Kupharazgira Ŵanthu ŵa Mtundu wa Sinti na Roma ku Germany
Ŵanthu ŵanandi ŵa mtundu wa Sinti na Roma ŵakukhala ku Germany. * Mwasonosono apa, Ŵakaboni ŵa Yehova ŵali kufumiska tumapepara twa nkhani za mu Baibolo, tumabuku, kweniso mavidiyo mu chiyowoyero cha ŵanthu aŵa, Chiromany. *
Apo Ŵakaboni ŵa Yehova ŵakachitanga upharazgi wapadera uwo ukamba mu September m’paka mu October 2016, ŵakagwiliskira ntchito mabuku na vinthu vinyake vya chiyowoyero cha Chiromany kuti ŵapharazgire ŵanthu ŵa mtundu wa Sinti na Roma awo ŵakukhala mu misumba yakupambanapambana ku Germany. Ndipo yinyake mwa misumba iyi ni Berlin, Bremerhaven, Freiburg, Hamburg, na Heidelberg. Kweniso ŵakanozga vyakuti mu Nyumba za Ufumu za mu vigaŵa ivi muchitike maungano gha mu Chiromany.
Ŵanthu Ŵakakondwa Chomene
Ŵanthu ŵa mtundu wa Sinti na Roma ŵakazizwa kweniso ŵakakondwa chomene na upharazgi wapadera uwu. Andre na Esther, awo mbakutorana ndipo ŵakachitako upharazgi uwu, ŵakati: “Ŵanandi ŵakakondwa chomene chifukwa tikaŵikapo mtima kuti tiŵapharazgire.” Ŵanthu ŵanandi wakakhwaskika chomene ŵakati ŵapulika kweniso kuŵerenga uthenga wa mu Baibolo mu chiyowoyero chawo. Mama munyake wakazizwa chomene wakati wawonelera vidiyo ya mu Chiromany yakuti, Chifukwa Wuli Mukwenera Kusambira Baibolo? Mwakuwerezgawerezga wakatenge, “Ichi ntchiyowoyero chane na!”
Kaboni munyake zina lake Matthias, uyo nayo wakachitako upharazgi uwu ku Hamburg, wakayowoya kuti: “Ine na muwoli wane tikaŵa pa gulu la ŵanthu 8 ndipo tikaluta ku chigaŵa chinyake icho kukukhala ŵanthu ŵa mtundu wa Sinti na Roma ŵakukwana pafupifupi 400. Munthu waliyose uyo tikadumbiskana nayo wakapemphanga mabuku ghithu.” Bettina, uyo nayo wakajipeleka kuchitako upharazgi uwu ku Hamburg, wakati: “Ŵanthu ŵanyake ŵakafika na pakulira ŵakati ŵawona kuti Ŵakaboni ŵa Yehova ŵafumiska mabuku mu chiyowoyero cha Chiromany.” Ndipo ŵanyake para ŵapokera waka buku nyengo yeneyiyo ŵakambanga kuŵerenga mwakukwezga, kweniso ŵanyake ŵakapemphanga mabuku ghanyake kuti ŵakapeko ŵanyawo.
Ŵanthu ŵanyake ŵa mtundu wa Sinti na Roma ŵakazomera kwiza ku maungano gha mpingo agho ŵakaŵachemerako. Ndipo ku Hamburg ŵanthu 94 awo ŵakiza ku maungano agha, ŵanandi kakaŵa kakwamba kunjira mu Nyumba ya Ufumu. Ku Reilingen, uko nkhufupi na ku Heidelberg, ŵanthu 123 ŵakiza ku maungano. Maungano ghati ghamara, ŵanthu 5 ŵa chiyowoyero cha Chiromany ŵakapempha kuti ŵambe kusambira Baibolo.
Pa upharazgi wapadera uwu, Ŵakaboni ŵa Yehova ŵakagaŵira ŵanthu mathirakiti na maburosha pafupifupi 3,000. Ŵakadumbiskana na ŵanthu ŵa mtundu wa Sinti na Roma ŵakujumpha 360, ndipo ŵanthu 19 ŵakamba kusambira Baibolo. Ŵanthu ŵanandi ŵayowoya kuti, “Ntchakukondweska chomene kuti nase Chiuta watighanaghanira.”
^ ndime 2 Ŵanthu ŵa mtundu wa Sinti nkhagulu kachoko waka ka ŵanthu ako kakusangika ku Western na Central Europe, ndipo mtundu wa Roma, nkhagulu kachoko waka ka ŵanthu ako kali kufuma ku Eastern na Southeastern Europe.
^ ndime 2 Buku linyake la pa intaneti (Encyclopædia Britannica) likuti Chiromany chilipo cha “mitundu 60 panji kujumphaso apa.” Mu nkhani iyi mazgu ghakuti “Chiromany” ghakung’anamura chiyowoyero icho chikuyowoyeka na ŵanthu ŵa mtundu wa Sinti na Roma awo ŵakukhala ku Germany.