Aita. Aita te Bibilia e parau ra e mea ino te moni aore ra o te moni te tumu o te mau ino atoa. Ua matau te taata i te parau i te reira. E faahitiraa hape râ tera parau o te hoê irava Bibilia. Te parau nei hoi te Bibilia: “O te nounou moni hoi te tumu o te mau ino atoa nei.” a—Timoteo 1, 6:10, Te Bibilia Moˈa ra, na matou e haapapu nei.

•  Eaha ta te Bibilia e parau ra no nia i te moni?

•  No te aha te Bibilia e faaara mai ai no nia i te nounou moni?

•  E nafea e faufaahia ˈi i te aˈoraa Bibilia no nia i te moni?

•  Irava Bibilia no nia i te moni

 Te faaite ra te Bibilia e mea faufaa te moni e ia faaohipa-maitai-hia, e riro te reira ei “parururaa.” (Koheleta 7:12)Te haapopou atoa ra te Bibilia i te feia e faaite nei i te aau horoa noa ia vetahi ê, peneiaˈe ma te horoa atoa i te ô moni.—Maseli 11:25.

 I te hoê â taime, te faaara mai ra te Bibilia, eiaha te moni ia riro ei fa i roto i to tatou oraraa. Te na ô nei: “Eiaha roa ei nounou moni i roto i to outou oraraa, ia mauruuru râ i ta outou mau mea e vai nei.” (Hebera 13:5) Eaha te haapiiraa e huti mai? E vaiiho anaˈe ïa i te moni i to ˈna vairaa e eiaha e tapi i te taoˈa rahi. E haamau anaˈe râ ei fa, ia mauruuru i ta tatou e hinaaro mau nei oia hoi te maa, te ahu e te nohoraa.—Timoteo 1, 6:8.

 Eita te taata nounou e fanaˈo i te ora mure ore. (Ephesia 5:5) No te aha? A tahi, ua riro te nounou moni ei huru haamoriraa idolo aore ra ei haamoriraa hape. (Kolosa 3:5) Te piti, e pinepine eita te feia nounou e tâuˈa faahou i te mau aratairaa maitai. Te na ô ra te Maseli 28:20: “Eita râ te taata e ru ia rahi ta ˈna mau taoˈa e vai hapa ore noa.” Peneiaˈe topa roa ˈtu ratou i roto i te ohipa ino mai te haamǎtaˈuraa i te taata ia horoa mai ratou i te moni, te ohipa taviri, te haruraa i te taata aore ra te haapohe-roa-raa ˈtu ia ratou.

 E ere te taata atoa te topa i roto i te ohipa ino. E faaruru râ te taata nounou moni i te tahi atu mau faahopearaa ino. Te parau ra te Bibilia: “Te feia e onoono ra i te titau i te taoˈa rahi, e topa ratou i roto i te faahemaraa, te marei e te hinaaro ino e te maamaa e rave rahi.”—Timoteo 1, 6:9.

 Ia pee noa tatou i te mau mea tia e te mau mea o te faaoaoa i te Atua, e faatura tatou ia tatou iho e e fanaˈo i te farii maitai e te turu a te Atua. I te feia o te tutava mau nei i te faaoaoa i te Atua, te fafau ra oia: “E ore roa vau e vaiiho ia oe, e e ore roa vau e faarue ia oe.” (Hebera 13:5, 6) Te haapapu atoa mai ra o ˈna e “e fanaˈo te taata haapao maitai e rave rahi haamaitairaa.”—Maseli 28:20.