Maria Lúcia, wa ku Brazil, wakulwara matenda agho ghakupangiska munthu kuŵa na suzgo la kuleka kupulika kweniso pachoko na pachoko wakuleka kulaŵiska. Wakababika wakumangwa, ndipo wakasambira chiyowoyero cha mawoko apo wakaŵa muchoko. Pamanyuma apo wakaŵa na vyaka pafupifupi 30, wakamba kuleka kulaŵiska. Nangauli wali na masuzgo agha, Maria Lúcia wakujipatura yayi. Sono wali na vyaka vyakujumpha 70, kweni wakukondwa na umoyo.

 Maria Lúcia wakamanyana na Ŵakaboni ŵa Yehova mu 1977, pambere wandambe kuŵa na suzgo la maso. Iyo wakati: “Nkhakumana na munyane uyo nkhasambiranga nayo sukulu, zina lake Adriano, uyo wakaŵa kuti waŵa Kaboni mwasonosono. Wakaniphalira ivyo Chiuta wali kulayizga munthazi vya paradiso pa charu chapasi apo ŵanthu wose ŵazamusangwa na umoyo uwemi. Nkhakhorwa chomene na ivyo wakaniphalira mwakuti nkhazomera kusambira Baibolo. Nyengo yichoko waka, nkhamba kuwungana na mpingo unyake wa ku wa Rio de Janeiro, ndipo maungano ghanyake ghakang’anamurikanga mu chiyowoyero cha mawoko. Na wovwiri wa Yehova, nkhakura mwauzimu ndipo nkhabatizika mu July 1978.”

 Nyengo yati yajumphapo, Maria Lúcia wakasamira mu mpingo uwo pakaŵavya Kaboni waliyose uyo wakamanyanga chiyowoyero cha mawoko. Pakwamba likaŵa suzgo likuru chomene chifukwa wakapulikanga chilichose yayi icho chikayowoyekanga pa maungano. Ntheura ŵadumbu ŵaŵiri ŵakamovwira. Ŵakakhalanga nayo lumoza pa maungano na kumulembera manosi kuti nayo wamanye ivyo vyayowoyekanga. Maria Lúcia wakuti: “Para nafika ku nyumba nkhaŵerenganga manosi agha kanandi waka mwakuti nipulikiske ivyo vyalembeka. Kweni pamanyuma, ŵadumbu ŵaŵiri ŵara ŵakasambira chiyowoyero cha mawoko ndipo ŵakamba kuning’anamuliranga.”

 Apo suzgo lake la maso likamba kuya munthazi, Maria Lúcia wakalekerathu kuwona majesicha gha ŵadumbu ŵara ŵakamung’anamuliranga. Ntheura wakamba kugwiliskira ntchito chiyowoyero cha mawoko chakuchita kukhwaskana. So vikaŵanga wuli? Maria wakuti: “Nkhaŵikanga mawoko ghane pa mawoko gha uyo wakuning’anamulira. Para vyaŵa nthena nkhamanyanga ivyo vikuyowoyeka mu majesicha gha uyo wakung’anamura.”

 Maria Lúcia wakuwonga chomene ntchito iyo ŵakuchita awo ŵakumung’anamulira. Wakuti: “Ntchawanangwa chapadera chomene chakufuma kwa Yehova. Pakuti ŵakunovwira, nkhusanga chandulo na maungano gha mpingo, maungano gha dera, ndiposo maungano gha chigaŵa.”

 Maria Lúcia wakulimbikira chomene kupharazga. Nangauli wakuthemba chiyowoyero cha mawoko chakuchita kukhwaskana, kweni wakufiska kupharazgira ŵakumangwa, ndipo ŵakuzizwa chomene chifukwa cha chitatata chake kuti waŵapharazgire makani ghawemi. Mu nyengo ya muliri wa COVID-19, Maria Lúcia wakalemba makalata ghanandi kulembera ŵakumangwa mwakovwirika na mudumbu wake José Antônio, uyoso ngwakumangwa na wachibulumutira. a

 Kasi wakachita wuli? Iyo wakuti: “Nkhugwiliskira ntchito kanthu kakuŵa nga ntchilembo cha L. Kakunovwira kulemba mazgu mu mizere yiwemi na kuwoneska ndime makora. José Antônio wakukumbukanga makora vinthu. Wakuzunuranga nkhani za mu Baibolo na malemba ghake, ndipo ine nasazgangamo vinthu ivi mu makalata. Nkhayezganga kulemba mu nthowa yakuti munthu wakumangwa wapulike makora. Chifukwa mbakumangwa wose yayi awo ŵakumanya makora vilembo vya chiyowoyero cha mawoko vyakuchita kulemba.”

 Nangauli Maria Lúcia pasono maso ghali kufwirathu, kweni wakulimbikira kugwira ntchito. Karoline, yumoza wa awo ŵakumung’anamulira wakuti: “Maria Lúcia wakuchita milimo yake yose ya panyumba ndipo nyumba yake wakuyitozga makora chomene. Wakutemwa kuphika na kugaŵirako ŵabwezi ŵake.”

 Jefferson, uyo ni mubali mulara mu mpingo wa Maria Lúcia, wakasazgirapo kuti “Maria Lúcia wakumutemwa chomene Yehova. Wakutemwa ŵanthu. Nyengo zose wakuchita vinthu ivyo ŵanandi ŵakusanga navyo chandulo. Wakujighanaghanira yekha yayi.”—Ŵafilipi 2:4.