Kafai ne sē fiafia koe ki se lotu, kāti ko faigata o talitonu koe ki so se lotu. Kae ke iloa ne koe me e isi se lotu telā e mafai o talitonu koe ki ei. I te taimi ne nofo ei a Iesu i te lalolagi, ne fakamaopoopo ne ia se potukau o soko fakamaoni kae akoako latou ke ola e ‵tusa mo tulaga o te Atua. E isi eiloa ne soko ‵tonu o Keliso koi ola ​—ko tino taki tokotasi kolā e fakagalue faka‵lei ne latou a fakatakitakiga fakavae faka-Kelisiano i olotou olaga. E maua ne koe i fea a latou konei?

E fai mai a Estelle telā ne taku mai i se mataupu mai mua atu, penei: “I te fakaotiga loa, ne kamata au o tauloto ki te Tusi Tapu i te taimi ne kamata ei au o suke‵suke fakatasi mo Molimau a Ieova. Ne seki leva taku taulotoga ke malamalama au i te Ioane 8:​32, telā e faitau, penei: ‘Ka iloa ne koutou te munatonu, a ko te munatonu ka fakasaoloto ne ia koutou.’”

E fai mai foki a Ray telā ne taku muamua mai, penei: “Mai te sukesukega fakatasi mo Molimau a Ieova, ne tauloto ei ne au me ne seki māfua mai i te Atua a logo‵maega o tino. Ne loto fakafetai au me e tigā eiloa e isi se pogai ‵lei ne talia ei ne te Atua a amioga ma‵sei i te taimi nei, e tauto mai a ia me ko pili o fakaseai ne ia.”

E manino ‵lei, me se mea faigata ke fai a te mea tonu i te taimi tenei e ma‵lalo ‵ki ei a tulaga o mea tau amioga a te tokoukega o tino. Kae e mafai eiloa o fai. E ma‵nako a tino e tokouke ki se fesoasoani ke malama‵lama latou kae fakagalue a fakatakitakiga mai te Tusi Tapu. Tenā te pogai e fai ei ne Molimau a Ieova a te fia miliona o akoga faka-te-Tusi Tapu sē ‵togi i fale o tino i te lalolagi kātoa. I vaiaso takitasi, e tauloto a tino e tokouke ki mea kolā e akoako ‵tonu mai i te Tusi Tapu, e fakapili‵pili atu ei ki te lotou Mafuaga, kae ati aka se olaga fia‵fia. *

I te suā taimi e fetaui ei koe mo Molimau a Ieova, kaia e se fesili atu ei koe me kaia e tali‵tonu ei latou ki te lotou lotu? Sukesuke ki olotou akoakoga mo te tala fakasolopito o latou. Ko fakaiku aka ei ne koe māfai e isi se lotu e mafai o talitonu koe ki ei.