“Loko lavo homboloka va hluka ku fana ni byanyi ni loko hinkwavo lava endlaka leswo biha swi va fambela kahle, swi va tano leswaku va ta loviseriwa makumu.”—PISALEMA 92:7.

Hilaha hi dyondzeke hakona eka nhlokomhaka leyi nga hundza, swilo swo tala swo biha swi ya swi humelela ngopfu. Sweswo a swi fanelanga swi hi hlamarisa. Phela, leswi swi profetiwile eBibeleni eka 2 Timotiya 3:1-5 leswaku “emasikwini yo hetelela” vanhu va ta endla swilo swo biha swinene. Hi vula yini loko hi ku “emasikwini yo hetelela?” Hi vula masiku yo hetelela ya misava leyi ya vanhu lava nga swi laviki ku yingisa Xikwembu. Ku nga ri khale, Xikwembu xi ta lovisa lava nga swi laviki ku cinca mahanyelo ya vona yo biha. Kutani, ku ta sala ntsena vanhu lavanene lava yingisaka Xikwembu. “Lavo lulama va ta tshama emisaveni, va ta hanya eka yona hilaha ku nga heriki.”—Pisalema 37:29.

“Xikwembu lexi nyikaka ku rhula xi ta pfotlosa Sathana.”—VARHOMA 16:20.

Loko Sathana, madimona ni vanhu hinkwavo vo homboloka  va nga ha ri kona, ku ta va ni ku rhula emisaveni. Muvumbi wa hina wa tshembisa a ku: “A [mi] nge chavisiwi hi munhu.”—Mikiya 4:4.

“Tabernakela ya Xikwembu yi le xikarhi ka vanhu . . . Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.”—NHLAVUTELO 21:3, 4.

Ku xaniseka ni vuvabyi swi ta hela hikuva Xikwembu xi ta lulamisa ku onhaka hinkwako loku vangiweke hi Sathana, Adamu, Evha ni ku nga hetiseki ka hina. Hikwalaho ka sweswo, ni “rifu a ri nge he vi kona.” Vanhu lava rhandzaka Muvumbi va tlhela va n’wi yingisa va ta hanya hilaha ku nga heriki. Kambe va ta hanya kwihi?

“Mananga ni ndhawu leyi nga riki na mati swi ta tsaka, ni ndhawu leyi nga mananga yi ta tsaka, yi rhumbuka kukota safroni.”—ESAYA 35:1.

Loko Xikwembu xi lovisa lavo homboloka, misava yi ta va paradeyisi! Ku ta va ni tiphaka ni mintanga yo tala yo saseka naswona ku ta va ni swakudya swo tala. (Pisalema 72:16) Malwandle, mativa ni milambu swi ta va swi basile swi tlhela swi tala hi swilo leswi hanyaka. Vanhu a va nga he tsundzuki leswaku misava a yi thyakisiwile. Vanhu va ta tiakela makaya ya vona va tlhela va tshama eka wona. A ku nge he vi na munhu loyi a nga ta pfumala kaya, a nga ta sika kumbe a va xisiwana.—Esaya 65:21, 22.

“Ku ta va ni ku pfuxiwa ka [vafi].” —MITIRHO 24:15.

Xana u nga swi tsakela ku tlhela u vona maxaka ni vanghana va wena lava feke? Xikwembu xa matimba hinkwawo xi ta va pfuxa eParadeyisini emisaveni. U ta va tiva na vona va ta ku tiva. Anakanya ndlela leyi wena na vona mi nga ta tsaka ha yona! Hikwalahokayini hi nga tiyisekaka leswaku leswi swi ta endleka? Hikuva Bibele yi ni swikombiso swa vanhu lavakulu ni vana lava pfuxiweke kutani va tlhela va hlangana ni mindyangu ya vona. Hikwalaho, Yesu u pfuxe vanhu lava feke vanhu vo tala va ri karhi va swi vona.—Luka 8:49-56; Yohane 11:11-14, 38-44.