Sampela man i tok i stret long tok amamas long pikinini bilong yu. Tasol ol narapela i tok sapos oltaim yu mekim olsem long pikinini, em bai pilim olsem em i winim ol narapela.

Taim yu tok amamas long pikinini, skelim gut ol taim we yu save mekim olsem, na wanem kain tok yu mekim. Wanem tok bai helpim pikinini bilong yu? Wanem tok bai mekim em i bel hevi? Hau yu inap makim taim stret bilong tok amamas long pikinini?

I gat planti risen na ol papamama i tok amamas long ol pikinini. Tingim dispela:

Sapos oltaim yu tok amamas long pikinini, hevi inap kamap. Sampela papamama i tok amamas long pikinini na bai em i pilim olsem em i winim ol narapela. Dokta David Walsh i tok, ol yangpela “inap luksave sapos yu pilim tru tok yu mekim o yu tok amamas tasol bilong mekim gut bel bilong ol. Ol i save olsem i no stret ol i kisim tok amamas, na dispela bai mekim na ol i no inap trastim yu.” *

Tok amamas long save bilong pikinini. Sapos pikinini meri bilong yu i save gut long droim ol piksa, bai yu laik tru long tok amamas long en, na dispela bai helpim em long kamap gutpela moa long droim ol piksa. Tasol sampela taim hevi inap kamap. Taim yu tok amamas tasol long save bilong pikinini, em inap ting olsem i gutpela long mekim ol wok i no givim hatwok long en. Na ating em bai i no amamas long lainim ol nupela samting, long wanem, em i pret long popaia. Ating em bai tok, ‘Mi no save hau long mekim dispela wok, olsem na mobeta mi no mekim.’

Tok amamas long wok pikinini i mekim. Sapos yu tok amamas long wok pikinini i mekim na i no long save bilong em tasol, dispela bai helpim ol long luksave olsem ol i mas wok hat bilong save long mekim gut wok na i no ken les kwik.  Buk Letting Go With Love and Confidence i tok, ol pikinini bai save olsem “ol i givim bel long mekim wok, na gutpela samting i kamap long dispela. Na maski sapos ol i no mekim gut wok, ol i kisim save long hau ol inap mekim gut dispela wok long bihain.”

Tok amamas long save na wok bilong pikinini. Sapos yu tokim pikinini olsem, “Mi lukim olsem yu wokim gut tingting na droim dispela piksa,” dispela i gutpela moa long yu tok, “Yu wanpela gutpela atis stret.” Ol papamama inap mekim ol kain tok long pikinini, tasol namba 2 tok i kamapim olsem save bilong pikinini tasol i helpim em long mekim gut ol wok.

Taim yu tok amamas long wok pikinini i mekim, yu skulim em olsem sapos em i mekim dispela wok inap planti taim, em bai save gut long en. Na bihain pikinini bilong yu bai i no holim tupela tingting long mekim ol narapela wok.—Stiatok bilong Baibel: Sindaun 14:23.

Helpim pikinini long luksave olsem yumi save popaia. Olgeta man i save popaia, dispela i makim ol stretpela man tu. (Sindaun 24:16) Maski i olsem, ol i no givap hariap, nogat. Ol i kisim save long rot bilong stretim dispela hevi na ol i kirap gen long mekim wok. Olsem wanem yu inap helpim pikinini bilong yu long holim stretpela tingting?

Mobeta yu tingim ol gutpela wok em i mekim. Tingim, sapos oltaim yu tokim pikinini meri olsem, “Yu savemeri tru long wokim matematiks,” tasol bihain em i feil long matematiks tes bilong em. Ating em inap ting save bilong en i pinis, olsem na i nogat wok long em i traim bes long kisim ol gutpela mak.

Tasol taim yu tok amamas long gutpela wok pikinini i mekim long skul, dispela inap helpim em long wok hat long mekim ol skul wok bilong en. Yu helpim pikinini meri bilong yu long luksave olsem dispela em liklik popaia tasol, na i no bikpela hevi. Taim yu mekim olsem, em bai traim narapela rot o em bai wok hat long skul.—Stiatok bilong Baibel: Jems 3:2.

Kamapim ol gutpela tok bilong stretim em. Taim yu stretim pikinini long gutpela pasin, em bai amamas long putim yau long tok bilong yu na em i no inap bel hevi. Na tu, sapos oltaim yu tok amamas long pikinini long taim stret, ating bihain em bai amamas long kisim ol tok bilong stretim em na bai em i ken mekim gut ol wok bilong en. Na taim em i mekim olsem, yutupela wantaim bai kisim bikpela amamas.—Stiatok bilong Baibel: Sindaun 13:4.