Go Klostu Long God

Em i Tingim “Yumi i Olsem Das Tasol”

“MI BIN ting olsem Jehova i no inap lusim tru rong bilong mi, na dispela hevi bai stap wantaim mi i go inap long laip olgeta bilong mi.” Em tok bilong wanpela meri Kristen long ol rong em i bin mekim bipo. Tru tumas, taim maus bilong bel i gat tok, dispela i hatwok long karim. Tasol Baibel i kamapim ol gutpela tok bilong mekim isi bel bilong ol man i tanim bel tru. Skelim tok bilong man bilong raitim song, em Devit, i stap long Song 103:​8-14.

Devit i save olsem “Bikpela i save sori moa yet” na em i “no save kros nating” long yumi. (Ves 8-10) Taim God i lukim olsem i gat as na em i ken marimari, orait em i save mekim olsem, na em i no tingim moa ol rong yumi mekim. Devit i mekim wok long tripela tok piksa bilong makim bikpela pasin marimari bilong God long yumi.

“Em i save laikim tru ol manmeri i save pret long em. Em i gat bikpela laik tru long ol, olsem skai i antap tru long graun.” (Ves 11) Taim yumi lukluk i go antap long skai long nait, yumi no inap kliagut long ol sta i stap longwe olsem wanem long graun. Devit i laik helpim yumi long pilim tru olsem Jehova i gat bikpela pasin marimari tru​—em pasin i insait long bikpela pasin laikim bilong Em. Wanpela saveman i tok, dispela pasin marimari em i bilong “ol manmeri i save pret” long God​—em ol man “i litimapim tru wok bos bilong em.”

“Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas.” (Ves 12) Sampela Baibel i tok, “em i longwe olsem hap is i stap longwe long hap wes.” Em i longwe olsem wanem? Yumi ken tok em i longwe tru. Wanpela dikseneri bilong Baibel i tok: “Piksaim long tingting olsem yu flai i go longwe tru, na sapos yu wok long flai i go long hap is, orait yu wok long i go longwe moa long hap wes.” Long dispela ves, Devit i tokim yumi olsem taim God i lusim ol sin bilong yumi, em i putim ol i go longwe tru long yumi.

“Papa i save sori long ol pikinini bilong en. Olsem tasol Bikpela i save sori long ol manmeri i pret long em.” (Ves 13) Devit yet i wanpela papa na em i save long samting em gutpela papa i save pilim long bel. Kain papa olsem i save mekim pasin sori long ol pikinini bilong em, na moa yet long taim ol i pilim pen. Devit i strongim yumi olsem gutpela Papa bilong yumi long heven i save mekim pasin sori long ol pikinini bilong em long graun, na moa yet taim ol i tanim bel na “pilim hevi long sin na i daunim [ol] yet.”​—Song 51:17.

Long dispela 3-pela tok piksa, Devit i kamapim klia samting i save kirapim Jehova long mekim pasin marimari long ol sinman, olsem: “Em i save olsem em i bin kisim graun na wokim yumi na em i tingim yumi i olsem das tasol.” (Ves 14) Jehova i save olsem yumi ol man i olsem das tasol, yumi gat ol pasin kranki na yumi no inap mekim olgeta samting. Jehova i tingim yumi olsem sinman, na em i redi long “rausim sin” bilong yumi sapos yumi soim olsem yumi tanim bel tru.​—Song 86:5.

Olsem wanem? Yu pilim tru ol tok Devit i mekim long pasin marimari bilong Jehova? Meri em mipela i bin kamapim tok bilong em long kirap bilong dispela stori, em i bin kisim save long tok Baibel i mekim long pasin bilong Jehova long lusim rong, na em i tok: “Mi wok long pilim olsem nau mi ken go klostu moa long Jehova, na maus bilong bel i no kotim mi moa.” a I gutpela sapos yu kisim sampela save moa long pasin marimari bilong God, na long samting yu mas mekim bambai God i ken marimari long yu. Ating yu tu bai pilim olsem bel bilong yu i stap isi.

Baibel ritim bilong Ogas:

◼ Song 87-118

[Futnot]

[Rait long pes 13]

“Mi wok long pilim olsem nau mi ken go klostu moa long Jehova, na maus bilong bel i no kotim mi moa”