NHLOKOMHAKA YA XIFUNENGETO
Timbhoni Ta Yehovha I Vamani?
“I khale ndzi n’wi tiva Mike. I Mbhoni ya Yehovha kambe vukhongeri lebyi bya yena a ndzi byi twisisi. I mani Yehovha? Ha yini Timbhoni ti nga tlangeli tiholideyi? Xana swi nga endleka leswaku Mike u tihlanganise ni mpambukwa?”—Becky wa le California eU.S.A.
“Loko vaakelani va mina va sungula ku dyondza ni Timbhoni ta Yehovha, ndzi tivutisile: ‘Ri vula yini vito leri nge Timbhoni ta Yehovha? A ri tolovelekanga eka vukhongeri!’”—Zenon wa le Ontario eCanada.
“Mina ni nsati wa mina a hi ehleketa leswaku Timbhoni ta Yehovha ti hi endzela leswaku ti ta hi byela leswaku hi vahedeni hikuva a hi ngheni kereke. A hi tibyele leswaku hambiloko ho tshuka hi lava ku ya ekerekeni, a hi nge pfuki hi yile eka Timbhoni ta Yehovha.”—Kent wa le Washington eU.S.A.
“Entiyisweni a ndzi nga swi tivi leswaku kahlekahle Timbhoni i vamani, ni leswi ti pfumelaka eka swona.”—Cecilie wa le Esbjerg eDenmark.
Swi nga endleka leswaku u tshame u ti vona ti ri karhi ti chumayela hi yindlu ni yindlu kumbe etindhawini ta mani na mani, ti nyika vanhu tibuku leti sekeriweke eBibeleni ti tlhela ti dyondza Bibele ni vanhu mahala. Swi nga endleka leswaku ti tshame ti ku nyika magazini. Hambiswiritano, u nga ha tivutisa leswaku kahlekahle Timbhoni ta Yehovha i vamani? Kumbexana na wena u titwa ku fana ni lava ku vulavuriweke ha vona laha henhla.
Loko na wena u ri ni swivutiso kumbe swin’wana leswi ku karhataka, u nga ti kuma kwihi tinhlamulo? U nga swi tiva njhani leswi Timbhoni ta Yehovha ti pfumelaka eka swona? Xana ntirho wa tona wo dyondzisa ni tindhawu ta tona to gandzela swi khathaleriwa njhani hi timali?
Cecilie loyi a tshahiweke laha u ri: “Ndzi dyondza swo tala hi Timbhoni ta Yehovha eka Internet. Ndzi twe mavarivari hi tona naswona sweswo swi endle ndzi nga ti tsakeli.” Kambe hi ku famba ka nkarhi, u vulavule ni Timbhoni ta Yehovha hi ku kongoma naswona u kume tinhlamulo leti n’wi eneriseke.
Xana na wena u nga tsakela ku kuma tinhlamulo leti nga ntiyiso hi Timbhoni ta Yehovha? Hi ku khutaza leswaku u lava nhlamulo eka Timbhoni ta Yehovha hi toxe, ku nga tona ti kandziyisaka magazini lowu. (Swivuriso 14:15) Ha tshemba leswaku tinhlokomhaka leti landzelaka ti ta ku pfuna leswaku u vona leswaku kahlekahle hina hi vamani, leswi hi pfumelaka eka swona, u tlhela u twisisa ntirho lowu hi wu endlaka.
