1-3. (a) Olsem wanem bikpela hevi i laik painim famili bilong Abigel? (b) Bai yumi kisim wanem skul long dispela gutpela meri?

 ABIGEL i lukim yangpela man i pret nogut tru. Na i gat as na em i pret nogut tru. Bikpela bagarap i laik kamap. Long dispela taim stret, klostu 400 soldia i wokabaut i kam, ol i laik kilim i dai olgeta man long haus bilong Nabal, em man bilong Abigel. Bilong wanem ol i laik mekim olsem?

² Nabal yet i kirapim dispela hevi. Em i bin mekim hatpela pasin na tok bilas, em i save mekim olsem. Tasol long dispela taim, em i tok bilas long wanpela komanda—em gutpela komanda bilong ol soldia i bin kisim trening long pait na ol i stap gut long em. Orait wanpela yangpela wokman bilong Nabal, ating em i wasman bilong ol sipsip, i kam long Abigel, em i trastim Abigel long tingim wanpela plen bilong seivim ol. Tasol hau bai wanpela meri inap pasim lain ami?

³ Pastaim, yumi laik kisim sampela save moa long dispela gutpela meri. Abigel em i husat? Dispela bikpela hevi i bin kirap olsem wanem? Na yumi inap kisim wanem skul long pasin bilong em long bilip?

4. Nabal i wanem kain man?

⁴ Abigel na Nabal i no wankain. Nabal i bin makim gutpela meri tru na maritim, tasol Abigel i maritim man i gat pasin nogut. Em tru dispela man i maniman. Olsem na em i ting em i gat biknem, tasol ol narapela i gat wanem tingting long em? Baibel i no kolim nem nogut olsem long wanpela man. Mining bilong nem bilong em, “Krankiman,” o “Man i No Gat Gutpela Tingting.” Yu ting papamama i givim em dispela nem taim em i bon, o ating bihain ol man i kolim em long dispela nem bilong makim pasin bilong em? Yumi no save, tasol pasin bilong em i stret long nem bilong em. Nabal i gat “hatpela pasin na em i save mekim pasin nogut.” Em i man bilong buli na  dring spak, olgeta man i save pret long em na i no laikim em.​—1 Sml. 25:2, 3, 17, 21, 25.

5, 6. (a) Abigel i gat wanem ol gutpela pasin? (b) Wai na Abigel i maritim dispela krankiman?

⁵ Abigel i narapela kain tru long Nabal. Mining bilong nem bilong em i olsem “Papa Bilong Mi i Mekim Em Yet i Amamas.” Planti papa i save amamas long ol i gat naispela pikinini meri, tasol papa i gat savetingting i save amamas moa yet taim em i luksave long gutpela pasin bilong pikinini bilong em. Planti taim, wanpela i gat naispela skin i no ting olsem em i mas kisim ol pasin olsem skelim gut ol samting, gutpela tingting, strongpela bel, na bilip. Tasol Abigel i no olsem. Baibel i preisim em long pasin bilong em long skelim gut ol samting na em i luk nais tru.​—Ritim 1 Samuel 25:3.

⁶ Sampela man long nau i laik save long wai dispela yangpela meri i gat savetingting i maritim dispela krankiman. Tingim, long taim ol i bin raitim Baibel, ol papamama yet i save makim poroman marit bilong ol pikinini bilong ol. Sapos nogat, em i bikpela samting long papamama i mas orait long dispela marit. Yu ting papamama bilong Abigel i laikim dispela marit, o makim Nabal, bikos em i maniman na em i gat biknem? Yu ting ol i stap rabis na ol i mekim olsem? Yumi no save, tasol mani bilong Nabal i no mekim na em i gutpela maritman, nogat.

7. (a) Ol papamama i no ken mekim wanem sapos ol i laik skulim pikinini long kisim stretpela tingting long marit? (b) Abigel i tingting strong long mekim wanem?

⁷ Ol papamama i gat savetingting i save skulim ol pikinini long kisim stretpela tingting long marit. Ol i no kirapim ol pikinini long maritim wanpela i gat planti mani, o subim ol long painim poroman taim ol i yangpela tumas long mekim ol wok olsem man na meri marit. (1 Kor. 7:36) Abigel i marit pinis, olsem na em i no inap tingim ol kain samting olsem. Maski i gat wanem as, em i maritim pinis Nabal, so em i tingting strong long mekim gut wok na karim hevi.

