PARA wakutemweka winu wali kufwa, namwe mungasuzgika chomene maghanoghano. Mungaŵa na chitima, phukwa, ndipo mungasoŵa chakuchita. Nyengo zinyake mungaŵa ŵakali, mungajiyimba mulandu, kweniso mungaŵa na wofi. Panji mungakayikira usange umoyo ngwakuzirwa nadi.

Manyani kuti kuŵa na chitima ntchiheni yayi. Chitima chikulongora waka umo mukamutemweranga munthu uyo wali kufwa. Kweni kasi mungachita wuli kuti muchepeskeko chitima?

Nangauli mungawona nga chitima chimarenge yayi, kweni mungapembuzgika para mungalondezga fundo zakulondezgapo izi:

LIRANI PARA MULI NA CHITIMA

Ŵanthu ŵakulongora chitima munthowa zakupambana kweniso utali wa nyengo iyo ŵakuŵira na chitima yikupambana. Ndipouli, kulira kungamovwirani kuti muchepeskeko chitima. Vanessa uyo tangumuzunura kukwambilira wakati: “Nkhaliranga waka, nkhakhumbanga kuchepeskako vyakuŵinya. Sofía uyo munung’una wake wakafwa mwamabuchi, wakati: “Para nkhughanaghanira ivyo vikachitika vikuniŵinya chomene, ndipo vikuŵa nga nkhujura pa chilonda na kusukapo. Nangauli vikuŵinya chomene kweni vikovwira kuti chilonda chipore.”

YOWOYANI MAGHANOGHANO GHINU NA UMO MUKUJIPULIKIRA

Ntchakupulikikwa kuti nyengo zinyake mungakhumba kuti muŵe pamwekha. Kweni kuleka kuphalirako ŵanyinu  umo mukujipulikira vingaŵa nga mwanyamura katundu muzito. Jared wali na vyaka 17 ndipo adada ŵake ŵali kufwa. Iyo wakukumbuka kuti: “Nkhaphaliranga ŵanyane umo nkhajipulikiranga. Nangauli panji ivyo nkhayowoyanga vikapulikikwanga makora yayi kweni nkhajipulikangako makora para naŵaphalira.” Janice uyo tamuzunura kukwambilira kwa nkhani iyi, wakayowoyaso uwemi unyake. Iyo wakati: “Nkhapembuzgikanga chomene chifukwa cha kuphalirako ŵanyane umo nkhajipulikiranga. Nkhawonanga kuti nili na ŵanyane awo ŵakanovwiranga.”

ZOMERANI WOVWIRI

Dokotala munyake wakati: “Para nyifwa yachitika waka, munthu uyo wakuzomera wovwiri kufuma ku ŵabwezi na ŵabali ŵake pa nyengo iyi chikumuŵira chipusu kuzizipizga chitima icho chikuŵapo.” Ŵaphalirani ŵabwezi ŵinu ivyo ŵangamovwirani. Ŵangaŵa na khumbo lakuti ŵamovwirani, kweni ŵangaŵa kuti ŵakumanya yayi ivyo ŵangawovwirapo.—Zintharika 17:17.

SENDELERANI KWA CHIUTA

Tina wakati: “Mfumu wane wati wafwa na kansa, nkhaŵa kuti ningamuphaliraso yayi masuzgo ghane. Ntheura vyose nkhamuphaliranga Chiuta. Zuŵa lililose nkhambanga na kumupempha Chiuta kuti wanovwire kuzizipizga. Yehova wakanovwira mu vinandi mwakuti ningakwaniska yayi kuyowoya.” Tarsha wakaŵa na vyaka 22 apo amama ŵake ŵakafwanga. Iyo wakati: “Zuŵa lililose nkhaŵerenganga Baibolo ndipo likanipembuzganga chomene. Nyengo zose nkhasanganga fundo yakukhozga iyo nkhaghanaghanirangapo.”

GHANAGHANIRANI VYA CHIWUKA

Tina wakayowoyaso kuti: “Pakwamba nkhani ya chiwuka yikanipembuzganga yayi chifukwa ine nkhakhumbanga waka mfumu wane ndipo ŵana ŵane nawo ŵakakhumbanga adada ŵawo nyengo yeneyiyo. Kweni pakati pajumpha vyaka vinayi, nkhamba kupembuzgika na nkhani yakuti Chiuta wazamuwuska ŵakufwa. Nkhani ya chiwuka ndiyo yikunipembuzga chomene kweniso yikunovwira kuti nizizipizge. Nyengo zinyake nkhughanaghanira kuti tili lumoza na mfumu wane, ndipo ichi chikunovwira kuti niŵe wakukondwa kweniso niŵe na mtende.”

Para mubali winu wafwa, chitima chingamara nyengo yeneyiyo yayi. Ndipouli, ivyo vikachitikira Vanessa namwe vingamovwirani. Iyo wakati: “Pakwamba ukuwona nga kuti chitima chingamara yayi, kweni pachoko na pachoko chitima chikwamba kuchepa.”

Nangauli mungaleka yayi kumukumbuka uyo wali kufwa, kweni manyani kuti umoyo winu uchali wakuzirwa. Na wovwiri wa Chiuta, mungalutilira kukondwa na ŵabwezi ŵinu kweniso umoyo uwemi. Nakuti sonosono apa Chiuta wawuskenge ŵakufwa. Chiuta wakukhumba kuti muzakakumaneso na ŵakutemweka ŵinu awo ŵali kufwa. Panyengo iyi chitima chizamumalirathu kwamuyirayira.