Ndzi velekiwe eCanada exidorobanini xa Calgary eAlberta. Loko ndza ha ri ntsongo, vatswari va mina va dlaye vukati kutani mina na manana hi rhurhe hi ya tshama na vakokwana. A va hi rhandza swinene naswona a ndzi ri n’wana loyi a tsakeke. Ndza ha yi tsundzuka kahle mikarhi yo tsakisa leyi ndzi veke na yona emalembeni wolawo ya ku rhula loko ndza ha ri ntsongo.

 Vutomi byi sungule ku ndzi tikela endzhaku ka loko manana a vuyelelane na tatana loko ndzi ri ni malembe ya nkombo naswona hi rhurhele eSt. Louis, Missouri, eUnited States. Ndzi sungule ku xiya leswaku tatana mikarhi yin’wana a a ri ni tihanyi. Hi xikombiso, loko ndzi vuya ekaya hi siku ro sungula exikolweni lexintshwa, u kume leswaku ndzi biwile naswona a ndzi lwanga. U kwate ngopfu lerova a ndzi mbeyetela ku tlula ndlela leyi vana va le xikolweni va ndzi beke hayona! Leswi a a ringeta ku ndzi dyondzisa swona ndzi swi veke embilwini naswona ndzi lwe nyimpi ya mina yo sungula loko ndzi ri ni malembe ya nkombo.

 Tatana a a tshamela ku tlhava manana hi marito naswona sweswo a swi hlundzukisa manana lerova a tlherisela ni ku tlhela a ba tatana. Ndzi sungule ku tirhisa swidzidziharisi ni ku kukutlela byala loko ndzi ri ni malembe ya 11. Ndzi ve ni madzolonga naswona hakanyingi a ndzi tshamela ku lwa ni vanhu eswitarateni. Loko ndzi thwasa exikolweni xa le henhla, se a ndzi ri ni madzolonga swinene.

 Loko ndzi ri ni malembe ya 18, ndzi joyine vusocha bya U.S. Marine Corps. Kwalaho ndzi kume vuleteri bya xiyimo xa le henhla bya ku dlaya vanhu. Endzhaku ka malembe ya ntlhanu, ndzi tshike vusocha ivi ndzi ya dyondza dyondzo ya swa miehleketo (psychology) leswaku ndzi ta kuma ntirho wa Federal Bureau of Investigation. Ndzi sungule tidyondzo ta mina ta le yunivhesiti eUnited States naswona ndzi ye emahlweni na tona loko ndzi tlhelela eCanada.

 Mahanyelo ya vanhu va le yunivhesiti ni ya vanhu van’wana ma ndzi tekele ntsako. A va vonaka va lava leswi vuyerisaka vona vini, swilo emisaveni a swi vonaka swi nga pfuni nchumu naswona swiphiqo swa vanhu a swi vonaka onge a swi nge tlhantlheki. Ndzi heleriwe hi ntshembo wa leswaku vanhu va nga swi kota ku endla misava leyi yi va ndhawu leyinene.

 Leswi a ndzi nga swi tivi leswaku ndzi hanyela yini, a ndzi tshamela ku kukutlela byala ku tlula mpimo, ndzi tirhisa swidzidziharisi, ndzi rhandza mali ni timhaka ta masangu. A ndzi tshamela ku ehleketa ntsena hi ndhawu leyi a ndzi ta tihungasa eka yona kumbe wansati loyi a ndzi ta endla timhaka ta masangu na yena. Vuleteri bya le vusocheni byi ndzi endle ndzi va ni nkani ni ku tshamela ku lwa. A ndzi tibyela leswaku ndzi nga hlawulela vanhu leswi nga swinene ni leswi nga riki swinene naswona a ndzi tlhontlha loyi ndzi vonaka onge a nga va khomi kahle van’wana. Kambe entiyisweni, se a ndzi ri hlonga lerikulu ra madzolonga.