8. Nabal i tok nogut long husat? Wai na yu tok samting em i mekim i no savetingting?

⁸ Nabal i mekim samting i givim bikpela hevi moa long Abigel. Dispela man em Nabal i bin tok nogut long en, em Devit. Em dispela gutpela wokman bilong Jehova em profet Samuel i bin anointim, bilong soim olsem God i makim Devit long senisim Sol na kamap king. (1 Sml. 16:1, 2, 11-13) King Sol i jeles na i laik kilim i dai Devit, olsem na Devit i ranawe wantaim 600 soldia i stap gut long em, na hait nabaut long ples nating.

9, 10. (a) Devit na lain bilong em i wok hat tru long mekim wanem? (b) Wai na Nabal i mas tenkyu long samting Devit na lain bilong em i mekim? (Lukim tu paragraf 10 futnot.)

 ⁹ Nabal i stap long Maon, tasol em i save go wok long Karmel, a na ating em i gat hap graun klostu long dispela hap. Ol dispela taun i stap long ol ples maunten i gat ol gras we i gutpela bilong lukautim ol sipsip, na Nabal i gat 3,000 sipsip. Tasol arere bilong dispela hap em bus tasol. Long hap saut em traipela ples nating bilong Paran. Long hap is, rot i go long Detsi i katim i go olsem long ol ples drai nating i gat planti baret i daun tru na ol traipela keiv. Long ol dispela hap, Devit na lain bilong em i wok hat tru long painim kaikai, ating ol i mas painim ol abus na ol i karim planti hevi. Planti taim ol i bungim ol yangpela man husat i save lukautim ol sipsip bilong maniman Nabal.

¹⁰ Ol dispela soldia i save wok strong, i mekim wanem kain pasin long ol wasman bilong sipsip? Ating em bai isi long ol i stilim sipsip bilong kaikai, tasol ol i no mekim olsem. Ol i stap olsem banis bilong lukautim ol sipsip na wokman bilong Nabal. (Ritim 1 Samuel 25:15, 16.) Ol sipsip na ol wasman inap bungim planti hevi. I gat planti wel animal, na sauten boda bilong Israel i stap klostu, olsem na planti taim ol stilman bilong ol narapela lain i save kam pait na stilim ol sipsip samting. b

11, 12. (a) Hau tok bilong Devit i soim olsem em i skelim gut tok na rispektim Nabal? (b) Wanem samting i no stret long pasin bilong Nabal taim em i bekim tok long Devit?

¹¹ Yumi save, em i no isi long painim kaikai bilong dispela bikpela lain long ples nating. Olsem na wanpela taim Devit i salim 10-pela man bilong bringim tok i go long Nabal bilong askim em long helpim ol. Devit i bihainim savetingting na makim taim i stret. Em taim bilong katim gras bilong ol sipsip, em taim we ol man i save givim samting long narapela na mekim ol bikpela kaikai. Na tu, Devit i skelim gut ol tok, em i yusim ol gutpela tok i soim pasin rispek. Na tu, em i kolim em yet olsem “Devit pikinini bilong yu,” ating bilong makim olsem em i rispek long Nabal husat i gat bikpela krismas. Orait Nabal i mekim wanem?​—1 Sml. 25:5-8.

¹² Em i belhat nogut tru! Long kirap bilong stori, yangpela man i tokim Abigel olsem,“bosman i mekim tok i bagarapim ol.” Nabal i bikmaus na komplein, em i no laik givim gutpela bret, wara, na abus bilong em long ol. Em i tok bilas long Devit olsem em i man nating  na kolim em olsem wokboi i ranawe. Ating tingting bilong Nabal i wankain long Sol, em i heitim Devit. Tupela wantaim i no gat tingting olsem bilong Jehova. God i laikim Devit na i tingim em olsem king bilong Israel long bihain, na em i no tingim Devit olsem bikhet wokboi.​—1 Sml. 25:10, 11, 14.

13. (a) Pastaim Devit i mekim wanem long tok bilas bilong Nabal? (b) Olsem wanem stiatok long Jems 1:20 i kamapim klia pasin Devit i mekim?

¹³ Taim ol man bilong bringim tok i kam bek na tokim Devit long olgeta tok bilong Nabal, Devit i belhat nogut tru. Em i tok: “Yupela olgeta pasim bainat bilong yupela!” Em i pasim bainat na kisim 400 lain bilong em i go bilong mekim pait. Em i tok tru antap long kilim i dai olgeta man long haus bilong Nabal. (1 Sml. 25:12, 13, 21, 22) I gat risen na Devit i belhat, tasol pasin bilong em long kamapim dispela belhat i no stret. Baibel i tok: “Belhat bilong man i no save kamapim stretpela pasin bilong God.” (Jems 1:20) Tasol olsem wanem Abigel inap seivim ol wanhaus bilong em?

