Nkhababikira mu tawuni ya Calgary ku Alberta, Canada. Apo nkhaŵa mwana, adada na mama nthengwa yikamara ndipo ine na amama tikamba kukhala na agogo. Agogo ŵakatitemwanga chomene ndipo nkhaŵa wakukondwa. Nichali kukumbuka umo nkhakondweranga apo nkhaŵa mwana.

 Apo nkhaŵa na vyaka 7, amama ŵakaweleranaso na adada ndipo tikasamira ku St. Louis, Missouri, ku the United States. Pakati pajumpha kanyengo, nkhamanya kuti adada mbankhaza. Mwachiyelezgero, zuŵa lakwamba nati nawerako ku sukulu, adada ŵakamanya kuti ŵanyane ku sukulu ŵakanitimba kweni ine nkhawezgera yayi. Ŵakakwiya chomene ndipo ŵakanitimba chomene kuluska umo ŵakanitimbira ŵanyane ku sukulu! Apa adada ŵakanisambizga kuti nane niwezgerenge para ŵanyane ŵanitimba, ntheura nkhamba kutimbana na ŵanthu apo nkhaŵa na vyaka 7.

 Amama ŵakakondwanga yayi na nkharo yiheni ya adada, ndipo kanandi ŵakakhaliranga waka kugazgana. Apo nkhaŵa na vyaka 11, nkhamba kumwa moŵa kweniso munkhwala wakutimbanizga wongo. Nkhakaŵanga yayi kukwiya ndipo kanandi nkhatimbananga na ŵanthu mu misewu. Apo nkhamalizganga sukulu ku sekondare ndipo nkharo yane yikafikirathu paheni.

 Apo nkhaŵa na vyaka 18, nkhamba ntchito ya usilikari ku U.S. Marine Corps. Uku, nkhasambira maluso ghakofya gha umo ningachitira vinthu. Pakati pajumpha vyaka 5, nkhaleka ntchito ya usilikari ndipo nkhaluta ku yunivesite kukasambira umo ŵanthu ŵakughanaghanira (psychology), chifukwa nkhakhumbanga kuzakagwira ntchito ku Federal Bureau of Investigation. Pakwamba nkhasambiranga ku yunivesite ya ku United States, ndipo pamasinda nkhasamira ku Canada, uko nkhakalutizga masambiro ghane.

 Apo nkhaŵa ku yunivesite nkhakhuŵara chomene na ivyo ŵanthu ŵakachitanga. Ŵanthu ŵakajighanaghaniranga waka ŵekha, vinthu vikendanga makora yayi mu charu, ndipo nkhawonanga kuti masuzgo gha ŵanthu ghangamara yayi. Nkhaleka kugomezga kuti ŵanthu ŵanganozga vinthu pa charu.

 Nkhawonanga kuti umoyo ngwakuzirwa yayi, ntheura nkhakhaliranga waka kumwa moŵa, kugwiliskira ntchito munkhwala wakuzweteska wongo, uzaghali na kupenjisiska ndalama. Nkhatandaliranga waka mu viphikiro ndipo nkhasinthanga ŵanakazi nga vyakuvwara. Ivyo nkhasambira ku usilikari vikanipangiskanga kuti nikhalirenge waka kutimbana na ŵanthu. Nkhenderanga fundo zane ndipo nkhamarananga na waliyose uyo nawona kuti wakuchitira ŵanthu vinthu vyambura urunji. Kweni kuyowoya unenesko, nkhazgoka muzga wankhaza.

 Zuŵa linyake ine na mubwezi wane tikagwiliskira ntchito munkhwala wakuzweteska wongo apo tikaŵa ku nyumba kwane ndipo tikanozgeka kuti tikaguliske chamba. Kweni munyane wakanifumba usange nkhugomezga Chiuta panji yayi. Nkhamuzgora kuti, “Usange Chiuta ndiyo wakupangiska masuzgo mu charu, ningakhumba yayi kuti nimumanye!” Zuŵa lakulondezgapo, nkhamba ntchito ku kamupani yinyake. Uyo nkhagwiranga nayo ntchito wakaŵa Kaboni wa Yehova ndipo wakanifumba kuti, “Kasi ukughanaghana kuti Chiuta ndiyo wakupangiska masuzgo agho ghali mu charu?” Fumbo ili likanizizika chomene, chifukwa mayiro ghake ndilo tikadumbiskananga na munyane ntheura nkhanweka chomene kuti nimanye zgoro lake. Pakati pajumpha myezi 6, nkhasambira vinthu vinandi chomene. Wakanizgoranga kufuma mu Baibolo mafumbo ghane ghose ghanonono agho nkhaŵa nagho ghakukhwaskana na umoyo.

 Panyengo iyi nkhakhalanga na chibwezi chane, kweni chikakhumbanga yayi kuti nichiphalirengeko ivyo nkhasambiranga. Zuŵa linyake nkhachiphalira kuti napempha Ŵakaboni wa Yehova kuti ŵize kunyumba ŵazakatisambizge Baibolo. Zuŵa lakulondezgapo apo nkhaweranga ku ntchito, nkhasanga kuti chibwezi chane chafumapo panyumba ndipo chayola katundu yose uyo wakaŵa munyumba. Nkhafumira pawaro na kwamba kulira. Nkhalombaso Chiuta kuti wanovwire. Aka kakaŵa kakwamba kuti nizunure zina la Chiuta lakuti Yehova mu lurombo.—Salimo 83:18.

