Ekihongwa kya Yesu nugwo omulingo Ruhanga akozesa kujuna abantu, kuruga omu kibi n’okufa.’ Baibuli eyeta esagama ya Yesu eyasesekere ekicunguro eky’ahairweyo. (Abefeso 1:7; 1 Petero 1:18, 19) Egi niyo ensonga habwaki Yesu yagambire ngu akaija ‘kuhayo obwomeezi bwe okucungura baingi.’​—Matayo 20:28.

Habwaki ekicunguro kyali nikyetaagwa?

 Omusaija ow’okubanza, Adamu akahangwa ahikiriire kandi ataine kibi. Akaba aine omugisa ogw’okwomeera ebiro n’ebiro baitu akagufeerwa habw’okucwamu kujeemera Ruhanga. (Okubanza 3:17-19) Obuyazaire abaana, akabagweta ekibi eki. (Abarumi 5:12) Habw’ensonga enu, Baibuli n’eyoleka ngu Adamu “aketunda” kandi yatunda n’abaana be omu bwiru bw’ekibi n’okufa. (Abarumi 7:14, NWT) Habwokuba abantu boona tibahikiriire, busaho n’omu akaba n’asobora kutucungura akatugarurra Adamu ekiyatuferiize.​—Zabuli 49:7, 8.

 Ruhanga akakwatirwa embabazi baijukuru ba Adamu abakaba bataine okunihira kwona. (Yohana 3:​16) Baitu habwokuba Ruhanga agumira ha ndengo ze ez’obwinganiza, ataganyire kwonka baijukuru ba Adamu habw’ekibi ekibagwetirwe ataine nambere asigikiriire. (Zabuli 89:14; Abarumi 3:23-26) Habwokuba Ruhanga agonza muno abantu, akakora entekaniza eiyakukozeseze kuganyira abantu habw’ebibi byabo kandi n’okubihiraho kimu. (Abarumi 5:6-8) Entekaniza egi niyo ey’ekicunguro.

Ekicunguro kikora kita?

 Omu Baibuli, ekigambo ekicunguro nikitwarramu ebintu bisatu:

1.   Nugwo Omuhendo ogusasurwa.​—Okubara 3:46, 47.

2.   Kirugamu okulekerwa, rundi okucungurwa.​—Okuruga 21:30.

3.   Kiba nikinganaingana n’omuhendo gw’ekintu ekisasuliirwe. *

 Wetegereze omulingo ebintu binu bisatu birukukwatagana n’ekihongwa Yesu Kristo ekiyahaireyo.

1.   Okusasura. Baibuli n’egamba ngu Abakristaayo ‘bakagurwa n’omuhendo.’ (1 Abakolinso 6:20; 7:23) Omuhendo ogu niyo sagama ya Yesu, eiyakozeseze kugurra Ruhanga abantu kuruga omu buli ruganda, orulimi, hamu n’ihanga.​—Okusuku’rwa 5:8, 9.

2.   Okucungurwa. Ekihongwa kya Yesu ‘kitucungura’ kuruga omu kibi.​—1 Abakolinso 1:30; Abakolosai 1:14; Abaheburaniya 9:15.

3.   Kwinganaingana. Ekihongwa kya Yesu nikiganainganira kimu n’ekyo Adamu ekiyaferiirwe, kandi nubwo obwomeezi obuhikiriire. (1 Abakolinso 15:21, 22, 45, 46) Baibuli n’egamba eti: “Baitu nkabaingi okubafokere abasisi obwokutahurra okwomuntu omu [Adamu], nukwo obwokuhurra okwomu [Yesu Kristo] abaingi balifoka bati abahikiriire.” (Abarumi 5:19) Kinu nikisoborra omulingo okufa kw’omuntu omu kusasura ekicunguro habw’abasiisi baingi. Amananu gali, ekihongwa kya Yesu ‘kicunguro’ habwabo boona abakora ebirukwetaagisa kukigasirwamu.​—1 Timoseo 2:​5, 6.