E FAI MAI NISI TINO ME IKAI. Ne fakatusa ne se tokita a te fakaaogaga o te Tusi Tapu ke maua a takitakiga ki se tusi mai te tausaga 1920 mō akoako ei tena vasega i te chemistry. E mafai o ‵sili atu se tino sē talitonu ki te Tusi Tapu me e mata, e mafai o fakaaoga ne koe se tusi fakatonutonu mai se komupiuta mua ke fakatonutonu kae faka‵fou a polokalame i tau komupiuta fou io me ikai. I nisi tugapati, e ‵kilo atu a nisi tino ki te Tusi Tapu e pelā me se tusi ko se aoga eiloa mō ‵tou aso nei.

Kaia fua la ka fia tautali ei se tino ki fakatakitakiga kolā ko leva ne tusi, me i te lalolagi tenei ko ‵fonu eiloa i poto ‵fou? E se gata ei, ko uke ‵ki a fakatuatusi i te itaneti kolā ko ‵fonu i pati fakatonutonu mo fakatakitakiga ‵fou. A polokalame i TV ko ‵fonu i poto o tino ‵poto i mea tau te mafaufau, tau te olaga, mo tino tusi tala. Kae fakatau atu ne sitoa a tusi kolā e ‵fonu i manatu fesoasoani ki tino, kae ko fai eiloa pelā me se pisinisi olaola ‵lei.

Ona ko fakamatalaga ‵fou konā, kaia koi manakogina eiloa te Tusi Tapu—faitalia me ne tusi i te 2,000 tausaga ko teka? E mata, e ‵tonu a pati a tino kola e se talitonu ki te Tusi Tapu, me i te fakaaogaga o te Tusi Tapu e pelā loa mo te fakaaogaga ne ia o se tusi chemistry telā ko se fakaaoga io me se tusi fakatonutonu o te komupiuta telā ko se fakaaoga? Kae iloa ‵lei ne tatou a te fakatusa tena e se se mea ‵tonu. A poto fakasaeinisi mo poto fou i aso nei e mafuli‵fuli, kae e mata, ko oti ne ‵fuli a manakoga ‵tonu o tāgata? Koi ‵sala atu eiloa a tino i aso nei ki se olaga aoga telā e maua ei te fiafia, tokagamalie, fesokotakiga ‵lei i loto i te kāiga mo taugasoa ‵lei.

Faitalia eiloa me pefea te leva, e fakamatala mai i te Tusi Tapu a manakoga ‵tonu e uke o tāgata. E iloa ei me e māfua mai i te Atua te Tusi Tapu. E takitaki ei a vaega katoa o ‵tou olaga kae tuku mai foki a auala ke fakafesagai atu ei ki fakalavelave e fe‵paki mo tatou. (2 Timoteo 3:16, 17) Kae te mea tāua, a pati polopoloki e maua mai ei e aoga mo se taimi leva ‵ki—e se mafai o fai pelā me ne pati ‵mago! E fai mai te Tusi Tapu: “Me i te Muna a te Atua e ola.”​—Epelu 4:12.

E mata, a muna a te Tusi Tapu e ‵tonu? E mata, ko sē aoga, io me koi aoga kae tāua a muna i ei—i ‵tou olaga? A te pogai o Te Faleleoleo Maluga tenei, mo fakasologa o mataupu muamua konei, ka fesoasoani atu ki a koe ke maua a tali ki fesili konā.