Tshinela Eka Xikwembu

Xa Swi Tsundzuka Leswaku “Hi Ntshuri”

“A NDZI nga tshembi leswaku Yehovha u ta ndzi rivalela hilaha ku heleleke naswona a ndzi ehleketa leswaku ndzi ta rhwala ndzhwalo lowu vutomi bya mina hinkwabyo.” Marito lawa ma tsariwe hi wansati un’wana la nga Mukreste malunghana ni swihoxo leswi a swi endleke enkarhini lowu nga hundza. Hakunene ku kingindziwa hi ripfalo i ndzhwalo lowu swi tikaka ku wu rhwala. Hambiswiritano, Bibele yi nyikela nchavelelo lowu nga ta herisa switlhavi swa mudyohi la hundzukeke. Xiya marito ya mupisalema Davhida lama nga eka Pisalema 103:8-14.

Davhida a swi tiva leswaku “Yehovha u ni tintswalo” naswona a nga “tshameli ku kuma xihoxo” eka hina. (Tindzimana 8-10) Loko Xikwembu xi hi kombisa musa xi hi kombisa wona hilaha ku heleleke ni hi ku tiyimisela. Davhida a ri mutlhokovetseri la nga ni vutshila, u tirhise swifananiso swinharhu ku kombisa musa lowukulu lowu Xikwembu xi hi kombiseke wona.

“Tanihi leswi matilo ma tlakukeke ku tlula misava, musa wakwe wa rirhandzu wu tlakukile ehenhla ka lava va n’wi chavaka.” (Ndzimana 11) Loko nivusiku hi langutisa tinyeleti ehenhla, a hi nge swi koti ku twisisa mpfhuka lowukulu lowu nga kona exikarhi ka xirimela xa matilo ni misava. Xisweswo, Davhida u hlamarisiwe hi tintswalo letikulu ta Yehovha, ku nga xikombiso xa musa wakwe wa rirhandzu. Xidyondzi xin’wana xi vule leswaku tintswalo leti i ta “lava chavaka” Xikwembu—lava nga ni “mbilu yo titsongahata, ku nga mbilu leyi xiximaka vulawuri bya xona.”

“Kukota leswi vuhuma-dyambu byi nga ekule ni vupela-dyambu, hi ndlela leyi fanaka, ku tlula ka hina milawu u ku veke ekule na hina.” (Ndzimana 12) Vuhundzuluxeri byin’wana byi ri, “kukota leswi vuxa byi hambanaka ni vupela-dyambu.” Xana swi hambane hi mpfhuka wo tanihi kwihi? Hi mpfhuka lowu u nga wu anakanyaka kunene. Buku yin’wana ya tinhlamuselo ta Bibele yi ri: “Loko hi teka riendzo hi ya evuxeni, hi ya hi va ekule ni le vupela-dyambu.” Laha Davhida u hi byela leswaku loko Xikwembu xi hi rivalela swidyoho swa hina, xi swi susa swi ya ekule na hina laha hi nga taka hi nga swi koti ku swi vona.

“Kukota loko tatana a kombisa tintswalo eka vana vakwe, Yehovha u kombise tintswalo eka lava va n’wi chavaka.” (Ndzimana 13) Davhida, loyi a a ri tatana, a swi tiva leswi tatana la nga ni rirhandzu a titwisaka xiswona embilwini yakwe. Tatana yoloye u susumeteleka ku kombisa vana vakwe ntwela-vusiwana, ngopfu-ngopfu loko va ri emaxangwini. Davhida wa hi tiyisekisa leswaku Tata wa hina wa le tilweni la nga ni rirhandzu u kombisa tintswalo eka vana vakwe va laha misaveni, ngopfu-ngopfu loko timbilu ta vona leti hundzukeke ti ‘tshovekile ti tlhela ti pfotloseka’ hikwalaho ka swidyoho swa vona.—Pisalema 51:17.

Endzhaku ka swifananisi sweswo swinharhu, Davhida u vule leswi susumeteleke Yehovha ku kombisa tintswalo eka vanhu lava nga hetisekangiki, u te: “Yena u ku tiva kahle ku vumbeka ka hina, wa tsundzuka leswaku hi ntshuri.” (Ndzimana 14) Yehovha wa swi tiva leswaku hi swivumbiwa leswi vumbiweke hi ntshuri leswi tsaneke. Leswi Yehovha a xi xiyaka xidyoho lexi hi nga tswariwa na xona, u “lunghekele ku rivalela”—ntsena loko hi hundzuka swi suka embilwini.—Pisalema 86:5.

Xana mbilu ya wena yi khumbiwa hi marito lama vuriweke hi Davhida malunghana ni tintswalo ta Yehovha? Wansati la tshahiweke eku sunguleni ka xihloko lexi u kambisise leswi Bibele yi swi vulaka malunghana ni ku va Xikwembu xi ri lexi lunghekeleke ku rivalela naswona u susumeteleke ku vula a ku: “Ndzi sungula ku swi vona leswaku hakunene ndzi nga tshinela eka Yehovha naswona ndzi titwa ndzi rhuliwe ndzhwalo emakatleni ya mina.” * Ha yini u nga dyondzi leswi engetelekeke malunghana ni tintswalo ta Xikwembu ni ndlela leyi u nga tikumaka ha yona? Kumbexana na wena u nga titwa u rhuliwe ndzhwalo emakatleni ya wena.

Tindzimana ta Bibele leti u nga ti hlayaka hi August:

▪ Pisalema 87-118

[Nhlamuselo ya le hansi]

[Marito lama tshahiweke exihlokweni lama nga eka tluka 13]

“Ndzi sungula ku swi vona leswaku hakunene ndzi nga tshinela eka Yehovha naswona ndzi titwa ndzi rhuliwe ndzhwalo emakatleni ya mina”