukujowoni cha.” (Aheberi 13:5, 6) Iyu watitisimikiziya so kuti “munthu wakugomezgeka walondiyengi vitumbiku vinandi.”—Nthanthi 28:20.