Xana Mali I Sathana?
Nhlamulo ya Bibele
Doo! Ku na xivulavulelo lexi nga duma lexi nge “mali i Sathana.” Kambe Bibele a yi vuli swona leswaku mali i Sathana naswona a yi vuli leswaku mali hi yona yi vangaka swilo hinkwaswo swo biha. Bibele yi vula leswaku “ku rhandza ngopfu mali i rimitsu ra leswo biha hinkwaswo.” a—1 Timotiya 6:10, Bibele Mahungu Lamanene.
Bibele yi ri yini hi mali?
Bibele yi vula leswaku loko hi yi tirhisa kahle mali, yi nga hi pfuna naswona yi nga va “xisirhelelo.” (Eklesiasta 7:12) Nakambe yi tlhela yi bumabumela lava kombaka van’wana malwandla hi ku va nyika leswi va nga na swona ku katsa ni mali.—Swivuriso 11:25.
Kambe Bibele yi tlhela yi hi lemukisa leswaku hi nga endli mali yi va ya nkoka swinene ku tlula swilo hinkwaswo evuton’wini. Yi ri: “Mi nga rhandzi mali, kambe enerisekani hi swilo leswi mi nga na swona.” (Vaheveru 13:5) Leswi hi swi dyondzaka i ku, a hi fanelanga hi rhangisa mali kumbe hi hlongorisa rifuwo. Ku ri na sweswo, hi fanele hi eneriseka hi swakudya, swiambalo ni ndhawu yo tshama.—1 Timotiya 6:8.
Hikwalaho ka yini Bibele yi hi tsundzuxa leswaku hi nga rhandzi mali?
Vanhu va makwanga a va nge byi kumi vutomi lebyi nga heriki. (Vaefesa 5:5) Xivangelo xin’wana hileswaku makwanga i muxaka wun’wana wa ku gandzela swifaniso kumbe wa vugandzeri bya mavunwa. (Vakolosa 3:5) Kasi xin’wana, vanhu lava nga ni makwanga loko va ri karhi va lavana ni tindlela to kuma leswi va swi lavaka hakanyingi va cinca ni mahanyelo lamanene. Swivuriso 28:20 yi ri: ‘Lava hatliselaka ku kuma rifuwo a va nge tshami va nga ri na nandzu.’ Va nga ha endla ni milandzu leyikulu yo fana ni ku xungeta van’wana leswaku va ta kuma mali, ku khoma nkuzi, vukungundzwana, ku tlhakisa kumbe ku dlaya.
Hambiloko munhu loyi a rhandzaka mali a nga endli swilo swo biha ku nga ha va ni switandzhaku swin’wana. Bibele yi ri: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuphukuphuku loku va vavisaka.”—1 Timotiya 6:9.
Hi vuyeriwa njhani loko hi yingisa xitsundzuxo xa Bibele xa leswaku hi nga rhandzi mali?
Loko hi nga pfumeleli mali yi hi endlisa swilo leswi hi swi tivaka leswaku swi hoxile hi ta va ni xindzhuti naswona Xikwembu xi ta hi tsakela xi tlhela xi hi seketela. Xikwembu xi tshembisa lava lavaka ku xi tsakisa hi timbilu ta vona hinkwato xi ku: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Vaheveru 13:5, 6) Xi tlhela xi hi tiyisekisa leswaku “munhu wo tshembeka u ta kuma mikateko yo tala.”—Swivuriso 28:20.
a Tibibele tin’wana ti hlamusela tsalwa leri hi ndlela leyi: “Ku rhandza mali i rimitsu ra mixaka hinkwayo ya swilo swo biha.”
U Nga Ha Tsakela
XALAMUKA!
Xana Hi Fanele Hi Yi Teka Njhani Mali?
Swivutiso swa nkombo swo tikambela ha swona swi nga ku pfuna ku vona loko u rhandza mali.
XALAMUKA!
Swilo Swinharhu Leswi Mali Yi Nga Kotiki Ku Swi Xava
Mali yi endla leswaku hi kota ku xava swilo swo karhi leswi hi swi lavaka, kambe ntsako lowukulu evuton’wini hi wu kuma eka swilo leswi mali yi nga kotiki ku swi xava.
SWIVUTISO LESWI HLAMURIWAKA HI BIBELE
Xana Bibele Yi Nga Ku Pfuna Loko U Ri Ni Swiphiqo Swa Timali Ni Swikweleti?
Mali a yi nge endli leswaku munhu a tsaka, kambe milawu ya mune ya le Bibeleni yi nga ku pfuna etimhakeni ta wena ta timali.
TINHLAMUSELO TA TIVHESE TA BIBELE
Matewu 6:34 Yi Hlamuseriwa—“Mi Nga Tshuki Mi Vilela Hi Siku Leri Landzelaka”
Yesu a nga ku hi tshika ku pulana vumundzuku.
XIHONDZO XO RINDZA
Ndlela Leyi Mi Nga Yi Tirhisaka Ha Yona Mali
Mali ya ndyangu hi yona xihlovo xa timholovo. Twana leswaku Bibele yi nga ku pfuna njhani leswaku u lulamisa xiphiqo xa wena xa mali.
TIDYONDZO TA BIBELE
Ringeta Dyondzo Ya Hina Ya Bibele
Kuma dyondzo ya Bibele ya mahala leyi katsaka wena ni mudyondzisi wa wena.