 Pakati pajumpha mazuŵa ghaŵiri, nkhamba kusambira Baibolo na ŵakutorana ŵanyake awo ŵakaŵa Ŵakaboni ŵa Yehova. Ŵakati ŵawera, nkhalutizga kuŵerenga buku ilo tikasambiranga la Mungathe Kukhala ndi Moyo Kosatha M’paradaiso pa Dziko Lapansi, ndipo nkhamalizga usiku umoza. * Ivyo nkhasambira vyakukhwaskana na Yehova na Mwana wake, Yesu Khristu, vikanifika pamtima. Nkhasambira kuti Yehova ngwachiwuravi ndipo vikumuŵinya chomene para tikusuzgika. (Yesaya 63:9) Nkhakondwa chomene kumanya kuti Yehova wakunitemwa, kweniso kuti Yesu wakapeleka umoyo wake kuti waniwombore. (1 Yohane 4:10) Paumaliro nkhamanya kuti Yehova wakazikira nane chifukwa “wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (2 Petrosi 3:9) Nkhawona kuti Yehova wakukhumba kuti niŵe nayo paubwezi.—Yohane 6:44.

 Sabata yeneyira nkhamba kuluta ku maungano gha mpingo. Nkhaŵa na sisi litali, nkhavwara ndeŵeleŵe ndipo nkhawonekanga wakofya chomene, kweni Ŵakaboni ŵakanipokelera makora chomene, vikaŵa nga ndine mwana wakuzgeŵa uyo ŵamupokeleraso panyumba. Nkhamanya kuti Mbakhristu ŵaunenesko nadi. Nkhajipulika nga kuti naweleraso kwa agogo ŵane ndipo tikukhala makora chomene kuluska pakwamba.

 Mwaluŵiro vinthu ivyo nkhasambiranga mu Baibolo vikamba kusintha umoyo wane. Nkhameta sisi, nkhaleka uzaghali, uloŵevu kweniso munkhwala wakuzweteska wongo. (1 Ŵakorinte 6:9, 10; 11:14) Nkhakhumbanga kukondweska Yehova. Ntheura nkhaŵikapo mtima kuti nileke nkharo ziheni chifukwa nkhasambira kuti Yehova wakukondwa yayi na awo ŵakuchita viheni. Nakuti kanandi nkhajiyimbanga mulandu para nakumbuka viheni ivyo nkhachitanga kumasinda. Mu mtima nkhati, ‘ningachitaso yayi vyanthena ivi.’ Mwaluŵiro nkhamba kusintha umo nkhaghanaghaniranga kweniso umo nkhachitiranga vinthu. Paumaliro nkhamba kuwona uwemi wakuchita khumbo la Yehova. Pa Julayi 29, 1989, nkhabatizika na kuŵa Kaboni wa Yehova. Pakaŵa kuti pajumpha waka myezi 6 kufuma apo nkhambira kusambira Baibolo.

 Baibolo lanovwira kuti nisinthe nkharo yane. Kale nkhaŵavya 2 koloko para munthu waniyamba. Kweni sono nkhuyezgayezga kuti niŵe “pamtende na ŵanthu wose.” (Ŵaroma 12:18) Nkhuviwona mwakupepuka yayi ivyo nasambira, kweni nkhuwonga waka Yehova pakunipa mzimu wake utuŵa kweniso Mazgu ghake kuti nisinthe.—Ŵagalatiya 5:22, 23; Ŵahebere 4:12.

 Sono nkhuŵika mtima pakukondweska Yehova na kumupa viwemi chomene m’malo mwa kuŵa muzga wa munkhwala wakutimbanizga wongo, moŵa na uzaghali. Nkhovwira ŵanji kuti ŵamanye Yehova. Pakati pajumpha vyaka vichoko waka kufuma apo nkhabatizikira, nkhasamira uko ŵapharazgi mbachoko kuti nkhawovwirepo pakupharazga. Vyaka vyose ivi, nkhukondwa kusambizga ŵanthu unenesko wa mu Baibolo, ndipo nkhuwona umo Baibolo likovwilira ŵanthu kusintha umoyo wawo. Nkhukondwaso chomene kuti amama nawo ŵali kusambira unenesko, ndipo chimoza icho chikaŵawovwira kuchita nthena ni umo nkhasinthira.

 Mu 1999, nkhanjira sukulu iyo sono tikuti Sukulu ya Ŵapharazgi ŵa Ufumu, ku El Salvador. Sukulu iyi yikanovwira kuti nilimbikirenge chomene kupharazga na kusambizga kweniso umo ningawovwilira ŵabali na ŵadumbu mu mpingo. Kuumaliro wa 1999, nkhatorana na muwoli wane wakutemweka, Eugenia. Tose tikuchita uteŵeti wanyengozose ku Guatemala.

 Pasono nkhukondwa chomene, vyapambana na umo nkhaŵira kale. Baibolo lanovwira kuti nileke uzaghali na nkhaza kweniso kuti nitemwenge chomene ŵanyane na kuŵa nawo pa mtende.