Dyondzo Ya Mavunwa 6: Xikwembu Xi Amukela Ku Tirhisiwa Ka Swifaniso Evugandzerini
Xana dyondzo leyi ya mavunwa yi huma kwihi?
“Vakreste vo sungula a va nga swi tirhisi swifaniso evugandzerini bya vona . . . Ku pfumeleriwa ka swifaniso ekerekeni kwalomu ka lembe-xidzana ra vumune ni ra vuntlhanu, swi amukeriwile hi xivangelo xa leswaku vanhu lava nga riki na mhaka ni vukhongeri a va ta kota ku dyondza mintiyiso ya Vukreste eka swona, ematshan’weni yo dyondza eka tidyondzo to karhi kumbe tibuku.”— Cyclopedia of Biblical, Theological, and Ecclesiastical Literature, leyi tsariweke hi McClintock na Strong, Vholumo 4, matluka 503 na 504.
I yini leswi Bibele yi swi dyondzisaka?
“U nga tshuki u tiendlela xifaniso lexi vatliweke, niloko xi ri xifaniso xihi ni xihi xa swilo leswi nge henhla etilweni, niloko xi ri xa swilo leswi nge hansi emisaveni, niloko xi ri xa swilo leswi nge ematini, ehansi ka misava; u nga tshuki u swi nkhinsamela, niloko ku ri ku swi tirhela.” (Eksoda 20:4, 5, Bibele Ya Xitsonga) Muapostola Yohane u tsalele Vakreste va lembe-xidzana ro sungula a ku: “Vana lavatsongo, tivoneleni swifaniso.”—1 Yohane 5:21.
Hilaha tikereke ti vulaka hakona, xana swifaniso swo pfuna ntsena ku tshinela ni ku xixima leswi swi swi yimelaka? The Encyclopedia of Religion yi ri: “Swi nga ha endleka leswaku eku sunguleni swifaniso a swi tirhiseriwa ku dyondzisa hi ku kongoma ni ku sasekisa ndhawu; yoleyo a ku ri ndlela leyi a va tiyimelela ha yona. Kambe ku vuriwe leswaku hi ku famba ka nkarhi swi tlhele swi tirhisiwa tanihi swifaniso swa vugandzeri. Sweswo a swi ri ntiyiso eka swifaniso leswi a swi tirhisiwa ngopfu hi kereke ya Orthodox ya le Vuxeni.” Hambiswiritano, muprofeta Esaya u vutise hi ku kongoma a ku: “Mi ta fanisa Xikwembu na mani, mi ta endla xifaniso xihi xa yena?”—Esaya 40:18, Bibele Ya Xitsonga.
Ringanisa tindzimana leti ta Bibele: Esaya 44:13-19; Mintirho 10:25, 26; 17:29; 2 Vakorinto 5:7
I NTIYISO LESWAKU:
Xikwembu a xi swi amukeli ku tirhisiwa ka swifaniso
FULARHELA TIDYONDZO TA MAVUNWA, U NAMARHELA NTIYISO
I yini leswi hi nga gimetaka ha swona eka nkatsakanyo wa tidyondzo ta mavunwa leti ta ha dyondzisiwaka hi tikereke to tala? “Timhaka [leti] ta mavunwa [hi Xigriki, myʹthos] leti kunguhatiweke hi mano” a ti fani ni ntiyiso wa Bibele lowu olovaka ku wu twisisa wu tlhela wu chavelela.—2 Petro 1:16.
Hikwalaho, handle ko ba mariri, hi vukheta ringanisa leswi Rito ra Xikwembu ri swi vulaka, ku nga xihlovo xa ntiyiso—ni leswi u dyondzisiweke swona. (Yohane 17:17) Kutani, xitshembiso lexi xi ta va ntiyiso eka wena: “Mi ta tiva ntiyiso, kutani ntiyiso wu ta mi ntshunxa.”—Yohane 8:32.