Timbhoni ta Yehovha ti ni malembe yo tlula 100 ti ri kona eKorea naswona ti gandzela hi ku ntshunxeka. Xiphiqo lexikulu lexi Timbhoni ti langutanaka na xona eKorea Dzonga i ku tshamela ku tengisiwa hikuva ti ala ku ya evusocheni hileswi ripfalo ra tona ri nga ti pfumeleriki.

Korea Dzonga a ri yi tekeli enhlokweni mfanelo ya lava ripfalo ra vona ri nga va pfumeleriki ku ya evusocheni naswona a ri va nyiki mintirho yin’wana leyi nga fambisaniki ni vusocha. Majaha lama nga Timbhoni lama alaka ku ya evusocheni hikwalaho ka leswi ripfalo ra wona ri nga ma pfumeleriki, ma gweviwa ku ya tshama ekhotsweni tin’hweti ta 18. N’hweti na n’hweti kwalomu ka 40 ku ya eka 50 wa vavanuna lava nga Timbhoni va khotsiwa. Loko va ntshunxiwa, va va se va ri ni rhekhodo ya leswaku va tshame va voniwa nandzu hi huvo ya nawu leswi endlaka swi tika ku kuma ntirho naswona a va swi koti ku kuma swilo leswi mfumo wu swi nyikaka vaakatiko lavan’wana.

Nakambe vavanuna lava tshameke va ya leteriwa vusocha va va ni swiphiqo loko se va dyondze tidyondzo ta Bibele to tanihi ku rhandza vaakelani va vona ni ku nga ha dyondzi nyimpi. Hikuva loko ku tlhekeka nyimpi, a va pfumeli ku ya enyimpini kutani va tengisiwa ni ku gweviwa.

Komiti ya Timfanelo ta Vanhu ya Nhlangano wa Matiko yi teke swiboho swo tlula 500 ku lwisana ni swiendlo swa Korea Dzonga swo bakanyela etlhelo timfanelo ta lava ripfalo ra vona ri nga va pfumeleriki ku ya evusocheni naswona Korea Dzonga ra tiyimelela hi ku vula leswaku a ri “tshovi nawu loko ri khotsa” Timbhoni. Yi tlhele yi vula leswaku tiko ra Korea Dzonga ri fanele “ri papalata swiendlo leswi fanaka” enkarhini lowu taka. Ku lulamisa mhaka leyi swi vula leswaku Korea Dzonga ri fanele ri xixima mfanelo ya ntshunxeko wa ripfalo ni ya vukhongeri.