14. (a) Wanem fes samting Abigel i mekim bilong stretim dispela bikpela rong bilong Nabal? (b) Yumi inap kisim wanem skul long pasin bilong Nabal na Abigel?

¹⁴ I luk olsem, Abigel i mekim fes samting bilong stretim dispela bikpela rong. Em i redi long harim tok, em i no olsem man bilong em, Nabal. Yangpela wokman i no bringim tok i go long Nabal, em i tok: “Em i gat hatpela pasin na i hatwok long toktok long em, olsem na mi kam tokim yu.” (1 Sml. 25:17) Sori tru, Nabal i tingim em yet olsem man i gat biknem, na em i no laik harim tok. Long nau tu planti man i gat pasin hambak. Tasol yangpela wokman i save olsem Abigel i narapela kain, olsem na em i no pret long go tokim Abigel long dispela hevi.

15, 16. (a) Hau Abigel i olsem dispela gutpela maritmeri em Buk Provep i stori long en? (b) Wai na samting Abigel i mekim i no olsem em i bikhet long rait bilong man bilong em olsem het bilong famili?

¹⁵ Abigel i tingting na kirap kwiktaim long mekim samting. Long 1 Samuel 25:18, Baibel i tok, “kwiktaim” Abigel i mekim samting. Long dispela stori, yumi lukim olsem planti taim Abigel i kirap kwiktaim long mekim samting. Em i redim planti presen bilong Devit na lain bilong em. Ol i redim bret, wain, sipsip, greip keik, fik keik, na wit samting ol i kukim long paia. I klia tru olsem Abigel i save gut long olgeta samting long haus, na em i go pas long lukautim ol wok bilong haus, wankain olsem dispela gutpela maritmeri em Buk Provep i stori long en. (Prov. 31:10-31) Em i salim ol dispela kaikai i go pas wantaim sampela wokboi bilong em, na em yet i kam bihain long  ol. Baibel i tok: “Tasol em i no tokim man bilong em Nabal long dispela samting em i mekim.”​—1 Sml. 25:18, 19.

¹⁶ Yu ting Abigel i bikhet long rait bilong man bilong em olsem het bilong famili? Nogat; tingim olsem Nabal i bin mekim pasin nogut tru long wokman em Jehova i anointim, pasin bilong em inap bringim dai long ol wanhaus bilong em husat i no gat asua. Sapos Abigel i no mekim wanpela samting, ating em tu bai i gat asua long pasin man bilong em i mekim, a? Long dispela taim, em i mas putim pasin bilong daun long God i stap namba wan long daun long man bilong em.

17, 18. Abigel i mekim wanem taim em i lukim Devit? Em i tok wanem? Olsem wanem tok bilong em i gat strong?

¹⁷ I no longtaim, Abigel i bungim Devit na lain bilong em. Kwiktaim, em i lusim donki na i go daun, na brukim skru long ai bilong Devit. (1 Sml. 25:20, 23) Na em i autim olgeta tingting long bel bilong em, em i askim strong Devit long marimari long man bilong em na ol wanhaus bilong em. Wanem samting i mekim na tok bilong em i gat strong?

¹⁸ Abigel yet i karim dispela hevi na askim Devit long fogivim em. Em i tokaut olsem man bilong em i krankiman olsem nem bilong em i makim, na ating em i kamapim olsem Devit em gutpela man na em i no ken krosim kain krankiman olsem. Em i trastim Devit olsem mausman bilong Jehova, em i luksave olsem Devit i mekim ‘ol pait bilong Jehova.’ Em i kamapim tu olsem em i save long tok promis bilong Jehova long Devit na wok king, em i tok: “Jehova . . . makim yu long i stap king bilong ol Israel.” Na tu, em i tokim Devit long no ken mekim wanpela samting na bai em i gat asua long kapsaitim blut o bihain dispela inap kamapim “bel hevi”—dispela i makim olsem maus bilong bel inap kotim em. (Ritim 1 Samuel 25:24-31.) Em i mekim ol gutpela tok we Devit i pilim tru!

19. Devit i mekim wanem long tok bilong Abigel? Wai na em i preisim Abigel?

¹⁹ Devit i mekim wanem? Em i kisim ol samting Abigel i bringim i kam na i tok: “Litimapim nem bilong Jehova, em God bilong Israel. Em i bin salim yu i kam tete na yu bungim mi! God i ken blesim yu long gutpela tingting bilong yu! Long wanem, yu bin pasim mi na bai mi no gat asua long kapsaitim blut.” Devit i preisim Abigel long strongim bel na kam kwiktaim long bungim em, na em i tokaut long Abigel i bin pasim em na em i no gat asua long kapsaitim blut. Em i tokim Abigel: “Yu ken i go wantaim bel isi long haus bilong yu,” na long pasin daun, em i tok moa: “Mi harim pinis tok yu mekim.”​—1 Sml. 25:32-35.