 Siku rin’wana, loko mina ni munghana wa mina hi dakwe hi swidzidziharisi ekamareni ra le hansi ra le kaya naswona hi ri karhi hi lunghiselela ku posa mbangi leyi nga riki enawini leswaku yi ya xavisiwa, munghana wa mina u ndzi vutise loko ndzi tshembela eka Xikwembu. Ndzi n’wi hlamule ndzi ku: “Loko Xikwembu ku ri xona xi hi vangelaka ku xaniseka laha misaveni, a ndzi lavi ku twa nchumu hi xona!” Loko hi siku leri landzelaka ndzi ya entirhweni wa mina lowuntshwa, mutirhi kuloni loyi a ri Mbhoni ya Yehovha u ndzi vutise a ku: “U swi vona njhani, xana u ehleketa leswaku Xikwembu hi xona xi vangaka ku xaniseka emisaveni?” Xivutiso xexo xi ndzi hlamarisile hikwalaho ka leswi a ndza ha ku swi vula eka siku leri nga hundza naswona xi ndzi endle ndzi lava ku tiva swo tala. Eka tin’hweti ta tsevu leti landzeleke, hi ve ni mabulo yo tala naswona u ndzi kombe tinhlamulo ta le Bibeleni ta swivutiso swa mina swo tika mayelana ni vutomi.

 Wansati loyi a ndzi lava ku tekana na yena loyi a hi tshama swin’we, a a nga lavi no twa loko ndzi n’wi byela hi swilo leswi a ndzi swi dyondza. Siku rin’wana hi Sonto, ndzi n’wi byele leswaku ndzi rhambe Timbhoni ti ta dyondza na hina Bibele. Hi siku leri landzelaka loko ndzi vuya hi le ntirhweni, ndzi kume a longe nhundzu hinkwayo endlwini ivi a ndzi siya. Ndzi humele ehandle ndzi ya rila. Ndzi tlhele ndzi khongela eka Xikwembu ndzi xi kombela leswaku xi ndzi pfuna. Rolero a ku ri siku ro sungula loko hi xikhongelo ndzi tirhisa vito ra Xikwembu leri nge, Yehovha.—Pisalema 83:18.

 Endzhaku ka masiku mambirhi, ndzi dyondze Bibele ro sungula ni vatekani va Timbhoni. Loko va fambile, ndzi sale ndzi hlaya buku leyi a hi dyondza hi yona leyi nge, You Can Live Forever in Paradise on Earth kukondza ndzi yi heta hi vusiku byebyo. a Leswi ndzi swi dyondzeke hi Yehovha Xikwembu ni n’wana wakwe Yesu Kreste, swi ndzi khumbe mbilu. Ndzi dyondze leswaku Yehovha u ni ntwelavusiwana naswona u twa ku vava loko hi xaniseka. (Esaya 63:9) Ndzi khumbiwe hi ndlela leyi Xikwembu xi ndzi rhandzaka hayona ni hileswi n’wana wa xona a nyikeleke hi vutomi byakwe hikwalaho ka mina. (1 Yohane 4:10) Ndzi gimete hileswaku Yehovha a a ri eku ndzi lehiseleni ka mbilu “hikuva a nga naveli leswaku ku lova ni un’we, u lava leswaku vanhu hinkwavo va hundzuka.” (2 Petro 3:9) Ndzi tivonele hi ya mina leswaku Yehovha a a lava ndzi va munghana wakwe.—Yohane 6:44.

 Hi vhiki rero ndzi sungule ku ya etinhlengeletanweni ta vandlha. A ndzi fuwe misisi yo leha, ndzi ri ni swingwavila etindleveni ni ku languteka ndzi chavisa kambe Timbhoni a ti tsakile ku ndzi vona, onge hiloko ndzi ri xaka ra tona leri ku nga khale ti nga se ri vona. A va tikhoma tanihi Vakreste va ntiyiso. Ndzi titwe ndzi tlhelele ekaya eka vakokwana kambe sweswi endhawini leyi tsakisaka swinene.

