Hi yingisa Bibele hi ku helela mayelana ni ndlela leyi Xilalelo xa Hosi xi faneleke xi endliwa ha yona lexi nakambe xi vitaniwaka Xitsundzuxo xa rifu ra Yesu. (1 Vakorinto 11:20) Ndlela leyi tikereke to tala ti xi endlaka ha yona Xilalelo xa Hosi a yi fambisani ni leswi Bibele yi swi vulaka.

 Xikongomelo xa Xilalelo xa Hosi i ku tsundzuka Yesu ni ku khensa gandzelo leri a ri nyikeleke hikwalaho ka hina. (Matewu 20:28; 1 Vakorinto 11:24) Xilalelo lexi a ko va nchumu wa vukhongeri lowu endlaka vanhu va faneriwa hi ku kombiwa tintswalo kumbe ku rivaleriwa swidyoho. Bibele yi dyondzisa leswaku a hi rivaleriwi swidyoho hikwalaho ko endla nkhuvo wa vukhongeri kambe hi kota ku rivaleriwa swidyoho ntsena loko hi ri ni ripfumelo eka Yesu.​—Varhoma 3:25; 1 Yohane 2:1, 2.

 Yesu u lerise vadyondzisiwa vakwe leswaku va endla Xilalelo xa Hosi kambe a nga vulanga hi ku kongoma leswaku va fanele va xi endla kangani. (Luka 22:19) Van’wana va vona onge xi fanele xi endliwa n’hweti ni n’hweti kasi van’wana va xi endla vhiki rin’wana ni rin’wana, masiku hinkwawo, mikarhi yo hlayanyana esikwini kumbe va xi endla mikarhi yo tala hilaha munhu a vonaka swi fanerile ku endla hakona. Kambe ku ni swivangelo leswi faneleke swi kambisisiwa.

 Yesu u sungule Xilalelo xa Hosi hi siku leri Vayuda a va tlangela Paseka ha rona naswona u fe endzhakunyana hi siku rero. (Matewu 26:1, 2) Leswi a swi nga lo kotlana. Matsalwa ma fanisa gandzelo ra Yesu ni Paseka ya xinyimpfana. (1 Vakorinto 5:7, 8) Paseka a yi tlangeriwa kan’we lembe ni lembe. (Eksoda 12:1-6; Levhitika 23:5) Hilaha ku fanaka, Vakreste va le mikarhini ya Bibele a va endla Xitsundzuxo xa rifu ra Yesu kan’we hi lembe, a Timbhoni ta Yehovha na tona ti landzela endlelo rolero ra le Bibeleni.

 Ndlela leyi Yesu a nga xi endla ha yona Xilalelo yi hi pfuna ku tiva leswaku xi fanele xi endliwa kangani, hi siku rihi ni nkarhi wa kona. U xi endle loko ri pela hi 33 C.E. hi siku ra vu-14 hi n’hweti ya Nisani, hi ku ya hi khalendara ya Bibele. (Matewu 26:18-20, 26) Lembe ni lembe hi endla Xitsundzuxo hi siku leri, ku fana ni ndlela leyi Vakreste va le mikarhini ya Bibele a va endla hakona. b

 Hambileswi ti 14 ta Nisani ta lembe ra 33 C.E. a ti ri hi Ravuntlhanu, lembe ni lembe siku leri ri nga ha wela eka siku rin’wana ni rin’wana evhikini. Lexi hi pfunaka ku tiva siku ra Nisani 14 lembe ni lembe i ku tirhisa mahlayelelo lama a ma tirhisiwa enkarhini wa Yesu, ku nga ri mahlayelelo lama tirhisiwaka hi tikhalendara ta masiku lawa ta Xiyuda. c

 Yesu u tirhise xinkwa lexi nga cheriwangiki swo xi kukumukisa ni vhinyo yo tshwuka loko a sungula Xilalelo xa Hosi ku nga swilo leswi a swi sele loko ku tlangeriwa Paseka. (Matewu 26:26-28) Hi tirhisa xinkwa lexi nga cheriwangiki swo kukumukisa kumbe swilo swin’wana ni vhinyo leyi nga pfanganisiwangiki na nchumu, ku nga ri juzi ya madiriva kumbe vhinyo yo tsokombela kumbe leyi cheriweke swichelachelani.

 Tikereke tin’wana ti tirhisa xinkwa lexi cheriweke swo kukumukisa kumbe yeast, kambe eBibeleni swo kukumukisa swi fanekisela xidyoho ni nchumu lowu onhakaka. (Luka 12:1; 1 Vakorinto 5:6-8; Vagalatiya 5:7-9) Kutani xinkwa lexi nga cheriwangiki swo kukumukisa kumbe swilo swin’wana xi wu yimela kahle miri wa Kreste lowu nga riki na xidyoho. (1 Petro 2:22) Endlelo rin’wana leri van’wana va ri tirhisaka kambe ri nga humiki eBibeleni i ku tirhisa juzi ya madiriva ematshan’weni yo tirhisa vhinyo leyi nga cheriwangiki nchumu. Tikereke tin’wana ti endla sweswo hileswi ti nga byi tirhisiki byala ku nga nchumu lowu nga riki kona eBibeleni.​—1 Timotiya 5:23.

