A latou se potukau lasi o tino talai o te tala ‵lei o te Malo o te Atua. E ‵valo mai te Salamo 68:11 e uiga ki faifeau konā: “E tuku atu ne Ieova te fakatonuga; a fāfine kolā e folafola atu ne latou te tala ‵lei se kautau lasi.”

Kae ke mo a ma ‵numi i te galuega e fai ne fāfine Molimau a Ieova mo te galuega e fai ne faifeau fā‵fine i nisi lotu. E isi se ‵kesega lasi i te va o latou. Ne a mea e ‵kese ei latou?

E ‵kese a tino e talai latou ki ei. A faifeau fā‵fine, kae maise i Fenua Kelisiano, e maua ne latou a tulaga pule i loto i olotou fakapotopotoga, kae ko tino foki loa i olotou lotu e talai latou ki ei. Mō faifeau fā‵fine a Molimau a Ieova, e talai atu latou ki tino mai tua o te fakapotopotoga, ko tino kolā e fetaui mo latou i te lotou galuega talai mai fale ki fale mo nisi koga.

A te suā auala e ‵kese ei a faifeau fā‵fine a Molimau a Ieova mai faifeau fā‵fine i nisi lotu, ko olotou galuega i te fakapotopotoga. A fā‵fine mai Fenua Kelisiano mo nisi lotu e pule kae akoako atu ki tino i olotou lotu. Kae e se mafai o akoako atu a faifeau fā‵fine i te Lotu Molimau a Ieova ki te fakapotopotoga māfai e isi ne tāgata papatiso e ‵nofo mai. Ko tāgata fua kolā ne ‵tofi aka ke fai mo faiakoga, e fai penā.—1 Timoteo 3:2; Iakopo 3:1.

E fakamatala mai i te Tusi Tapu me ko tāgata fua ne tuku atu ki a latou te tiute ke tausi se fakapotopotoga. Mafaufau la ki te auala ne tuku mai ne te apositolo ko Paulo i te taimi ne tusi atu ei a ia ki se taina ovasia, ko Tito: “Ne tuku ne au a koe i Keleta ko te mea . . . ke ‵tofi aka a toeaina i fakai takitasi.” Ne toe fai atu a Paulo me i tāgata takitasi kolā e ‵tofi aka, e ‵tau o “saoloto mai i ‵losiga, e tokotasi tena avaga.” (Tito 1:5, 6) Ne tuku atu ne Paulo a fakatonuga tai ‵pau ki a Timoteo i tena tusi e uiga ki te faiga o fakatokaga: “Kafai se tagata e kausaki ke fai mo fai se ovasia, e manakogina ke fai ne ia a galuega ‵lei. Tela la, a te ovasia e se ‵tau o taku fakamaseigina ne tino, e tokotasi tena avaga, . . . e poto i te akoako atu.”—1 Timoteo 3:1, 2.

Kaia ne tuku atu fua ei ki tāgata a te tausiga o te fakapotopotoga? E fai mai a Paulo: “E se talia ne au se fafine ke akoako io me pule atu ki se tagata, kae e ‵tau o nofo fifilemu a ia. Me ne faite muamua a Atamu, kae fakamuli ko Eva.” (1 Timoteo 2:12, 13) Tela la, e fakaasi mai i te fakasologa o mea ne faite, a te fuafuaga a te Atua e uiga ki tino kolā e ‵tau o fai ne latou a akoakoga mo te tausiga.

E tau‵tali atu a faifeau a Ieova ki te fakaakoakoga a te lotou Takitaki, ko Iesu Keliso. Ne tusi mai te soko ko Luka e uiga ki te galuega a Iesu: “Ne faimalaga atu a Iesu mai fakai ‵lasi ki nisi fakai ‵lasi, e pelā foki mo fakai fo‵liki ki nisi fakai fo‵liki, o talai kae folafola atu te tala ‵lei e uiga ki te Malo o te Atua.” Fakamuli ifo, ne toe uga atu ne Iesu ana soko ke fai foki te galuega tenā: “Olo ei latou i loto i te fenua kātoa mai i fakai fo‵liki ki nisi fakai fo‵liki, o folafola atu te tala ‵lei.”—Luka 8:1; 9:2-6.

I aso nei, a faifeau a Ieova—tāgata mo fāfine—e ‵kau malosi atu latou ki te faiga o te mea telā ne ‵valo mai ne Iesu: “Kae ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa, ko oko mai ei te gataga.”—Mataio 24:14.