Magoza lama lavekaka leswaku munhu a va Mbhoni ya Yehovha ma hlamuseriwe hi Yesu naswona ma kumeka eka Matewu 28:19, 20. Tsalwa rero ri hlamusela leswi munhu a faneleke a swi endla leswaku a va mudyondzisiwa wa Kreste, leswi katsaka ku vulavula kumbe ku chumayela hi Yehovha.

 Goza 1: Dyondza leswi Bibele yi swi dyondzisaka. Yesu u lerise vadyondzisiwa vakwe ku ‘endla vanhu vadyondzisiwa, va va dyondzisa.’ (Matewu 28:19, 20) Rito leri hundzuluxeriweke ri va “mudyondzisiwa” hi ku kongoma ri vula “mudyondzi.” Bibele, ngopfungopfu tidyondzo ta Yesu Kreste leti kumekaka eka yona, ti ni rungula leri u ri lavaka leswaku u ta tsaka u tlhela u va ni vutomi lebyi nga ni xikongomelo. (2 Timotiya 3:16, 17) Hi tsakela ku ku pfuna leswaku u dyondza leswi Bibele yi swi dyondzisaka hi ku dyondza na wena Bibele mahala.​—Matewu 10:7, 8; 1 Vatesalonika 2:13.

 Goza 2: Tirhisa leswi u swi dyondzaka. Yesu u vule leswaku lava dyondzaka va fanele va tlhela va “yingisa hinkwaswo leswi [a] va leriseke swona.” (Matewu 28:20) Leswi swi vula leswaku ku dyondza ka wena Bibele a ku fanelanga ku va ku fambisa nkarhi​, swi nga ha lava leswaku u u cinca ndlela leyi u ehleketaka ha yona ni mahanyelo ya wena. (Mitirho 10:42; Vaefesa 4:22-29; Vaheveru 10:24, 25) Lava yingisaka swileriso swa Yesu va susumeteleka ku endla swiboho swo n’wi landzela hi ku nyikela vutomi bya vona eka Yehovha Xikwembu.​​—Matewu 16:24.

 Goza 3: Khuvuriwa. (Matewu 28:19) EBibeleni ku khuvuriwa swi fanisiwa ni ku lahliwa. (Ringanisa Varhoma 6:2-4.) Swi fanisiwa ni ku fa eka mahanyelo ya khale kutani u sungula lamantshwa. Kutani ku khuvuriwa ka wena, i xitiyisekiso xa le rivaleni xa leswaku u hete magoza mambirhi yo sungula lama Yesu a ma hlamuseleke naswona u kombela Xikwembu leswaku xi endla u va ni ripfalo leri baseke.​—Vaheveru 9:14; 1 Petro 3:21.

 Vulavula ni vakulu va vandlha. Va ta vulavula na wena ku tiyiseka loko u swi twisisa leswi vulaka swona ku khuvuriwa, loko u ri eku tirhiseni ka leswi u swi dyondzeke ni loko u nyiketele vutomi bya wena eka Xikwembu hi ku swi rhandza.​—Mitirho 20:28; 1 Petro 5:1-3.

 Ina. Hilaha Bibele yi lerisaka hakona, hi kurisa vana va hina “hi ku va tshinya ni hi swileriso swa Yehovha.” (Vaefesa 6:4) Hambiswiritano, loko va ri karhi va kula, va fanele va tiendlela swiboho swo dyondza, swo amukela ni ku tirhisa leswi Bibele yi swi dyondzisaka va nga si fanelekela ku khuvuriwa. (Varhoma 12:2) Kambe, munhu un’wana ni un’wana u fanele a tiendlela xiboho mayelana ni ku gandzela.​—Varhoma 14:12; Vagalatiya 6:5.