Mapenzi aali munyika alikupambanisya bantu munzila zyiingi. Bantu biingi tabachikwe bulangilizi pe akaambo kamapenzi ngibalikuswaana. Bachita biyeni chiindi nibaswaanana mapenzi?

• Bamwi tabayandi pe kuyeeya atala alyajuunza.

• Bamwi beezya kuchija mapenzi aabo kwiinda mukunywa bukande zyiindilide naakuti kubelesya minsamu iikola.

• Bamwi bayeeya kuti kufwa kulikabotu kwiinda kupona. Ngabalibuzya kuti: “Ndichiponenaanzi?”

• Amwi mapenzi ngulookuswaana alakonzya kuba aachiindi chifwiifwi biyo, alubo zintu zilakonzya kubota kutayeeyeli pe.

• Nikuba kuti mapenzi aako alakonzya kutamana, kuli zimwi zintu nzukonzya kuchita kuti ulisimye.

• Bbayibbele lipa bulangilizi bwachoonzyo, bwakuti mapenzi aabantu ayoomana.

Bbayibbele Lyaamba Kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—Matayo 6:34.

Langana aamapenzi aabuzuba bumwi aachiindi chimwi. Utazumizyi makataazyo aabuzuba butobela kuti akukachizye kuchita zyabuzuba bwasunu.

Kukataazikana kulikuyeeya kuti zintu zilakonzya kubija loko, kulakonzya kukumana manguzu akupa kuti ubonaanga zintu tazizooboti pe.

Sintembawuzyo naakali kukomba kuli Leza wakati: “Ijwi lyako ndilambe kumaulu aangu, alimwi mumuni uumunikila nzila yangu.” (Intembauzyo 119:105) Nkamboonzi Jwi lyaLeza, Bbayibbele nilikozyanisigwa aalambe amumuni?

Lambe lilatumunikila mansiku kuchitila kuti tubone mputweelede kulyata. Munzila iikozyenie, Bbayibbele lilaabusongo bugwasya bukonzya kutuzulwida chiindi nituyanda kusala zintu zipati mubuumi.

Mumuni umunikila nzila yesu kuchitila kuti tubone zilikunembo. Munzila iikozyenie, Bbayibbele lilakonzya kutumunikila kuchitila kuti tubone mbulinoobede lyajuunza.