Tshinela Eka Xikwembu

Lexi Rhandzaka Vululami

Vaheveru 10:26-31

XANA u tshame u khomiwa hi ndlela ya tihanyi, kumbexana hi munhu loyi a nga tisoliki nikatsongo, naswona swi tikombaka onge a nga si tshama a xupuriwa? Swa tika swinene ku tiyisela xiyimo xo tano, ngopfu-ngopfu loko munhu loyi a ku khomeke hi ndlela yoleyo ku ri loyi a wu langutele leswaku a ku rhandza ni ku ku khathalela. U nga ha tivutisa, ‘Ha yini Xikwembu xi pfumelela swilo swo tano leswaku swi humelela?’ * I ntiyiso leswaku Yehovha Xikwembu u venga vuhomboloki hinkwabyo. Rito ra yena, ku nga Bibele, ra hi tiyisekisa leswaku u ta xupula lava alaka ku endla leswi nga swinene. A hi kambisiseni marito ya muapostola Pawulo lama tsariweke eka Vaheveru 10:26-31.

Pawulo u tsale a ku: “Loko hi hanya hi xidyoho hi vomu endzhaku ka loko hi amukele vutivi lebyi kongomeke bya ntiyiso, a ka ha salanga xitlhavelo xa swidyoho.” (Ndzimana 26) Vanhu lava dyohaka hi vomu a va nge rivaleriwi nikatsongo. Ha yini? Xo sungula, a va endli xidyoho xin’we lexi ko tala munhu a xi endlaka a nga swi xiyi hikwalaho ka leswi a nga hetisekangiki. Va dyoha hi ku phindha-phindha, va swi endla mukhuva. Xa vumbirhi, va dyoha hi vomu. Hilaha Bibele yin’wana yi swi vekaka hakona, “va endla vubihi hi xikongomelo.” (The Bible in Basic English) Ku dyoha se swi dzime timitsu etimbilwini ta vona. Xa vunharhu, a va dyohi hileswi va nga riki na vutivi. Va ni “vutivi lebyi kongomeke bya ntiyiso” malunghana ni ku rhandza ka Xikwembu ni tindlela ta xona.

Xana Xikwembu xi va languta njhani vadyohi lava nga hundzukiki tlhelo lava vavisaka van’wana? Pawulo u ri: “A ka ha salanga xitlhavelo xa swidyoho.” Gandzelo ra Kreste, ku nga nyiko leyi Xikwembu xi yi nyikeke vanhu, yi funengeta swidyoho leswi hi swi endlaka hikwalaho ka leswi hi nga hetisekangiki. (1 Yohane 2:1, 2) Kambe lava endlaka xidyoho handle ko hundzuka va kombisa leswaku a va na mhaka ni nyiko leyi ya risima. Ematihlweni ya Xikwembu, va ‘kandziyele N’wana wa xona va tlhela va languta ngati ya Yesu yi ri ya ntikelo lowu tolovelekeke.’ (Ndzimana 29) Hi swiendlo swa vona, va kombisa leswaku va n’wi tekela ehansi Yesu ni ku teka ngati yakwe “tanihi nchumu wa nxavo wa le hansi” leyi nga riki ya nkoka ku fana ni ya munhu un’wana ni un’wana la nga hetisekangiki. (Today’s English Version) Nkutsulo wa Kreste a wu nge va vuyerisi vanhu vo tano lava nga nkhensiki.

I yini leswi vanhu vo homboloka va nga ta langutana na swona? Xikwembu xa vululami xi tshembisile: “Ku rihisela i ka mina; hi mina ndzi nga ta tlherisela.” (Ndzimana 30) Hinkwavo lava tiyimiseleke ku endla xidyoho hi ku twisa van’wana ku vava va fanele va tivonela. Ku hava munhu loyi a nga tlulaka milawu ya Xikwembu yo lulama a nga xupuriwi. Hakanyingi vanhu lava endlaka swilo swo homboloka va kuma vuyelo bya swiendlo swa vona. (Vagalatiya 6:7) Hambiloko va nga yi kumi hakelo ya kona sweswi, Xikwembu xi ta va avanyisa enkarhini lowu taka loko xi herisa vubihi hinkwabyo emisaveni leyi. (Swivuriso 2:21, 22) Pawulo u lemukise a ku: “I nchumu lowu chavisaka ku wela emavokweni ya Xikwembu lexi hanyaka.”—Ndzimana 31.

Ku dyondza leswaku Yehovha Xikwembu a nga swi amukeli ku dyoha hi vomu swa hi chavelela swi tlhela swi hi khutaza, ngopfu-ngopfu lava tshameke va vavisiwa hi vadyohi lava tlanyaleke timbilu. Ku rihisela a hi ku tshikeleni Xikwembu lexi vengaka vuhomboloki hinkwabyo.

[Nhlamuselo ya le hansi]