Munthu munyake wakati: “Uyo wakutondeka kugowokera ŵanji wakujibwangandulira buliji lakuti wendepo.” Mazgu agha agho ghakalembeka vyaka 400 ivyo vyajumpha, ghakulongora kuzirwa kwa kugowokera ŵanji. Cifukwa nase pamasinda tikhumbenge kuti ŵanji ŵatigowokere. (Mateyu 7:12) Kweni paliso cifukwa cinyake cikuru ico tikwenera kugowokera ŵanji. Wonani mazgu agho Paulosi wakalemba pa Ŵakolose 3:13.—Ŵazgani.

Pakuti tose tili ŵambura kufikapo, nyengo zinyake tingakhuŵazgana panji kubudirana. (Ŵaroma 3:23) Kasi tingacita wuli kuti tilutilire kuŵa pa mtende na ŵanyithu? Mwakulongozgeka na Ciuta, Paulosi wakuticiska kuti tizizipizgiranenge na kugowokerana. Ulongozgi uwu ucali wakuzirwa nga umo ukaŵira apo ukalembekera vilimika 2000 ivyo vyajumpha. Tiyeni tisande makora mazgu gha Paulosi agha.

“Lutilirani kuzizipizgirana yumoza na munyake.” Mazgu Ghacigiriki agho ghali kung’anamulika kuti “lutilirani kuzizipizgirana,” ghakung’anamura kuleka kucitapo kanthu luŵiro panji kuti kuzikira. Buku linyake likuti Ŵakhristu ŵakulongora kuti ŵali na mukhaliro uwu para “ŵakuzizipizga usange ŵanji ŵakucita vinthu vinyake ivyo vikuŵakhuŵazga.” Mazgu ghakuti “yumoza na munyake” ghakulongora kuti waliyose wakwenera kucitapo kanthu. Fundo njakuti, para tikukumbuka kuti nase tili na tunkharo tunyake uto tungakhuŵazga ŵanji, tizomerezgenge yayi kuti tunkharo twawo tutimbanizge mtende withu na iwo. Kweni kasi tingacita wuli para ŵanji ŵatibudira?

“Lutilirani . . . kugowokerana na mtima wose.” Nkhwantha yinyake yikati, lizgu la Cigiriki lakuti ‘kugowokera na mtima wose’ likung’anamura “kuzikiska waka mtima yayi panji kugowoka pacanyacanya, kweni kugowokera kufumira pasi pa mtima.” Buku linyake likuti lizgu ili, lingang’anamuraso “kucita cinthu ico munthu wangakondwa naco, panji kumovwira.” Tingalongora mtima uwu para tikugowokera ŵanji usange ŵatibudira. Cifukwa wuli tikwenera kucita nthena? Cifukwa vingacitika kuti nyengo yinyake nase tingaŵabudira ndipo tingakhumba kuti ŵatigowokere.

“Nga ni umo Yehova wakagowokelera imwe na mtima wose, ndimo namweso mucitirenge.” Cifukwa cikuru ico tikwenera kugowokera ŵanji na mtima wose nchakuti, Yehova Ciuta wakutigowokera na mtima wose. (Mika 7:18) Ghanaghanirani za lusungu lukuru ulo Yehova wakulongora ku ŵakwananga awo ŵapera. Yehova ni murunji, wali nga ndise taŵakwananga yayi. Ndipouli, wakugowokera na mtima wose ŵakwananga awo ŵapera, nangauli iyo wakubuda yayi. Yehova nchakuwonerapo ciwemi comene pa nkhani yakugowokera.

Pakuti Yehova wakutilongora lusungu, tikuŵa nayo paubwezi ndipo tikukhumba kucita nga ndiyo. (Ŵaefeso 4:32–5:1) Tingacita makora kujifumba kuti, ‘Pakuti Yehova wakunigowokera na mtima wose, kasi ine nitondekerengeci kugowokera wakwananga munyane uyo wapera kufumira pasi pa mtima?—Luka 17:3, 4.