Nkhutemwa cilengiwa kufumira waka pa wanici. Kanandi mbumba yithu yikatemwanga kuluta ku malo gha makuni ghanandi, kweniso nyanja zakutowa za mu caru cithu. Pakuti nkhutemwa comene vinyama, apo nkhaŵa mwana nkhakhumbanga nga ningavumbatira cona waliyose panji ncheŵe iyo nawona. Apo nkhakulanga nkhazizwanga comene kuwona ŵanthu ŵakucitira nkhaza vinyama. Pamasinda, nkhamba nchito ku wupu wakuwona wanangwa wa vinyama, uko nkhakumana na ŵanthu awo nawo ŵakatemwanga vinyama.

Tikafwilirapo comene kulwera wanangwa wa vinyama. Tikathandazganga uthenga na kucita viwoneskero, kususka ŵanthu awo ŵakaŵa na mashopu ghakupanga vyakuvwara kufuma ku vikumba vya vinyama kweniso awo ŵakakomanga vinyama kuti ŵasambilirepo. Kweniso tikapanga wupu uphya wakuvikilira vinyama. Cifukwa cakuti tikakhumbanga kusintha vinthu vinandi kuti tifiske cilato cithu, kanandi tikapulikananga yayi na ŵalara ŵa boma. Nkhakakikapo kanandi waka na kutolekera ku khoti.

Padera pa kufipira mtima vinyama, nkhafipangaso mtima na masuzgo ghanyake agho ghakucitika pa caru cose. Paumaliro, nkhamba kugwira nchito na mawupu ghanandi, nga ni wupu wa Amnesty International na Greenpeace. Nkhafwilirapo comene kukhozgera milimo yawo. Nkhajipeleka comene kuti nivikilire wanangwa wa ŵakavu na awo ŵakaŵa na masuzgo ghanyake.

Pamasinda nkhamanya kuti ningasintha yayi vinthu pa caru. Nangauli mawupu agha ghakamazgako masuzgo ghacokoghacoko, kweni ghakurughakuru ghakalutiliranga kuhenipa. Vikaŵa nga kuti nkhongono za muheni zili palipose ndipo palije uyo wakupwelerako. Nkhawona kuti palije ico ningacita.

Cifukwa ca citima ico nkhaŵa naco pakuwona kuti natondeka, nkhamba kughanaghana vya Ciuta kweniso Baibolo. Nyengo yinyake nkhasambirapo Baibolo na Ŵakaboni ŵa Yehova. Nangauli nkhawona kuti Ŵakaboni ŵa Yehova ŵakanweka nane, kweniso  ŵakanilongora lusungu, kweni pa nyengo iyo nkhaŵa wakunozgeka yayi kusintha umoyo wane. Kweni pa nyengo iyi vinthu vikasintha.

Nkhatora Baibolo lane na kwamba kuŵazga. Likanipembuzga comene. Nkhawona kuti mavesi ghanandi ghakutisambizga kucitira lusungu vinyama. Mwaciyelezgero, pa Zintharika 12:10 pakuti, “murunji wakupwelelera umoyo wa cakuŵeta cake.” Nkhamanyaso kuti ni Ciuta yayi uyo wakucitiska masuzgo agho ghali mu caru. M’malo mwake, masuzgo nganandi cifukwa cakuti ŵanthu ŵanandi ŵakulondezga yayi ulongozgi wake. Nkhakhwaskika comene kumanya kuti Yehova ngwacitemwa kweniso wakuzizipizga.—Salmo 103:8-14.

Pa nyengo iyi, nkhasanga kafomu apo pakajambulika buku lakuti, Kasi Baibolo Likusambizgaci Comenecomene? ndipo nkhacemeska buku ili. Pakajumpha nyengo yitali yayi, Ŵakaboni ŵakutorana ŵaŵiri ŵakiza pa nyumba yane na kunipempha kuti tisambirenge Baibolo, ndipo nkhazomera. Nkhamba kuluta ku maungano gha Ŵakaboni ŵa Yehova ku Nyumba ya Ufumu. Ntheura, nkhamba kutemwa comene ivyo nkhasambiranga mu Baibolo.

Nkhuwonga comene cifukwa Baibolo lanovwira kusintha vinthu vinandi pa umoyo wane. Nili kuleka kukhweŵa na uloŵevu. Sono nkhujipwelelera kweniso nkhujikora pakuyowoya. Nakuti pasono ŵalara ŵa boma nkhuŵawona mwakwenelera. (Ŵaroma 13:1) Nili kulekaso nkharo zaukazuzi, izo pakwamba nkhaziwonanga nga ni ziwemi waka.

Cikaniŵira cakusuzga comene kuti nilekane na mawupu ghakuwona wanangwa wa ŵanthu na vinyama. Vikanitolera nyengo yitali kuti nambe kughawona mwakwenelera. Pakwamba, nkhawonanga kuti niŵakhuŵazgenge comene para ningaleka nchito ku mawupu agha. Kweni nkhamanya kuti Ufumu wa Ciuta wekha ndiwo ungamazga masuzgo agho tikukumana nagho mu caru. Ntheura, nkhamba kukhozgera Ufumu wa Ciuta na mtima wose kweniso kovwira ŵanji kuti ŵaumanye.—Mateyu 6:33.

Pakuti nkhakhumbanga kusintha vinthu, ŵanthu nkhaŵaŵikanga mu magulu ghaŵiri, liwemi na liheni. Ndipo nkhaŵa wakunozgeka kumarana nawo awo nkhaŵawonanga kuti mbaheni. Kweni nkhuwonga comene cifukwa Baibolo lanovwira kuti nileke kutinkha ŵanji. M’malo mwake, nkhufwilirapo kutemwa ŵanthu wose. (Mateyu 5:44) Nkhulongora citemwa ici para nkhupharazga makani ghawemi gha Ufumu wa Ciuta. Nili wakukondwa kuwona kuti mulimo uwemi uwu ukovwira ŵanthu kuti ŵaŵe ŵamtende, ŵakukondwa kweniso kuti ŵaŵe na cigomezgo canadi.

Sono nili na mtende wa mu mtima cifukwa nkhani zinyake nili kuzileka mu mawoko gha Yehova. Nili kukhorwa kuti pakuti iyo ni Mlengi, wazomerezgenge yayi kuti ŵanthu ŵalutilire kucitira nkhaza ŵanyawo na vinyama panji kunanga caru cakutowa ici. Kwizira mu Ufumu wake, sonosono apa Ciuta wanozgenge vinthu vyose ivyo vili kunangika. (Yesaya 11:1-9) Ndine wakukondwa cifukwa ca kumanya unenesko uwu, kweniso kovwira ŵanji kuti nawo ŵagomezge vinthu ivi. Sono nilije maghanoghano ghakuti nisinthe vinthu mu caru.