OL ATIKOL i kamap paslain i soim olsem narapela narapela bikpela hevi inap mekim na i hatwok long karim ol hevi. Taim yu karim ol hevi, ating yu tingting olsem i gat as long yu stap laip o wanpela i tingim yu o nogat. Yu mas save God i tingim tru ol hevi bilong yu. Yu dia tumas long em.

Man bilong raitim Song 86 i kamapim olsem em i trastim God: “Taim mi karim pen na hevi, mi save singaut long yu, na mi save yu bai harim singaut bilong mi.” (Buk Song 86:7) Tasol, ating yu tingting, ‘Hau bai God i harim singaut bilong mi “taim mi karim pen na hevi”?’

Tru, God i no inap tekewe ol hevi bilong yu wantu, tasol Tok bilong em, Baibel, inap mekim isi tru bel bilong yu na helpim yu long karim hevi: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God; na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela.” (Filipai 4:6, 7) Plis skelim hau ol dispela ves bilong Baibel i strongim yumi olsem God i save tingim tru yumi.

“God i no save lusim tingting long wanpela bilong ol dispela pisin. . . . Yupela i winim tru ol dispela liklik pisin.”—Luk 12:6, 7.

TINGIM: Ol dispela pisin i liklik tru tasol God i save tingim ol. God i tingim tru olgeta wan wan liklik pisin; olgeta wan wan i dia tumas. Ol man i bikpela samting moa long God winim ol liklik pisin. Ol man i nambawan samting tru God i bin wokim long graun, em i wokim ol “olsem em yet” na ol inap kisim na kamapim ol gutpela pasin bilong em.—Stat 1:26, 27.

“O Jehova, yu skelim mi gut, na yu save tru long mi. . . . Yu save long olgeta tingting bilong mi. . . . Skelim mi na yu bai save long ol samting mi tingting planti long en.”—Buk Song 139:1, 2, 23.

TINGIM: God i save gut long yu. Em i save long ol filings na tingting hait bilong yu. Ol narapela i no inap kliagut long ol hevi na tingting bilong yu, tasol God i tingim yu na em i laik helpim yu. Dispela i mekim na i gat risen long stap laip.

“O Jehova, mi laik yu harim beten bilong mi; mi singaut long yu helpim mi na mi laik yu mas harim singaut bilong mi. . . . Putim yau long beten bilong mi; taim mi singaut long yu, yu ken bekim kwik singaut bilong mi. . . . Em bai i putim gut yau long beten bilong ol manmeri i stap rabis.”—Buk Song 102:1, 2, 17.

TINGIM: Stat long taim ol man i karim pen na hevi na ol i krai, i olsem Jehova i seivim olgeta aiwara bilong ol. (Buk Song 56:8) Na dispela i makim tu aiwara bilong yu. God i tingim olgeta traim na aiwara bilong yu bikos yu dia tumas long em.

“Yu no ken tingting planti, bikos mi God bilong yu. Mi bai strongim yu, yes, mi bai helpim yu . . . mi, Jehova, God bilong yu, . . . mi tokim yu, ‘Yu no ken pret. Mi bai helpim yu.’”—Aisaia 41:10, 13.

TINGIM: God i redi long helpim yu. Sapos yu pundaun, em bai apim yu.

“God i laikim tumas olgeta manmeri bilong graun, olsem na em i givim dispela Pikinini tru bilong em long ol bai olgeta man husat i bilip long em ol inap abrusim bagarap na kisim laip oltaim.”—Jon 3:16.

TINGIM: Yu dia tru long God, olsem na em i givim Pikinini bilong em, Jisas, olsem sakrifais bilong helpim yu. Dispela sakrifais i opim rot long yu inap stap amamas na laip bilong yu i gat as bilong en inap oltaim oltaim. *