 Hi ku hatlisa leswi a ndzi swi dyondza eBibeleni swi cince vutomi bya mina. Ndzi tsemete misisi ya mina, ndzi tshika ku tikhoma ku biha hi swa masangu, swidzidziharisi ni ku kukutlela byala. (1 Vakorinto 6:9, 10; 11:14) A ndzi lava ku tsakisa Yehovha. Hikwalaho, loko ndzi dyondza leswaku a nga yi tsakeli ndlela leyi a ndzi tikhoma hayona, a ndzi tiyimelelanga. Ku ri na sweswo, ndzi titwe onge ndzi tlhaviwa mbilu hi mukwana. A ndzi tibyela leswi: ‘A ndzi nge yi emahlweni ndzi tikhoma hi ndlela leyi.’ A ndzi ta ringeta ku cinca matikhomelo ni swiendlo swa mina. Hikwalaho, ndzi sungule ku vona vuyelo byo endla swilo hi ndlela ya Yehovha. Endzhaku ko dyondzisiwa Bibele tin’hweti ta tsevu, ndzi khuvuriwile ndzi va un’wana wa Timbhoni ta Yehovha hi July 29, 1989.

 Bibele yi ndzi pfune ndzi cinca mahanyelo ya mina. Khale a ndzi tala ku va ni madzolonga loko ndzi pfukiwa hi un’wana. Kambe sweswi ndzi lwela ku va “ni ku rhula ni vanhu hinkwavo.” (Varhoma 12:18) A ndzi ti bi xifuva hikwalaho ka leswi kambe ndzi khensa Yehovha hileswi Rito rakwe ni moya wakwe lowo kwetsima swi ndzi pfuneke ndzi hundzuka.—Vagalatiya 5:22, 23; Vaheveru 4:12.

 Sweswi ndzi lwela ku endla hinkwaswo leswi ndzi nga swi kotaka leswaku ndzi tsakisa Yehovha Xikwembu, ku ri ni ku va hlonga ra swidzidziharisi, madzolonga ni ku tikhoma ko biha hi swa masangu. Sweswo swi katsa ku pfuna van’wana leswaku va n’wi tiva. Endzhaku ka malembe ma nga ri mangani ndzi khuvuriwile, ndzi rhurhele endhawini yin’wana ndzi ya pfuneta ku chumayela laha ku nga ni xilaveko lexikulu xa vachumayeri. Ku ringana malembe yo tala, ndzi ve ni ntsako hikwalaho ko dyondzisa vanhu Bibele ni ku vona ndlela leyi yi cinceke vutomi bya vona hilaha yi endleke hakona eka mina. Ndza tsaka swinene hileswi manana a veke un’wana wa Timbhoni ta Yehovha endzhaku ko vona ndlela leyi Bibele yi ndzi pfuneke hayona ndzi cinca ku tikhoma ka mina ni swiendlo swa mina swo biha.

 Hi 1999 eEl Salvador, ndzi thwasile exikolweni lexi sweswi xi vuriwaka Xikolo xa Vachumayeri va Mfumo. Xikolo xexo xi ndzi letele ku rhangela eka ntirho wo chumayela ni ku dyondzisa kahle ni ku va murisi evandlheni. Hi lembe rero, ndzi tekane na Eugenia nsati wa mina loyi ndzi n’wi rhandzaka swinene. Hi tirha swin’we tanihi vachumayeri va nkarhi hinkwawo eGuatemala.

 Sweswi ematshan’weni yo tshama ndzi nga tsakanga hi vutomi bya mina, ndzi khapakhapa hi ntsako. Ku tirhisa leswi ndzi swi dyondzaka eBibeleni swi ndzi tshunxile eka ku va hlonga ra ku tikhoma ku biha hi swa masangu ni ku va ni madzolonga naswona swi ndzi endle ndzi hanya vutomi lebyi fuweke hi rirhandzu ra ntiyiso ni ku rhula.