OBU HABAHO EBIZIBU EBY’AMAANI, NAIWE OYEKAGUZA, ‘RUHANGA ABAIRE ALI NKAHA?’ RUNDI OMU BWOMEEZI BWAWE, ORAHIKIRWEHO EKIZIBU EKYAKULETIIRE KWEKAGUZA RUHANGA OBWARAABA N’AKUFAAHO IWE NK’OMUNTU?

N’osobora kuba naiwe n’oyehurra nka Sheila, arukwikara omu ihanga lya Amerika. Habw’okukurra omu ka ey’erumu ediini, nagamba ngu: “Kuruga omu buto, nkaba ningonza Ruhanga habwokuba nuwe yatuhangire. Baitu, nkaba ntarukwehurra ngu ndihaihi nauwe. Nkaba manyire ngu nandora, baitu nandorra hara. Nkaba ntarukwehurra ngu Ruhanga akanoba baitu nkaba ntarukwikiriza ngu nanfaaho.” Habwaki Sheila akaba aine okugurukyagurukya kunu? Nagamba ngu: “Eka yaitu ekahikwaho ebizibu ebihonderaine, kandi kikanzookera ngu Ruhanga akaba atarukutukonyera nakake.”

Nka Sheila, naiwe nosobora kuba omanyiire kimu ngu Ruhanga Ow’obusobozi bwona aroho. Baitu kandi, nosobora kuba noyekaguza mali Ruhanga obwaraaba nakufaaho iwe nk’omuntu. Omusaija owakaba ahikiriire arukwikiririza omu maani n’amagezi ga Ruhanga arukwetwa Yobu, nauwe akatunga okugurukyagurukya. (Yobu 2:3; 9:4) Hanyuma ya Yobu kuhikwaho ebizibu ebihonderaine​—kandi atarukurora bukonyezi bwona—​akakaguza Ruhanga ati: “Noserekera ki amaiso gawe, nonyeta omunyanzigwa wawe?”​—Yobu 13:24.

Baibuli eyegesa ki? Tusemeriire kujunaana Ruhanga obu habaho ebizibu? Haroho obwakaiso bwona oburukwoleka ngu Ruhanga nafaaho abantu boona hamu naiwe nk’omuntu? Nikisoboka omuntu kumanya Ruhanga obwaraaba naturora, natwetegereza, natusalirirwa rundi natukonyera omu bizibu byaitu?

Omu bicweka ebirukwongeraho, nitwija kurora nk’oku ebyahangirwe bitwegesa omulingo Ruhanga atufaaho. (Abarumi 1:20) Hanyuma, nitwija kwetegereza kiki Baibuli eky’eyegesa ha kufaayo kwa Ruhanga. Obworayeyongera ‘kumumanya’ kurabira omu bintu ebiyahangire hamu n’Ekigambo kye, noija kweyongera kugumiza kimu ngu ‘nakutaho omutima’​—1 Yohana 2:3; 1 Petero 5:7.