Pa June 14, 1947, sitima yikayima ku Manila, mu sitima iyi mukafuma ŵanthu ŵatatu, Mubali Lorenzo Alpiche, Earl Stewart, na Victor White. Aŵa ŵakaŵa ŵamishonale ŵakwamba kufika ku Philippines. Mubali Nick Skelparick, uyo wakanjira kilasi la chinayi la sukulu ya Giliyadi, nayo wakiza mu charu ichi pamanyuma pa mwezi umoza.

Ŵabali aŵa ŵakasambizgika makora ndipo ŵakaŵa ŵakunozgeka kugwira ntchito. Pamanyuma ŵakamba kutangwanika kovwirako ŵapharazgi 2,400 ku Philippines, pa mulimo wakupharazga. Kufika mu 1958, pamanyuma pa vyaka 11 pera, chiŵelengero cha ŵapharazgi wa Ufumu chikakwera chomene kujumpha pa 23,000. Kufika chaka chino, pajumpha vyaka 75 kufuma apo ŵamishonale ŵakizira, ndipo chiŵelengero cha awo ŵakusopa Yehova ku Philippines chakwera chomene kujumpha pa 230,000.

Vikachitika waka mwa ngozi yayi kuti ŵamishonale aŵa ŵafike ku charu ichi. Myezi yiŵiri pambere ŵandize, kufuma pa March 31 m’paka April 2, 1947, Mubali Nathan H. Knorr, uyo wakalongozganga milimo ya wupu wa Watch Tower Society, wakayowoyapo pa ungano wambura kuluwika wa Ŵakaboni ŵa Yehova ku Manila. Mubali Knorr wakaŵasimikizgira wose awo ŵakaŵapo kuti ŵamishonale awo ŵali kusambira sukulu ya Giliyadi, ŵatumizgikenge ku charu ichi kuti ŵakawovwirepo pa mulimo wakupharazga uwo ukatimbanizgika chifukwa cha nkhondo yachiŵiri ya pa charu chose.

Pa zuŵa la umaliro la ungano uwu, ŵanthu 151 ŵakabatizika ku Manila, ŵakabatizikira pa malo apo pakabira masitima mu nyengo ya nkhondo yachiŵiri ya pa charu chose. Namise zuŵa lira, Mubali Knorr wakayowoya nkhani yachisanisani ya mutu wakuti “The Joy of All the People” ndipo ŵanthu 4,200 ŵakategherezga. Nkhani iyi yikaŵikika pa wayilesi kuti ŵanthu ŵanandi mu charu ichi ŵayitegherezge. Mubali Knorr na Mubali Milton Henschel, awo ŵakafuma ku ofesi yithu yikuru, ŵakakhozga ŵabali na ulongozgi wa mu Malemba kuŵawovwira kuti ŵalutilire kuchita mulimo wakupharazga mu ndondomeko yiwemi.

Pakughanaghanira za ivyo vikachitika vyaka 75 kumasinda uku, Mubali Denton Hopkinson, uyo ni mu mishonale ndipo wateŵetera ku Philippines kufuma mu 1954, wakati: “Ŵamishonale awo ŵakiza mu 1947 ŵakachita ntchito yikuru chomene pakukhozga na kupanga mipingo, kweniso na kuyinozgekereska makora pa kukwera kwa chiŵelengero cha ŵapharazgi uko kukizanga kunthazi.”

Tikuŵawonga chomene Adada ŵithu ŵakuchanya a Yehova, pakutumbika kuyezgayezga kwa ŵateŵeti ŵawo ku Philippines na pa charu chose chapasi.—Yesaya 60:22.