Go Klostu Long God
Fes atikol bilong dispela magasin i tok, planti man i tingim Baibel olsem wanpela buk holi. Ol i luksave olsem taim ol i ritim Baibel na bihainim skultok bilong en, ol i go klostu moa long God na kliagut long as bilong laip.
Baibel i tok ol man i “bihainim pasin bilong God” ol i gat stretpela tingting long laip. Ol i no wari tumas long inapim laik bilong ol yet, nogat. Ol i save bihainim ol lo bilong God.—Jut 18, 19; Efesus 5:1.
WETIM GUTPELA SAMTING I KAMAP
STIATOK BILONG BAIBEL: “Sapos yu bel hevi long taim pen na hevi i painim yu, strong bilong yu bai pinis.”—Provep 24:10.
MAKIM WANEM SAMTING: Bel hevi inap pinisim strong yumi nidim long karim ol hevi bilong laip. Tasol pasin bilong wetim ol gutpela samting i kamap bihain, inap givim strong yumi nidim na yumi no givap. Yumi inap kisim bel isi long save olsem ol hevi yumi bungim em bilong sotpela taim; tru tumas, gutpela samting inap kamap long dispela rot.
SAMTING YU KEN MEKIM: Tingim ol gutpela samting bai kamap bihain. No gat wok long wari long samting inap kamap o wetim gutpela taim long kamap, kirap mekim samting i stret long ol mak yu putim. Tru tumas, “ol samting we man i no ting inap kamap,” bai kamap. (Eklisiastis 9:11) Sampela taim ol samting i kamap i gutpela moa winim olsem yumi ekspektim. Baibel i yusim wanpela tok piksa bilong gaden na i tok: “Planim ol sid bilong yu long moningtaim na no ken larim han bilong yu i malolo inap long apinun; bikos yu no save wanem sid bai gro, dispela sid o dispela narapela sid, o tupela wantaim bai gro.”—Eklisiastis 11:6.
BEKIM BILONG OL BIKPELA ASKIM BILONG LAIP
STIATOK BILONG BAIBEL: “Mekim mi kliagut long ol samting . . . Tok bilong yu em i tru tasol.”—Buk Song 119:144, 160.
MAKIM WANEM SAMTING: Baibel i kamapim bekim bilong ol bikpela askim em ol man i gat. Em i bekim ol askim olsem
-
Yumi kamap olsem wanem?
-
Yumi stap bilong mekim wanem?
-
Wanem samting i painim man taim em i dai?
-
Yumi bilong i stap nau tasol?
Planti milion manmeri long olgeta hap i mekim sindaun bilong ol i kamap gutpela moa taim ol i skelim bekim bilong Baibel long ol dispela askim na ol narapela askim.
SAMTING YU KEN MEKIM: Yu yet i ken skelim ol tok Baibel i skulim ol man long en. Askim wanpela Witnes Bilong Jehova long helpim yu long kliagut long Baibel. Lukim websait bilong mipela, jw.org, o go long wanpela miting bilong mipela, ol dispela miting i fri na olgeta man i ken i kam.
OL NARAPELA STIATOK BILONG BAIBEL
Watsim vidio Wai na i Gutpela Long Stadi Long Baibel? long jw.org. Em i stap long winim 880 tokples
LUKSAVE OLSEM YU MAS KISIM SAVE LONG GOD.
“Ol man i hangre long kisim save long God, ol i ken amamas.”—MATYU 5:3.
KISIM SAMPELA SAVE MOA LONG GOD I AS BILONG OL TOK BILONG BAIBEL.
“Painim God, . . . painim em tru. . . . Em i no stap longwe long yumi olgeta wan wan.”—APOSEL 17:27.
RITIM NA TINGIM TINGIM OL TOK BILONG BAIBEL.
“Dispela man i save amamas long lo bilong Jehova, * na em i save tingim tingim lo bilong em long san na long nait. . . . Olgeta samting em i mekim i save kamap gutpela.”—Buk Song 1:2, 3, futnot.
^ par. 23 Jehova em nem bilong God olsem Baibel i kamapim.
Ating Yu Bai Laikim Tu
WASTAUA
Hau na Baibel Inap Helpim Mi?
Dispela buk bilong bipo i gat ol gutpela tok bilong helpim yumi.