20, 21. (a) Yu laikim wanem pasin bilong Abigel long redi long go bek long man bilong em? (b) Hau Abigel i strongim bel na skelim gut ol samting taim em i laik toktok long Nabal?

²⁰ Taim Abigel i go pinis, em i tingim yet ol samting i kamap; em i  luksave olsem Devit i gat gutpela pasin we i no wankain long hambak man bilong em. Tasol Abigel i no tingim tingim dispela. Baibel i tok: “Abigel i go bek long Nabal.” Yes, em i go bek long man bilong em na strong yet long mekim gut wok olsem meri marit. Em i mas tokim Nabal long presen em i bin givim long Devit na lain bilong em. Nabal i gat rait long save long dispela. Na tu, Abigel i mas tokim em—paslain long ol narapela i tokim em, na dispela bai semim em tru—long dispela bikpela hevi we em i pasim long kamap. Tasol em i no inap tokim Nabal long dispela taim stret, long wanem, Nabal i mekim bikpela pati olsem king i save mekim na em i spak nogut tru.​—1 Sml. 25:36.

²¹ Abigel i strongim bel na skelim gut ol samting, em i wet inap long moning, taim spak bilong Nabal i pinis. Ating long dispela taim tingting bilong Nabal bai i klia na em inap kisim gut tok bilong Abigel, tasol ating em bai belhat tu long Abigel. Maski i olsem, Abigel i go long Nabal na tokim em long olgeta samting. Em i save olsem Nabal bai belhat na singaut bikmaus, na ating pait. Tasol Nabal i sindaun, na i no muv liklik.​—1 Sml. 25:37.

22. Wanem samting i kamap long Nabal? Yumi kisim wanem skul long ol hatpela wok bos na pasin nogut insait long famili?

²² Wanem samting i painim Nabal? “Wantu klok bilong em i stop olsem bilong man i dai pinis na em i paralais na i stap olsem wanpela ston.” Ating em i kisim wanpela kain sik strok. Inap olsem 10-pela de bihain, em i dai—em i no dai long sik tasol. Baibel i tok: “Jehova i mekim na Nabal i dai.” (1 Sml. 25:38) Long dispela stretpela rot bilong kilim em, nau bikpela hevi long marit bilong Abigel i pinis. Long nau, Jehova i no save wokim mirakel na kilim man i dai, tasol dispela stori i kirapim yumi long tingim olsem em i lukim ol hatpela wok bos na pasin nogut i kamap insait long famili. Long taim em yet i makim, em bai mekim stretpela kot.​—Ritim Luk 8:17.

23. Abigel i kisim wanem narapela blesing? Maski em bai kamap meri bilong Devit, hau em i soim olsem pasin bilong em i no senis?

²³ Abigel i stap fri long dispela marit i gat hatwok, na nau narapela blesing i wetim em. Taim Devit i harim olsem Nabal i dai pinis, em i salim sampela wokman i go tokim Abigel olsem em i laik maritim em. Abigel i tok: “Mi olsem wokmeri nating na mi redi long wasim lek bilong ol wokman bilong bikman bilong mi.” Maski em bai kamap meri bilong Devit, pasin bilong em i no senis; em i tok em i laik kamap wokmeri nating bilong ol wokman  bilong Devit! Baibel i stori gen long pasin bilong em long kirap kwiktaim long mekim samting, nau em i redim em yet bilong i go long Devit.​—1 Sml. 25:39-42.

24. Abigel i bungim wanem ol hevi long nupela sindaun bilong em? God bilong Abigel na man bilong em i gat wanem tingting long em?

²⁴ Tasol dispela i no makim olsem laip bilong em bai gutpela tasol; marit bilong Abigel long Devit bai i gat hevi. Devit i marit pinis long Ahinoam, na maski God i larim man i maritim planti meri, dispela i save givim hevi long ol bilipmeri long dispela taim. Na Devit i no kamap king yet; bai i gat sampela hatwok na hevi i painim em paslain long em i ken mekim wok bilong Jehova olsem king. Tasol Abigel i bin helpim na sapotim gut Devit, bihain em i karim wanpela pikinini man, em i lukim olsem em i gat gutpela man i save tingim na lukautim em gut. Wanpela taim Devit i kisim bek Abigel long han bilong ol birua! (1 Sml. 30:1-19) Olsem na Devit i bihainim pasin bilong Jehova God, husat i save laikim na tingim tru meri i gat savetingting, strongpela bel, na i stap gut long God.