Римлыларга 3:1—31
3 Алайса, яһүд булуның ни өстенлеге яки сөннәтле булуның ни файдасы бар?
2 Күп кенә яклардан бар. Иң элек, аларга Аллаһының изге сүзләре ышанып тапшырылган булган.+
3 Аларның кайберләре имансыз булып чыкса да, шуннан ни? Аларның имансыз булулары Аллаһыны тугрылыксыз итәме?
4 Һич тә юк! Хәтта һәр кеше ялганчы булып чыкса да,+ Аллаһы хак булыр.+ Шулай дип язылган да: «Син үз сүзләреңдә гадел дип саналырсың һәм хөкем ителгәндә җиңәрсең».+
5 Әгәр тәкъвасызлыгыбыз Аллаһының тәкъва булуын ассызыклый икән, инде нәрсә әйтик, Аллаһы безгә үз ярсуын белдергәндә, гаделсез эш итәме? (Хәзер мин кеше карашыннан чыгып әйтәм.)
6 Һич тә юк! Юкса Аллаһы дөньяны ничек хөкем итәр?+
7 Әмма минем ялганым аркылы Аллаһының хакыйкате ачыграк күренеп аңа дан китерә икән, ни өчен, алайса, мин гөнаһ кылучы итеп хөкем ителәм?
8 Ни өчен: «Әйдәгез, яхшылык килсен өчен, яманлык кылыйк»,— дип әйтмәскә? Кайберәүләр, имеш без шулай әйтәбез, дип, безгә яла ягып йөриләр. Алар тиешле җәза алачак.+
9 Соң? Безнең хәлебез яхшыракмы? Һич тә юк! Чөнки без инде ачык күрсәттек: яһүдләр дә, греклар да — барысы да гөнаһ хакимлеге астында.+
10 Болай дип язылган бит: «Бер тәкъва кеше дә юк, берәү дә;+
11 зирәк кеше дә, Аллаһыны эзләүче дә юк.
12 Барысы да юлдан тайпылган, барысы да яраксыз булып киткән. Игелек кылучы бер кеше дә юк».+
13 «Аларның бугазлары — ачык кабер, телләре белән алдыйлар».+ «Авызларында — зәһәр елан агуы».+
14 «Авызлары ләгънәт һәм ачу белән тулы».+
15 «Аяклары кан коярга ашыга».+
16 «Юлларында һәлакәт һәм газап.
17 Алар тынычлык юлын танып белмәде».+
18 «Аллаһыдан курку дигән нәрсә юк аларда».+
19 Ә безгә шул билгеле: һәркайсы авыз дәшмичә торсын өчен һәм бар дөнья Аллаһының җәзасына дучар булсын өчен, Канунда әйтелгәннәр Канунны тотучылар өчен язылган.+
20 Шуңа күрә беркем дә канун эшләре аша аның каршында тәкъва дип игълан ителмәячәк,+ чөнки канун аша гөнаһ турында төгәл белем бирелә.+
21 Ләкин хәзер шунысы ачык: кеше Канунны үтәмичә дә Аллаһы каршында тәкъва була ала.+ Бу турыда Канун һәм пәйгамбәрләр язмалары да шаһитлек итә.+
22 Әйе, һәр иман итүче Гайсә Мәсихкә иман итү аша Аллаһы каршында тәкъва була ала, кешеләр арасында аерма юк бит.+
23 Чөнки барысы да гөнаһ кылган һәм Аллаһының даныннан мәхрүм калган.+
24 Ә Аллаһының юмарт игелеге һәм Мәсих Гайсәнең аларны азат итәр өчен түләнгән йолымы ярдәмендә+ алар тәкъва дип игълан ителә,+ һәм бу — Аллаһының юмарт бүләге.+
25 Аллаһы Гайсәне аның канына иман итү аша+ үзе белән татулаштыручы* корбан итеп биргән.+ Ул моны үз тәкъвалыгын күрсәтер өчен эшләгән, чөнки Аллаһы сабырлык күрсәтеп үткәндәге гөнаһларны кичергән.
26 Ул моны хәзер дә, Гайсәгә иман итүче кешене тәкъва дип игълан иткәндә,+ үз тәкъвалыгын күрсәтеп торыр өчен эшләгән.+
27 Алайса, кешенең мактанырлык берәр сәбәбе бармы? Юк. Нинди канун мактанырга бирми? Кылган эшләргә игътибар итүче канунмы?+ Юк. Иманның барлыгына игътибар итүче канун.
28 Без болай дип саныйбыз: кеше канунга буйсынып кылган эшләренә карап түгел, ә иманына карап тәкъва дип игълан ителә.+
29 Ул яһүдләр Аллаһысы гынамы?+ Башка халыклар Аллаһысы да түгелме?+ Әйе, ул башка халыкларның да Аллаһысы.+
30 Аллаһы бер булганга,+ ул сөннәтлеләрне иманнары нигезендә һәм сөннәтсезләрне иманнары аша тәкъва дип игълан итәчәк.+
31 Димәк, без үз иманыбыз белән канунны гамәлдән чыгарабызмы? Һич тә юк! Киресенчә, без аны раслыйбыз.+
Искәрмәләр
^ Яки «йолып алучы».