 Xinkwa lexi nga cheriwangiki swo kukumukisa ni vhinyo yo tshwuka leswi tirhisiwaka eXitsundzuxweni ko va swifanekiselo swa miri ni ngati ya Kreste. A swi hundzuriwi hi singita swi pfanganisiwa ni nyama ni ngati yakwe ya xiviri hilaha van’wana va ehleketaka hakona. Twana swivangelo swa le Matsalweni leswi seketelaka mhaka leyi.

•   Loko Yesu a lerise vadyondzisiwa vakwe leswaku va nwa ngati yakwe, swi vula leswaku a a va lerisa leswaku va tlula nawu wa Xikwembu lowu a wu vula leswaku vanhu a va fanelanga va dya ngati. (Genesa 9:4; Mitirho 15:28, 29) Leswi ku nge vi ntiyiso hikuva Yesu a nge pfuki a lerise vanhu leswaku va tlula nawu wa Xikwembu lowu vulaka leswaku ngati ya kwetsima.​—Yohane 8:28, 29.

•   Loko ku ri leswaku vaapostola va yi nwile ngati ya Yesu, a a ta va a nga vulanga leswaku ngati yakwe ‘yi ta halatiwa’ ku kombisa leswaku wa ha ta nyikela hi vutomi byakwe byi va gandzelo.—Matewu 26:28.

•   Yesu u nyikele hi vutomi byakwe byi va gandzela “kan’we swi helela kwalaho.” (Vaheveru 9:25, 26) Loko ku ve xinkwa ni vhinyo a swi hundzuka nyama ni ngati yakwe hi nkarhi wa Xilalelo xa Hosi, swi vula leswaku lava a va swi dya va ri endle ko tala gandzelo rakwe.

•   Yesu u te: “Tshamani mi ri karhi mi endla leswi leswaku mi ndzi tsundzuka” ku nga ri ku “ndzi endla gandzelo.”—1 Vakorinto 11:24.

 Lava tshembaka leswaku xinkwa ni vhinyo swi hundzuka miri ni ngati ya Yesu, va vula leswaku dyondzo leyi yi huma eka marito ya matsalwa yo karhi ya Bibele. Hi xikombiso, eTibibeleni to tala marito ya Yesu ma hundzuluxeriwe hi ndlela leyi: “Leyi i ngati ya mina.” (Matewu 26:28) Kambe, marito ya Yesu ma nga tlhela ma hundzuluxeriwa hi ndlela leyi: “Leswi swi fanekisela ngati ya mina,” “leswi swi vula ngati ya mina.” d Yesu a tolovele ku dyondzisa hi ku tirhisa swifaniso.​—Matewu 13:34, 35.

 Loko Timbhoni ta Yehovha ti endla Xilalelo xa Hosi, i vanhu vatsongo ntsena lava dyaka xinkwa ni ku nwa vhinyo. Hikwalaho ka yini ku ri vanhu vatsongo?

 Ngati ya Yesu leyi halakeke yi endle “ntwanano lowuntshwa” lowu siveke ntwanano lowu Yehovha Xikwembu a wu endleke ni tiko ra khale ra Vaisrayele. (Vaheveru 8:10-13) Lava nga xiphemu xa ntwanano wolowo va dya swifanekiselo swa Xitsundzuxo. Kambe a hi Vakreste hinkwavo lava dyaka ku dya ntsena “lava vitaniweke” hi Xikwembu hi ndlela yo hlawuleka. (Vaheveru 9:15; Luka 22:20) Lava hi vona lava nga ta fuma na Kreste etilweni naswona Bibele yi vula leswaku i vanhu va 144 000 ntsena lava nga ta kuma nkateko wolowo.​—Luka 22:28-30; Nhlavutelo 5:9, 10; 14:1, 3.

 Ku hambana ni lava “ntlhambinyana” lava vitaniweke ku ya fuma na Kreste, vo tala va hina hi ni ntshembo wo va xiphemu xa “ntshungu lowukulu” lowu nga ta hanya laha misaveni hilaha ku nga heriki. (Luka 12:32; Nhlavutelo 7:9, 10) Hambileswi vo tala va hina lava nga ni ntshembo wa ku hanya emisaveni hi nga dyeki xinkwa ni ku nwa vhinyo ya Xitsundzuxo, hi va kona eXitsundzuxweni leswaku hi kombisa ku khensa leswi Yesu a hi endleleke swona, hi ku nyikela hi vutomi byakwe byi va gandzelo hikwalaho ka hina.—1 Yohane 2:2.