E fakaasi mai i fakamatalaga a Samuel, Teresa, Magdalene me e uke a pogai e ‵talo atu ei a tino, telā e isi ne pogai e tai ‵lei atu i nisi mea. Nisi ‵talo a tino e fai atu eiloa mai te loto; kae ko nisi ‵talo a tino e fai fua e pelā me se mea masani. E tiga eiloa te feitu tenā, faitalia me e ‵talo atu latou ke pāsi i olotou sukega, io me ‵talo atu ke manumalo te lotou tīmu, mō te takitakiga a te Atua i olotou olaga faka-te-kāiga, io me ko nisi pogai e uke, e maua eiloa ne te fia selau miliona o tino a te lagonaga ke ‵talo atu. A te ‵tonuga loa, e fakaasi mai i sukesukega ne fai me ke oko foki eiloa ki nisi tino kolā e se tī ‵lotu e ‵talo atu faeloa.

E mata, e ‵talo atu koe? Kafai e penā loa, ne a mea e ‵talo atu koe ki ei? Faitalia me e ‵talo sāle atu koe io me ikai, e mafai o mafaufau koe penei: ‘E mata, e aoga eiloa a te ‵talo? E mata, e isi se tino e fakalogologo mai?’ Ne fakaasi mai ne se tino tusitala e tokotasi tena kilokiloga me i te ‵talo “se vaega fua e tasi o vailakau aoga . . . e pelā eiloa me e faipati koe ki tau ika fagai.” E maua foki ne nisi tino pulepule i galuega fakatokita a te kilokiloga tai ‵pau, telā e taku ne latou a te ‵talo ki se vaega “o vailakau aoga.” E mata, a tino kolā e ‵talo e fai ne latou se tofotofoga sē aoga, io me e maua ne latou a nisi mea aoga mai te faifaiga tenei?

E ‵kese mai i ei, e fakamatala mai i te Tusi Tapu a te ‵talo e pelā me e sili fakafia atu i se vaega o vailakau aoga. E fai mai i ei me e isi se tino telā e fakalogologo mai eiloa ki ‵talo kolā e fai i te auala tonu kae mō mea ‵tonu. E mata, e tonu te mea tenei? Ke onoono aka tatou ki fakamaoniga.